VIDEO: નર્મદાના દેડિયાપાડામાં કાર અને ટ્રક વચ્ચે ગોઝારો અકસ્માત, 2 મિત્રોના મોત, 5 ઈજાગ્રસ્ત
છેલ્લું અપડેટ : 03 May 2026
VIDEO: નર્મદા જિલ્લાના દેડિયાપાડા તાલુકાના મેડિયાસાગ અને કાલબી ગામ વચ્ચેના માર્ગ પર આજે એક અત્યંત ગમખ્વાર અકસ્માત સર્જાયો હતો. પુરપાટ ઝડપે આવી રહેલી એક કાર અને ટ્રક વચ્ચે થયેલી ભીષણ ટક્કરમાં કારનો કચ્ચરઘાણ નીકળી ગયો હતો. આ દુર્ઘટનામાં કારમાં સવાર બે વ્યક્તિઓના કમકમાટીભર્યા મોત નિપજ્યા છે.
શું હતી આખી ઘટના?
મળતી માહિતી અનુસાર, કારમાં કુલ 7 લોકો સવાર હતા. અકસ્માત એટલો ભયાનક હતો કે કારમાં સવાર બે મુસાફરોના ઘટનાસ્થળે જ પ્રાણ પંખેરુ ઉડી ગયા હતા. મૃતકોની ઓળખ ભરૂચના વતની કૌશિક પરમાર અને મહેન્દ્ર પટેલ તરીકે કરવામાં આવી છે. આ ઘટનાને પગલે સ્થાનિક લોકોના ટોળાં ઉમટી પડ્યા હતા અને વાતાવરણમાં ગમગીની છવાઈ ગઈ હતી.
ઈજાગ્રસ્તોની હાલત અને પોલીસ તપાસ
કારમાં સવાર અન્ય પાંચ વ્યક્તિઓને આ અકસ્માતમાં સામાન્ય ઇજાઓ પહોંચી છે. તમામ ઇજાગ્રસ્તોને તાત્કાલિક અસરથી સારવાર અર્થે દેડિયાપાડાની સરકારી હોસ્પિટલમાં ખસેડવામાં આવ્યા હતા. અકસ્માતની જાણ થતા જ સ્થાનિક પોલીસનો કાફલો ઘટનાસ્થળે પહોંચી ગયો હતો અને મૃતદેહોને પોસ્ટમોર્ટમ માટે ખસેડી આગળની કાયદેસરની તપાસ હાથ ધરી છે.
