રાજસ્થાનમાં ડ્રગ્સ દાણચોરો પર મોટી કાર્યવાહી, ₹73.64 કરોડની સંપત્તિ ફ્રીઝ
છેલ્લું અપડેટ : 14 Sept 2026
જયપુર: રાજસ્થાન પોલીસે ડ્રગ્સ દાણચોરો (Drug Traffickers) સામે કડક કાર્યવાહી શરૂ કરી છે. ચાલુ વર્ષમાં જાન્યુઆરીથી અત્યાર સુધીમાં નારકોટિક ડ્રગ્સ એન્ડ સાયકોટ્રોપિક સબ્સટન્સ (NDPS) એક્ટ હેઠળ ડ્રગ્સના ગેરકાયદેસર વેપારથી ઉભી કરાયેલી કુલ ₹73.64 કરોડની સ્થાવર અને જંગમ સંપત્તિ ફ્રીઝ, જપ્ત અથવા ટાંચમાં લેવામાં આવી છે.
એન્ટી નારકોટિક્સ ટાસ્ક ફોર્સ (ANTF)ના આઈજી વિકાસ કુમારે જણાવ્યું હતું કે કુખ્યાત ડ્રગ્સ દાણચોરો સામે કુલ 63 કેસ તૈયાર કરીને સક્ષમ અધિકારી સમક્ષ મોકલવામાં આવ્યા છે. આમાંથી 38 કેસમાં સંપત્તિ ટાંચમાં લેવા અને જપ્ત કરવાના અંતિમ આદેશોને મંજૂરી મળી ગઈ છે. જ્યારે બાકીના 25 કેસમાં કાયદાકીય કાર્યવાહી (Legal Process) અંતિમ તબક્કા તરફ આગળ વધી રહી છે.
ઘરથી લઈને વાહનો સુધીની સંપત્તિ નિશાન પર
ડ્રગ્સના ગેરકાયદેસર ધંધામાંથી ઉભી કરવામાં આવેલી સંપત્તિ સામેની આ કાર્યવાહી હેઠળ વિવિધ પ્રકારની મિલકતોને નિશાન બનાવવામાં આવી છે. તેમાં મકાનો, નિર્માણાધીન દુકાનો, કૃષિ જમીન, રહેણાંક પ્લોટ સહિતની સ્થાવર મિલકતોનો સમાવેશ થાય છે.
આ ઉપરાંત દાણચોરોની કાર, ટ્રેક્ટર, મોટરસાયકલ સહિતનાં વાહનો પણ કાર્યવાહી હેઠળ લેવામાં આવ્યા છે. પોલીસનું કહેવું છે કે ડ્રગ્સના ગેરકાયદેસર નાણાંથી ઉભી કરવામાં આવેલી સંપત્તિ પર કાયદા મુજબ કાર્યવાહી કરવામાં આવી રહી છે.
NDPS એક્ટ હેઠળ વિશેષ અભિયાન
એન્ટી નારકોટિક્સ ટાસ્ક ફોર્સ દ્વારા ડ્રગ્સ દાણચોરો સામે ખાસ અભિયાન (Special Drive) ચલાવવામાં આવી રહ્યું છે. આ કાર્યવાહી નારકોટિક ડ્રગ્સ એન્ડ સાયકોટ્રોપિક સબ્સટન્સ એક્ટની કલમ 68-એફ હેઠળ કરવામાં આવી રહી છે.
સત્તાવાળાઓના જણાવ્યા અનુસાર, ડ્રગ્સના ગેરકાયદેસર વેપારમાં સંડોવાયેલા લોકોની માત્ર ધરપકડ કરીને કાર્યવાહી પૂરી ન થાય, પરંતુ તેમના ગેરકાયદેસર નાણાંથી ઉભી કરાયેલી સંપત્તિ સામે પણ પગલાં લેવામાં આવે તે આ અભિયાનનો મુખ્ય હેતુ છે.
ચિત્તોડગઢમાં સૌથી મોટી કાર્યવાહી
રાજસ્થાનમાં અત્યાર સુધીની આ કાર્યવાહી દરમિયાન ચિત્તોડગઢમાં સૌથી મોટી કાર્યવાહી કરવામાં આવી છે. અહીં મંજૂર થયેલા કેસો હેઠળ કુલ ₹20.35 કરોડની સંપત્તિ જપ્ત કરવામાં આવી છે.
રાજસ્થાન પોલીસની આ કાર્યવાહીથી ડ્રગ્સ દાણચોરો પર માત્ર કાયદાકીય નહીં, પરંતુ આર્થિક રીતે પણ મોટો પ્રહાર થયો છે. સત્તાવાળાઓનું માનવું છે કે ગેરકાયદેસર રીતે ઊભી કરવામાં આવેલી સંપત્તિ સામે કાર્યવાહી કરવાથી ડ્રગ્સના નેટવર્કને નબળું પાડવામાં મદદ મળશે.
