ખગડિયાની સરકારી શાળામાં મોટી દુર્ઘટના: દાદર ધરાશાયી થતાં ૯ વર્ષની બાળકીનું મોત
છેલ્લું અપડેટ : 30 Sept 2026
બિહારના ખગડિયામાં આવેલી એક સરકારી શાળામાં મોટી દુર્ઘટના સર્જાઈ હતી. માનસી પોલીસ સ્ટેશનના અધિકારક્ષેત્ર હેઠળ આવતા અમાની ગામના પાસવાન ટોલામાં આવેલી સરકારી પ્રાથમિક શાળાની સીડી અચાનક ધરાશાયી થઈ ગઈ હતી. સીડીના કાટમાળ નીચે દબાઈ જવાથી 9 વર્ષની વિદ્યાર્થિની રિતિકા કુમારીનું મૃત્યુ થયું હતું. આ ઘટનામાં અન્ય ત્રણ બાળકો પણ ઘાયલ થયા હતા.સીડી ધરાશાયી થતાં જ શાળામાં અફરાતફરી મચી ગઈ. ઘટનાની જાણ થતાં જ સ્થાનિક લોકો ઘટનાસ્થળે દોડી આવ્યા અને કાટમાળ નીચે ફસાયેલા બાળકોને બચાવવાના પ્રયાસો શરૂ કર્યા. ઘાયલ બાળકોને સારવાર માટે સદર હોસ્પિટલમાં મોકલવામાં આવ્યા છે. અકસ્માત બાદ થોડા સમય સુધી શાળાના પરિસરમાં ગભરાટનું વાતાવરણ છવાયેલું રહ્યું હતું.
અધિકારીઓ ઘટનાસ્થળે પહોંચ્યા
ઘટનાની જાણ થતાં જ વહીવટી અધિકારીઓ સ્થળ પર પહોંચી ગયા હતા. સદર એસડીએમ (SDM) ધનંજય કુમાર સહિતના અનેક અધિકારીઓએ ઘટનાસ્થળની મુલાકાત લીધી હતી અને અકસ્માત અંગેની વિગતો મેળવી હતી.આ અકસ્માતમાં ૯ વર્ષીય રિતિકા કુમારીના મૃત્યુને કારણે સમગ્ર વિસ્તારમાં શોકનું મોજું ફરી વળ્યું છે, જ્યારે ઘાયલ બાળકો સદર હોસ્પિટલમાં સારવાર લઈ રહ્યા છે. આ ઘટના બાદ શાળાની સુરક્ષા અને ઈમારતની સ્થિતિ અંગે પણ સવાલો ઉઠી રહ્યા છે.
