વિદેશી ફંડિંગના આરોપો પર આશુતોષ રાંકાનો પલટવાર: 'જો ફંડિંગ મળતું હતું તો મંત્રીઓ સાથે બેસીને ચા-નાસ્તો કેમ કરતા હતા?'

કેન્દ્રીય મંત્રી જીતેન્દ્ર સિંહ દ્વારા સીજેપીના નેતાઓને વિદેશથી ફંડ મળવાના આરોપો પર આશુતોષ રાંકાએ આકરા પ્રહારો કર્યા છે. રાંકાએ પત્રકારો સાથે વાતચીતમાં જણાવ્યું હતું કે, 'સરકારના મંત્રીઓ દેશના મૂળ મુદ્દાઓને બાજુ પર મૂકીને માત્ર 12 વર્ષ જૂનો એકને એક એજન્ડા ચલાવી રહ્યા છે. જો તેમને વિદેશી ફંડિંગ મળી રહી હતી, તો મંત્રીઓ તેમની સાથે હાથ કેમ મિલાવતા હતા, વાતચીત કેમ કરતા હતા અને સાથે બેસીને ચા-નાશ્તો કેમ કરતા હતા?'

સરકાર પાસે દેશની વાસ્તવિક સમસ્યાઓનો કોઈ જવાબ નથી

આશુતોષ રાંકાએ સરકારને ઘેરતા કહ્યું કે, 'પાકિસ્તાન, નેપાળ કે બાંગ્લાદેશથી ફંડિંગ મળવાના આક્ષેપો કરીને સરકાર દેશની મુશ્કેલીઓથી ધ્યાન ભટકાવી રહી છે. સરકાર પાસે દેશમાં થઈ રહેલી વોટ ચોરી, ચૂંટણી પંચના અધિકારીઓ, વ્યાપક પેરોલ-પેપર લીક અને બેરોજગારી જેવા ગંભીર પ્રશ્નોનો કોઈ જવાબ નથી. જ્યારે પણ કોઈ આંદોલન શરૂ થાય છે, ત્યારે સરકાર જૂના અને પાયાવિહોણા આક્ષેપો કરવાનું શરૂ કરી દે છે.'મતદાર માહિતી

કેન્દ્રીય મંત્રી જીતેન્દ્ર સિંહ અને અભિજિત દીપકેના આક્ષેપો

ઉલ્લેખનીય છે કે, અગાઉ કેન્દ્રીય મંત્રી જીતેન્દ્ર સિંહે આરોપ લગાવ્યો હતો કે સીજેપીના સંસ્થાપક અભિજિત દીપકેને અમેરિકાથી અને સહ-સંસ્થાપક આશુતોષ રાંકાને પાકિસ્તાનથી ફંડ મળ્યું છે. મંત્રીએ એમ પણ દાવો કર્યો હતો કે વિદેશી તાકાતો અને ભારત વિરોધી સંગઠનો એસઆઈઆર વિરુદ્ધ અભિયાન ચલાવી રહ્યા છે. આ આરોપો સામે પ્રતિક્રિયા આપતા સીજેપીના સંસ્થાપક અભિજિત દીપકેએ પણ સોશિયલ મીડિયા પર પલટવાર કરતા સવાલ કર્યો હતો કે 'સૌરવ'ને ક્યાંથી ફંડ મળી રહ્યું છે અને મંત્રી જીતેન્દ્ર સિંહ પર કટાક્ષ કર્યો હતો.

મહુઆ મોઇત્રાએ ભાજપ પર સાધ્યું નિશાન

આ વિવાદમાં તૃણમૂલ કોંગ્રેસના સાંસદ મહુઆ મોઇત્રા પણ મેદાને આવ્યા છે. તેમણે કેન્દ્રીય મંત્રીના નિવેદનને આડે હાથ લેતા દાવો કર્યો છે કે સીજેપીના કાર્યકર્તાઓએ પોતે કહ્યું છે કે તેમને વિદેશી સ્ત્રોતોથી નહીં, પરંતુ ભારતીય જનતા પાર્ટી તરફથી ચૂંટણી બોન્ડ દ્વારા નાણાં મળ્યા છે. મોઇત્રાએ કટાક્ષ કર્યો હતો કે આશુતોષ રાંકા અને સૌરવ જેવા સભ્યોને ખુદ ભાજપ જ ફંડ આપી રહી છે.