VIDEO: અરબ સાગરમાં ગુજરાત ATS અને કોસ્ટ ગાર્ડનું મેગા ઓપરેશન, 5 પાકિસ્તાની 3 હજાર કરોડના ડ્રગ્સ સાથે ઝડપાયા
છેલ્લું અપડેટ : 30 Sept 2026
ગુજરાત એન્ટી ટેરરિઝમ સ્ક્વોડ (ATS) અને ભારતીય તટરક્ષક દળ (ICG) એ અરબ સાગરમાં આંતરરાષ્ટ્રીય ડ્રગ્સ તસ્કર સિન્ડિકેટ સામે અત્યાર સુધીનું સૌથી મોટું સફળ ઓપરેશન પાર પાડ્યું છે. લક્ષદ્વીપના પશ્ચિમે મધ્ય સમુદ્રમાં એક શંકાસ્પદ ઈરાની બોટને આંતરીને 526 કિલો હાઈ ગ્રેડ નશીલા પદાર્થો નો જથ્થો જપ્ત કરવામાં આવ્યો છે. આંતરરાષ્ટ્રીય બજારમાં આ ડ્રગ્સની કિંમત રૂપિયા 3000 કરોડથી વધુ આંકવામાં આવી છે. આ સપાટા દરમિયાન બોટ પર સવાર 5 પાકિસ્તાની નાગરિકોની ધરપકડ કરી લેવામાં આવી છે.
દરિયાઈ ડ્રગ્સ દાણચોરીને મોટો ફટકો
ભારતીય કોસ્ટ ગાર્ડના જણાવ્યા મુજબ, આ કાર્યવાહી આંતરરાષ્ટ્રીય ડ્રગ્સ દાણચોરી નેટવર્ક સામે એક મહત્વપૂર્ણ પગલું છે. દરિયાઈ અને હવા બંને તરફથી સતત દેખરેખ બાદ, એક શંકાસ્પદ જહાજ ઓળખી કાઢવામાં આવ્યું હતું અને ત્યારબાદ હાઇ-સ્પીડ પીછો કરીને તેને અટકાવવામાં આવ્યું હતું. પરિણામે, ડ્રગ્સનો મોટો જથ્થો ભારતીય દરિયાકાંઠે પહોંચે તે પહેલાં જ જપ્ત કરવામાં આવ્યો હતો.
આ કાર્યવાહીને દરિયાઈ ક્ષેત્રમાં માદક દ્રવ્યોની દાણચોરીને રોકવામાં એક મોટી સફળતા તરીકે જોવામાં આવી રહી છે. ભારતીય કોસ્ટ ગાર્ડે જણાવ્યું હતું કે તેનું દરિયાઈ દેખરેખ નેટવર્ક સતત સક્રિય રહે છે અને ગેરકાયદેસર પ્રવૃત્તિઓ સામેની કાર્યવાહી શૂન્ય-સહિષ્ણુતા નીતિ હેઠળ ચાલુ છે.
દરિયા અને હવામાં કડક ચોકીયાત: 'હોટ પર્સ્યુટ' બાદ બોટ પર દરોડો
ગુજરાત ATS ને ગુપ્ત બાતમી મળી હતી કે, દરિયાઈ માર્ગે કરોડો રૂપિયાનું ડ્રગ્સ ભારત કે આસપાસના વિસ્તારોમાં ઘૂસાડવાનો પ્રયાસ થઈ રહ્યો છે. આ બાતમીના આધારે કોસ્ટ ગાર્ડે દરિયામાં જહાજો અને હવામાં સર્વેલન્સ વિમાનો દ્વારા સઘન મોનિટરિંગ શરૂ કર્યું હતું. 25 સપ્ટેમ્બરે અરેબિયન સીમાં શંકાસ્પદ ઈરાની બોટ નજરે પડતાં જ કોસ્ટ ગાર્ડના જહાજે તેનો પીછો ('હોટ પર્સ્યુટ') કર્યો હતો. દરિયાની વચ્ચે જ બોટને ઘેરી લેવામાં આવી હતી અને કમાન્ડોએ બોટ પર ચડીને તલાશી લેતાં કોથળાઓમાં છુપાવેલું પ્યોર હેરોઇન અને મેથમફેટામાઇન મળી આવ્યું હતું.
તમામ આરોપીઓ મુંબઈ ખસેડાયા: સંયુક્ત પૂછપરછ હાથ ધરાશે
પકડાયેલા પાકિસ્તાની તસ્કરો, ઈરાની બોટ અને 3000 કરોડના ડ્રગ્સના જથ્થાને કોસ્ટ ગાર્ડ દ્વારા સુરક્ષિત રીતે મુંબઈ બંદરે લાવવામાં આવ્યા છે. હવે ત્યાં ગુજરાત ATS, કોસ્ટ ગાર્ડ, નાર્કોટિક્સ કંટ્રોલ બ્યુરો (NCB) અને અન્ય કેન્દ્રીય તપાસ એજન્સીઓ દ્વારા આ પાકિસ્તાની નાગરિકોની કડક પૂછપરછ કરવામાં આવશે. આ ડ્રગ્સ કોણે મોકલ્યું હતું અને ભારતમાં કે અન્ય કોઈ દેશમાં કોને પહોંચાડવાનું હતું તે દિશામાં તપાસ તેજ કરવામાં આવી છે