VIDEO: રાજકોટના જેતપુરમાં ગોઝારો અકસ્માત! દર્શન કરવા જઈ રહેલા દાદા-પૌત્રનું મોત, કારચાલક સામે ગુનો દાખ
છેલ્લું અપડેટ : 21 Apr 2026
VIDEO: રાજકોટ જિલ્લાના જેતપુર હાઈવે પર આજે ફરી એકવાર ભીષણ અકસ્માતની ઘટના સામે આવી હતી. જેતપુરની રબારિકા ચોકડી પાસે કાર અને બાઈક વચ્ચે સર્જાયેલા ગોઝારા અકસ્માતમાં બાઈક પર સવાર દાદા અને પૌત્રના ઘટનાસ્થળે જ કમકમાટીભર્યા મોત નિપજ્યા છે. આ અકસ્માત એટલો ભયાનક હતો કે બાઈકનો કચ્ચરઘાણ નીકળી ગયો હતો.
જાણો આખો મામલો
મળતી માહિતી મુજબ, જેતપુર વિસ્તારમાં રહેતા દાદા અને તેમના પૌત્ર આજે સવારે બાઈક પર સવાર થઈને જાણીતા ધારેશ્વર સૂર્ય મંદિરે દર્શન કરવા માટે જઈ રહ્યા હતા. તેઓ જ્યારે રબારિકા ચોકડી પાસેથી પસાર થઈ રહ્યા હતા, ત્યારે પૂરપાટ ઝડપે આવી રહેલી એક કારે બાઈકને જોરદાર ટક્કર મારી હતી. ટક્કર એટલી જોરદાર હતી કે બંને હવામાં ફંગોળાયા હતા અને ગંભીર ઈજાઓ થવાને કારણે દાદા અને પૌત્ર બંનેએ ઘટનાસ્થળે જ અંતિમ શ્વાસ લીધા હતા.
પોલીસ કાર્યવાહી
અકસ્માતની જાણ થતા જ આસપાસનાં લોકો દોડી આવ્યા હતા અને તાત્કાલિક પોલીસને જાણ કરી હતી. જેતપુર ઉદ્યોગનગર પોલીસનો કાફલો ઘટનાસ્થળે પહોંચી ગયો હતો અને બંને મૃતદેહોને પીએમ અર્થે ખસેડવાની તજવીજ હાથ ધરી હતી. પોલીસે કારચાલક સામે ગુનો નોંધી તેની અટકાયત કરવાની કાયદેસરની કાર્યવાહી શરૂ કરી છે.
પરિવારમાં શોકનો માહોલ
શ્રદ્ધા સાથે ભગવાનના દર્શન કરવા નીકળેલા દાદા-પૌત્રને રસ્તામાં જ કાળ આંબી જતાં પરિવાર પર આભ ફાટી પડ્યું છે. આ ઘટનાને પગલે જેતપુર પંથકમાં અને ખાસ કરીને મૃતકોના પરિવારમાં ભારે શોકની લાગણી છવાઈ ગઈ છે. હાઈવે પર સતત વધતા અકસ્માતોને લઈને સ્થાનિકોમાં પણ રોષ જોવા મળી રહ્યો છે.
