Video: "ખડગે સાહેબ, આ તમને શોભા નથી આપતું!", પીએમ મોદી પરના વિવાદિત નિવેદનથી ભડક્યા સુનીલ જાખડ

કૉંગ્રેસના રાષ્ટ્રીય અધ્યક્ષ અને રાજ્યસભામાં વિરોધ પક્ષના નેતા મલ્લિકાર્જુન ખડગે દ્વારા વડાપ્રધાન નરેન્દ્ર મોદી અંગે કરવામાં આવેલી ટિપ્પણી સામે ભારતીય જનતા પાર્ટીએ આકરો વિરોધ નોંધાવ્યો છે. પંજાબ ભાજપના પૂર્વ પ્રદેશ પ્રમુખ અને વરિષ્ઠ નેતા સુનીલ જાખડે ચંદીગઢ ખાતે નિવેદન આપતાં આ મામલે ખડગેની આકરી ટીકા કરી છે અને તેમની પાસે માફીની માંગ કરી છે.

જવાબદાર પદની ગરિમા જળવાવી જોઈએ

સુનીલ જાખડે મીડિયા સાથે વાતચીત કરતાં જણાવ્યું હતું કે, પંજાબ કૉંગ્રેસના જુનિયર કે નાના નેતાઓ પાસેથી તો આ પ્રકારના નિવેદનોની અપેક્ષા રાખી શકાય, પરંતુ ખડગે સાહેબ જેવા વરિષ્ઠ, જવાબદાર અને અનુભવી નેતા તરફથી આવી ભાષા સાંભળવી અત્યંત દુર્ભાગ્યપૂર્ણ છે. તેઓ સંસદમાં વિરોધ પક્ષના નેતા જેવા મહત્વના બંધારણીય પદ પર બિરાજમાન છે.

પરિપક્વ નેતાને આવું નિવેદન શોભતું નથી

તેમની રાજકીય સફર, ઉંમર અને લાંબા અનુભવને જોતાં આવા નિવેદનો તેમના મુખેથી શોભતા નથી. એક વરિષ્ઠ અને પરિપક્વ રાજકારણી તરીકે તેમણે જે પ્રકારની ટિપ્પણી કરી છે તેની જેટલી નિંદા કરીએ તેટલી ઓછી છે. જાખડે સ્પષ્ટ શબ્દોમાં જણાવ્યું કે વડાપ્રધાન વિરુદ્ધ કરેલી આ અશોભનીય ટિપ્પણી માટે મલ્લિકાર્જુન ખડગેએ દેશ સમક્ષ માફી માંગવી જોઈએ. ખડગેના નિવેદનને લઈને ભાજપ દેશભરમાં કૉંગ્રેસ વિરુદ્ધ આક્રમક વલણ અપનાવી રહ્યું છે અને વિપક્ષી નેતાઓની ભાષાના સ્તર પર ગંભીર સવાલો ઉઠાવી રહ્યું છે.