કર્ણાટક હાઈકોર્ટના ન્યાયાધીશે બેંગલુરુના મુસ્લિમ પ્રભુત્વવાળા વિસ્તારને 'પાકિસ્તાન' કહેતા વિવાદ

જસ્ટિસ વેદવ્યાસાચાર શ્રીશાનંદની બેંગલુરુના ગોરી પાલ્યા વિસ્તાર વિશેની વિવાદાસ્પદ ટિપ્પણી સોશિયલ મીડિયા પ્લેટફોર્મસ પર વ્યાપક ટીકા થઈ છે.

કર્ણાટક હાઈકોર્ટના ન્યાયમૂર્તિ વેદવ્યાસચાર શ્રીશાનંદે બેંગલુરુના એક વિસ્તારને "પાકિસ્તાન" તરીકે વર્ણવીને વિવાદ સર્જ્યો હતો. શહેરના પશ્ચિમ ભાગમાં સ્થિત ગોરી પાલ્યા વિસ્તારમાં વાતચીત દરમિયાન આ ટિપ્પણી થઈ હતી.

મૈસૂર રોડ ફ્લાયઓવર પાસે ટ્રાફિકના મુદ્દાઓ પર ચર્ચા કરતા જસ્ટિસ શ્રીસાનંદે સ્થાનિક પરિસ્થિતિઓ પર પોતાનો અભિપ્રાય વ્યક્ત કર્યો અને કહ્યું, "મૈસૂર રોડ ફ્લાયઓવર પર જાઓ, દરેક ઑટો રિક્ષામાં 10 લોકો હોય છે. ગોરી પાલ્યાથી રોડ પર ટ્રાફિક હોય છે. માર્કેટ મૈસૂર ફ્લાયઓવર પાકિસ્તાનમાં છે, તમે ગમે તેટલા કડક પોલીસ અધિકારીઓને મુકશો ત્યાં મારઝૂડ જ થશે.” તેમના નિવેદનની એક વીડિયો ક્લિપ સોશિયલ મીડિયા પર વાયરલ થઈ રહી છે. ગોરી પાલ્યા વિસ્તાર મુખ્યત્વે મુસ્લિમ સમુદાય ધરાવે છે.

ન્યાયાધીશના શબ્દોએ પ્લેટફોર્મ પર આક્રોશની લહેર ફેલાવી છે, ઘણા યુઝર્સે આ ટિપ્પણીઓની નિંદા કરી છે.