Video: જમ્મુ રેલવે સ્ટેશન સામે શિવ માર્કેટમાં ભીષણ આગ! 40 દુકાનો અને એક હોટેલ બળીને ખાખ, કરોડોના નુકસાનની આશંકા
જમ્મુમાં રેલવે સ્ટેશનની સામે આવેલા શિવ માર્કેટ (Shiva Market)માં રવિવારે મોડી રાત્રે ભીષણ આગ (Massive Fire) લાગતાં ભારે અફરાતફરી મચી ગઈ હતી. આગની લપેટમાં આવતાં અંદાજે 35થી 40 દુકાનો બળીને ખાખ થઈ ગઈ હતી. એક હોટેલને પણ ભારે નુકસાન પહોંચ્યું હોવાના અહેવાલ છે. પ્રાથમિક અંદાજ મુજબ, આ દુર્ઘટનામાં કરોડો રૂપિયાનું નુકસાન થયું હોવાની આશંકા છે.
આગથી દુકાનદારોમાં અફરાતફરી
શિવ માર્કેટમાં રવિવારે મોડી રાત્રે અચાનક આગ લાગી હતી. જોતજોતામાં આગની જ્વાળાઓ આસપાસની દુકાનો સુધી ફેલાઈ ગઈ હતી. બજારમાં હાજર દુકાનદારો અને સ્થાનિક લોકોમાં ગભરાટ ફેલાયો હતો. ઘટનાની જાણ થતાં ફાયર બ્રિગેડ (Fire Brigade)ની અનેક ગાડીઓ ઘટનાસ્થળે પહોંચી હતી અને આગ પર કાબૂ મેળવવાની કામગીરી શરૂ કરી હતી.
સૂકા મેવા અને ધાબળાની દુકાનો બળીને ખાખ
આ બજારમાં સૂકા મેવા (Dry Fruits), ધાબળા અને ખાણીપીણીની દુકાનો સહિત અનેક વેપારી એકમો આવેલા છે. આગને કારણે દુકાનોમાં રાખેલો માલસામાન બળીને નાશ પામ્યો હતો. ભાજપના ધારાસભ્ય વિક્રમ રંધાવાના જણાવ્યા અનુસાર, આશરે 35થી 40 દુકાનો સંપૂર્ણપણે બળીને ખાખ થઈ ગઈ છે. એક હોટેલને પણ નુકસાન થયાના અહેવાલ છે.
શોર્ટ સર્કિટની આશંકા, તપાસ ચાલુ
પ્રાથમિક રીતે આગનું કારણ શોર્ટ સર્કિટ (Short Circuit) હોવાનું માનવામાં આવી રહ્યું છે, પરંતુ સત્તાવાર પુષ્ટિ હજી થઈ નથી. પોલીસ અને વહીવટી તંત્રની ટીમો પણ ઘટનાસ્થળે પહોંચી હતી. આગ લાગવાનું ચોક્કસ કારણ તપાસ બાદ જ જાણી શકાશે.
વેપારીઓને વળતરની આશા
આ દુર્ઘટનાને કારણે અનેક વેપારીઓની આજીવિકા સામે સંકટ ઊભું થયું છે. દુકાનોમાં રહેલો માલસામાન નાશ પામતાં તેમને ભારે આર્થિક નુકસાનની આશંકા છે. હાલમાં નુકસાનનું મૂલ્યાંકન (Damage Assessment) કરવામાં આવી રહ્યું છે. અસરગ્રસ્ત વેપારીઓ વહીવટી તંત્ર પાસેથી મદદ અને વળતરની આશા રાખી રહ્યા છે. ઘટનામાં કોઈ જાનહાનિ થઈ હોવાની સત્તાવાર પુષ્ટિ સામે આવી નથી.
