દિલ્હી રેસકોર્સ મસ્જિદ વિવાદ: હાઈકોર્ટની આગામી સુનાવણી સુધી તોડફોડ પર રોક, કેન્દ્ર અને વક્ફ બોર્ડને નોટિસ

દિલ્હીના રેસકોર્સ ક્લબ પરિસરમાં આવેલી મસ્જિદને લઈને વિવાદ દિલ્હી હાઈકોર્ટમાં પહોંચ્યો છે. મસ્જિદને તોડી પાડવાની આશંકા વ્યક્ત કરતી અરજી પર સુનાવણી કરતાં હાઈકોર્ટે કેન્દ્ર સરકારના જમીન અને વિકાસ કાર્યાલય (L&DO) તથા દિલ્હી વક્ફ બોર્ડને નોટિસ પાઠવી જવાબ માગ્યો છે. સાથે જ કેન્દ્ર સરકારે કોર્ટને મૌખિક ખાતરી આપી છે કે આગામી સુનાવણી સુધી મસ્જિદમાં કોઈ તોડફોડ કરવામાં નહીં આવે. આ કેસની આગામી સુનાવણી ગુરુવારે થશે.

મસ્જિદનો રસ્તો બંધ, વીજળી-પાણીનો પુરવઠો પણ અટકાવ્યાનો આરોપ

અરજદાર સૈયદ અહમદ સઉદ વતી હાજર વકીલ એમ. સુફિયાન સિદ્દીકીએ કોર્ટમાં દલીલ કરી હતી કે મસ્જિદ સુધી પહોંચવાનો રસ્તો બંધ કરી દેવામાં આવ્યો છે. ત્યારબાદ વીજળી અને પાણીનો પુરવઠો પણ બંધ કરવામાં આવ્યો હોવાનો આરોપ છે. આ પગલાંને કારણે નમાજ અદા કરવા આવતા લોકોને મુશ્કેલી પડી રહી છે. અરજદારના જણાવ્યા અનુસાર, આ પરિસ્થિતિને કારણે મસ્જિદને નુકસાન પહોંચાડવામાં આવે અથવા તેને તોડી પાડવામાં આવે તેવી આશંકા ઊભી થઈ છે. તેથી મસ્જિદની સુરક્ષા સુનિશ્ચિત કરવા માટે હાઈકોર્ટમાં અરજી કરવામાં આવી છે.

1977થી વક્ફ મિલકત હોવાનો દાવો

અરજદારના વકીલે કોર્ટને જણાવ્યું હતું કે રેસકોર્સ મસ્જિદને 1977થી સરકારી ગેઝેટમાં વક્ફ મિલકત તરીકે જાહેર કરવામાં આવી છે. વધુમાં, 1 ઓક્ટોબર, 2009ના જાહેરનામા હેઠળ તેને ગ્રેડ-2નો દરજ્જો આપવામાં આવ્યો હોવાનો પણ દાવો કરવામાં આવ્યો છે. અરજીમાં જણાવાયું છે કે મસ્જિદમાં સામાન્ય ફેરફાર કરવા માટે પણ સંબંધિત હેરિટેજ કમિટીની મંજૂરી લેવી જરૂરી છે. આવી સ્થિતિમાં, નિર્ધારિત કાનૂની પ્રક્રિયાનું પાલન કર્યા વિના મસ્જિદને તોડી પાડવાની કાર્યવાહી કરી શકાય નહીં, તેવી દલીલ અરજદાર તરફથી કરવામાં આવી છે. અરજદારે એમ પણ જણાવ્યું છે કે ધાર્મિક પ્રવૃત્તિઓમાં ભાગ લેવાના પોતાના અધિકાર હેઠળ તેઓ મસ્જિદમાં જવા માગે છે, પરંતુ તેમને ત્યાં પહોંચતા અટકાવવામાં આવી રહ્યા છે.

વક્ફ બોર્ડે 19 ઓક્ટોબરે ફરિયાદ કરી હતી

સુનાવણી દરમિયાન દિલ્હી વક્ફ બોર્ડ તરફથી હાજર વકીલે જણાવ્યું હતું કે 19 ઓક્ટોબરે જમીન અને વિકાસ કાર્યાલય સહિત સંબંધિત અધિકારીઓને આ મામલે ફરિયાદ મોકલવામાં આવી હતી. જોકે, તેના પર હજુ સુધી કોઈ નિર્ણય લેવામાં આવ્યો નથી. અરજદારે પણ વક્ફ બોર્ડ અને જમીન તથા વિકાસ કાર્યાલય સમક્ષ અલગ-અલગ અરજીઓ કરી હોવાનો ઉલ્લેખ કર્યો હતો. તેમ છતાં સ્થિતિમાં સુધારો ન થયો હોવાનો દાવો કરવામાં આવ્યો છે.

કેન્દ્ર સરકારે સુરક્ષાનું કારણ આપ્યું

કેન્દ્ર સરકાર તરફથી હાજર સરકારી વકીલ આશિષ દીક્ષિતે કોર્ટ પાસેથી સંબંધિત અધિકારીઓ સાથે ચર્ચા કરીને સૂચનાઓ મેળવવા માટે સમય માગ્યો હતો. તેમણે દલીલ કરી હતી કે રેસકોર્સ પરિસરમાં તોડફોડની કામગીરી ચાલી રહી હોવાથી લોકોની સુરક્ષાને ધ્યાનમાં રાખીને મસ્જિદનો વીજળી અને પાણીનો પુરવઠો બંધ કરવામાં આવ્યો છે. તેમણે વધુમાં જણાવ્યું હતું કે પરિસરમાં એક મંદિર પણ આવેલું છે અને આ સંબંધમાં પણ અધિકારીઓ પાસેથી માહિતી મેળવવામાં આવશે. જસ્ટિસ અનીશ દયાલની ખંડપીઠે બંને પક્ષોની દલીલો સાંભળ્યા બાદ કેન્દ્ર સરકારના L&DO અને દિલ્હી વક્ફ બોર્ડને નોટિસ પાઠવી છે. કેન્દ્રની મૌખિક ખાતરી અનુસાર, આગામી સુનાવણી સુધી મસ્જિદમાં તોડફોડ કરવામાં આવશે નહીં. હવે ગુરુવારે થનારી સુનાવણીમાં આ મામલે આગળની કાર્યવાહી અંગે ચર્ચા થશે.