New Year 2026: નવા વર્ષ પહેલા જમ્મુ-કાશ્મીરમાં 'સુરક્ષા કવચ' સઘન, હાઈ એલર્ટ પર સુરક્ષા એજન્સીઓ
છેલ્લું અપડેટ : 29 Dec 2025
New Year 2026: દેશ અને દુનિયામાં નવા વર્ષની ઘડીઓ ઘણાઈ રહી છે. નવા વર્ષના સ્વાગતની તૈયારીઓ વચ્ચે જમ્મુ-કાશ્મીરમાં સુરક્ષા વ્યવસ્થા અત્યંત સઘન કરી દેવામાં આવી છે. કાશ્મીરમાં સુરક્ષા દળોને 'હાઈ એલર્ટ' પર રાખવામાં આવ્યા છે. પોલીસ, CRPF અને સેનાની સંયુક્ત ટીમો રાજ્યના ખૂણેખૂણા પર બાજ નજર રાખી રહી છે.
વર્તમાન સુરક્ષા સ્થિતિની સમીક્ષા કર્યા બાદ જમ્મુ-કાશ્મીર પોલીસ અને CRPF એ 'એરિયા ડોમિનેશન' અને સર્ચ ઓપરેશન તેજ કરી દીધા છે. શ્રીનગર સહિત ખીણના મહત્વના સંવેદનશીલ વિસ્તારોમાં સ્પેશિયલ ઓપરેશન્સ ગૃપ સાથે મળીને સર્ચ ઓપરેશનને વેગ આપવામાં આવ્યો છે.
શંકાસ્પદ ઠેકાણાંઓ અને ગતિવિધિઓ પર નજર રાખવા માટે પોલીસે અનેક સ્થળોએ દરોડા પાડવાનો સિલસિલો શરૂ કર્યો છે. શ્રીનગરના શહેરી વિસ્તારોમાં અનેક જગ્યાએ ચેકપોઈન્ટ્સ ગોઠવવામાં આવ્યા છે અને સઘન તલાશી લેવામાં આવી રહી છે.
પર્યટન સ્થળો પર 'સુરક્ષા કવચ'
નવા વર્ષની ઉજવણી માટે ગુલમર્ગ, પહેલગામ અને શ્રીનગરમાં પ્રવાસીઓની ભારે ભીડ ઉમટી રહી છે. આ બાબતને ધ્યાનમાં રાખીને દલ સરોવર અને તેની આસપાસના વિસ્તારોમાં પેટ્રોલિંગ વધારી દેવામાં આવ્યું છે. શિકારા અને ઘાટો પર પણ કડક નજર રાખવામાં આવી રહી છે.
જમ્મુ કાશ્મીરમાં 'ચિલ્લઈ કલાં' દરમિયાન સમગ્ર ખીણમાં ઠંડી તેની ચરમસીમા પર હોય છે. આ સમયગાળો 21 ડિસેમ્બરથી શરૂ થઈને 31 જાન્યુઆરીએ પૂરો થાય છે. એવું માનવામાં આવે છે કે આ દરમિયાન આતંકવાદીઓ કોઈ પ્રવૃત્તિ કરતા નથી, પરંતુ આ વખતે ખીણમાં કંઈક અલગ જ સંકેતો મળી રહ્યા છે. મળતી માહિતી મુજબ, આતંકવાદીઓએ આ વખતે તેમની પેટર્ન (કાર્યપદ્ધતિ) બદલી નાખી છે અને તેઓ ખરાબ હવામાનનો પણ પૂરેપૂરો લાભ ઉઠાવવાની ફિરાકમાં છે.
