દિલ્હી સાથે મિલ્કીપુર પેટાચૂંટણીમાં ભાજપની ભવ્ય જીત, 61639 મતોથી જીત્યા ભાજપના ચંદ્રભાનુ પાસવાન

Milkipur by-election 2025 : લોકસભા ચૂંટણીમાં ભાજપે અયોધ્યા જિલ્લાની ફૈઝાબાદ લોકસભા બેઠક ગુમાવી દીધી. અહીંથી સપાના અવધેશ પ્રસાદ જીત્યા હતા. તે સમયે અવધેશ પ્રસાદ જિલ્લાની મિલ્કીપુર વિધાનસભા બેઠકના ધારાસભ્ય હતા. આથી લોકસભા જીતવાથી મિલ્કીપુર વિધાનસભા બેઠક ખાલી પડી અને દિલ્હી વિધાનસભા ચૂંટણી સાથે આ બેઠક પર પેટાચૂંટણી યોજાઈ હતી, જેમાં સમાજવાદી પાર્ટીની હાર થઇ છે અને ભાજપની જીત થઇ છે. 

મિલ્કીપુરમાં 61,639 મતોથી જીત્યા ભાજપના ઉમેદવાર ચંદ્રભાનુ પાસવાન

અયોધ્યા જિલ્લાની મિલ્કીપુર બેઠકની પેટાચૂંટણીમાં, ભાજપના ઉમેદવાર ચંદ્રભાનુ પાસવાને સપા ઉમેદવાર અજિત પ્રસાદને 61,639 મતોથી હરાવ્યા છે. 30મા અને અંતિમ રાઉન્ડની ગણતરી બાદ, ભાજપના ઉમેદવારને 1 લાખ 45 હજાર 893 મત મળ્યા જ્યારે સપા ઉમેદવારને 84 હજાર 254 મત મળ્યા. આ રીતે, ભાજપના ઉમેદવાર 61 હજાર 639 મતોના મોટા માર્જિનથી જીત્યા.

મિલ્કીપુરના પરિણામો શું કહે છે?

ભાજપે આ મિલ્કીપુર બેઠકની પેટાચૂંટણીને પ્રતિષ્ઠાનો પ્રશ્ન બનાવી હતી. મુખ્યમંત્રી યોગી આદિત્યનાથ સહિત ઘણા મંત્રીઓ ચૂંટણી વ્યવસ્થાપનમાં રોકાયેલા હતા. આ જીત પછી, ભાજપ એ બતાવવાનો પ્રયાસ કરશે કે અયોધ્યામાં તેની પકડ હજુ પણ મજબૂત છે. ભલે તે સલામત બેઠક હોય. તો  સમાજવાદી પાર્ટી પોતાની હારને ચૂંટણીપંચની બેદરકારી અને વહીવટના દુરુપયોગ સાથે જોડશે.