VIDEO: રાજકોટ મનપા ચૂંટણી! 18 વોર્ડની 72 બેઠકો માટે તંત્ર સજ્જ, ઉમેદવારોની હાજરીમાં EVMના બટન ચેક કરી કરાયા સીલ
છેલ્લું અપડેટ : 21 Apr 2026
VIDEO: રાજકોટ મહાનગરપાલિકાની આગામી ચૂંટણીને લઈને રાજકીય ગરમાવો તો વધી જ રહ્યો છે, પરંતુ તેની સાથે વહીવટી વિભાગ પણ હવે ફુલ એક્શન મોડમાં આવી ગયું છે. શહેરના 18 વોર્ડની કુલ 72 બેઠકો પર યોજાનારા મતદાન માટે વહીવટી તંત્ર દ્વારા તમામ તૈયારીઓ પૂર્ણ કરી દેવામાં આવી છે.
મતદાન મથકો અને સેન્ટરોનું આયોજન
રાજકોટમાં આ વખતની ચૂંટણી માટે કુલ 1014 મતદાન મથકો ઊભા કરવામાં આવ્યા છે. મતદાન પ્રક્રિયા અને EVM વ્યવસ્થાપન માટે શહેરમાં અલગ-અલગ 6 EVM સેન્ટર કાર્યરત કરવામાં આવ્યા છે. ખાસ વાત એ છે કે, વહીવટી સરળતા માટે એક સેન્ટરમાં ત્રણ વોર્ડનો સમાવેશ કરવામાં આવ્યો છે, જેથી કામગીરીમાં ઝડપ અને સચોટતા જળવાઈ રહે.
EVM ચેકિંગની પારદર્શક પ્રક્રિયા
રાજકોટના મામલતદાર નિતેશ પી. પડયાના માર્ગદર્શન હેઠળ આજે EVM ચેકિંગની મહત્વપૂર્ણ કામગીરી હાથ ધરવામાં આવી હતી. આ પ્રક્રિયા દરમિયાન પક્ષપાત કે ગેરરીતિની કોઈ આશંકા ન રહે તે માટે દરેક વોર્ડના ઉમેદવારો અને તેમના અધિકૃત એજન્ટોને ખાસ હાજર રાખવામાં આવ્યા હતા. ઉમેદવારોની નજર સામે જ EVM માં લાગેલા તમામ બટન બરાબર ચાલુ છે કે નહીં તેનું પ્રત્યક્ષ પરીક્ષણ કરવામાં આવ્યું હતું.
ખામીવાળા EVM અલગ કરાયા
ચેકિંગ દરમિયાન જે મશીનોમાં ટેકનિકલ ખામી જણાઈ હતી, તેવા EVM ને તુરંત સાઈડમાં કરી દેવામાં આવ્યા હતા અને માત્ર સંપૂર્ણ કાર્યરત મશીનોને જ ઉમેદવારોની સહી-સિક્કા સાથે સીલ કરવામાં આવ્યા હતા. આ પ્રક્રિયા બાદ તમામ ઉમેદવારોએ વહીવટી તંત્રની કામગીરી પર સંતોષ વ્યક્ત કર્યો હતો.
સત્તાવાર નિવેદન
રાજકોટના મામલતદાર નિતેશ પી. પડયાએ જણાવ્યું હતું કે, "ચૂંટણી પ્રક્રિયા સંપૂર્ણપણે નિષ્પક્ષ અને પારદર્શક રહે તે માટે અમે કટિબદ્ધ છીએ. ઉમેદવારોની હાજરીમાં જ તમામ EVM ચેક કરી સીલ કરવામાં આવ્યા છે, જેથી મતદાનના દિવસે કોઈ ટેકનિકલ સમસ્યા સર્જાય નહીં."