Video: 5,000 વર્ષ જૂનો વારસો અને 10 કરોડ લોકોની રોજગારી! ઇન્ટરનેશનલ ટ્રેડ ફેરમાં કેન્દ્રીય મંત્રી ગિરિરાજ સિંહે શું કરી મોટી જાહેરાત?

નવી દિલ્હીના ભારત મંડપમ ખાતે આયોજિત 45મા ભારત આંતરરાષ્ટ્રીય વેપાર મેળામાં (India International Trade Fair - IITF) કેન્દ્રીય કાપડ મંત્રી ગિરિરાજ સિંહે હાથશાળ (હેન્ડલૂમ) અને હસ્તકલા (હેન્ડીક્રાફ્ટ) ના વિશેષ પ્રદર્શન-સહ-વેચાણનું ઉદ્ઘાટન કર્યું હતું. આ પ્રસંગે તેમણે દેશના પરંપરાગત વણાટકામ, હસ્તકલા અને શણ (જ્યુટ) ઉદ્યોગના આર્થિક તેમજ સાંસ્કૃતિક મહત્ત્વ પર ભાર મૂક્યો હતો.
'વિકાસ પણ અને વિરાસત પણ' થીમ પર વિશેષ ભાર
ઉદ્ઘાટન બાદ મીડિયા સાથે વાતચીત કરતા કેન્દ્રીય મંત્રી ગિરિરાજ સિંહે જણાવ્યું હતું કે, "આ વર્ષના ટ્રેડ ફેરની થીમ અત્યંત મહત્ત્વપૂર્ણ છે: 'વિકાસ પણ અને વિરાસત પણ' — આપણો વિકાસ આપણા સમૃદ્ધ વારસાના મૂળ સાથે જોડાયેલો છે." તેમણે ઉમેર્યું હતું કે હાથશાળ, હસ્તકલા અને શણ ક્ષેત્ર એ 5,000 વર્ષ જૂના ભવ્ય વારસાનું પ્રતિનિધિત્વ કરે છે.
10 કરોડ લોકોની આજીવિકાનો મુખ્ય આધાર
દેશના અર્થતંત્રમાં આ ક્ષેત્રોના યોગદાન અંગે વાત કરતા મંત્રીએ કહ્યું કે, નિકાસથી લઈને સ્થાનિક બજાર સુધી આ ઉદ્યોગો આપણા વિકાસમાં નિર્ણાયક ભૂમિકા ભજવે છે. ગ્રામીણ ખેડૂતોથી લઈને શ્રમિકો સુધી વિશાળ સંખ્યામાં લોકોને આ ક્ષેત્રો રોજગારી પૂરી પાડે છે; હકીકતમાં અંદાજે 10 કરોડ લોકો આ ક્ષેત્રો સાથે સીધા કે આડકતરી રીતે સંકળાયેલા છે. આ ઉપરાંત, એકલા શણ (જ્યુટ) ઉદ્યોગ પર પણ લાખો લોકોની આજીવિકા નિર્ભર છે.
અંતમાં, ગિરિરાજ સિંહે કારીગરો અને વણકરોને પ્રોત્સાહન આપતા વિશ્વાસ વ્યક્ત કર્યો હતો કે હાથશાળ અને હસ્તકલા આપણા વિકાસ અને વારસા બંનેમાં અપાર યોગદાન આપે છે, અને તેમને આશા છે કે આ વર્ષે વેપાર મેળામાં આ ઉત્પાદનોનું વેચાણ નવી ઊંચાઈઓ સર કરશે.











