ગિરનારની લીલી પરિક્રમા પહેલાં જળસંકટની ચિંતા, બોર કર્યા છતાં પાણી ન મળ્યું!

ગિરનારની લીલી પરિક્રમા પહેલાં જ ગાઢ જંગલ વિસ્તારમાં જળસંકટની સ્થિતિ સર્જાતાં તંત્રની ચિંતા વધી છે. આ વર્ષે ચોમાસું સારું ન રહેતાં જંગલના અનેક કુદરતી પાણીના પોઇન્ટ સુકાઈ ગયા છે. બીજી તરફ, પાણીની શોધમાં બોર કરવામાં આવ્યા હોવા છતાં પાણી નહીં મળતાં લાખો પરિક્રમાર્થીઓ માટે પીવાના પાણીની વ્યવસ્થા કરવી તંત્ર માટે મોટો પડકાર બન્યો છે.

વૈકલ્પિક વ્યવસ્થાનું આયોજન

પરિસ્થિતિને ધ્યાનમાં રાખીને વનવિભાગ અને પાણી પુરવઠા વિભાગ દ્વારા વૈકલ્પિક વ્યવસ્થાનું આયોજન કરવામાં આવી રહ્યું છે. જરૂરિયાત મુજબ ટેન્કર મારફતે પાણી પહોંચાડવામાં આવશે. આ ઉપરાંત, પરિક્રમાના માર્ગમાં યાત્રિકો માટે પીવાના પાણીના પોઇન્ટ ઊભા કરવામાં આવશે. વન્યજીવોને પણ પાણીની અછત ન પડે તે માટે જંગલમાં આવેલા પાણીના પોઇન્ટ ભરવાની વ્યવસ્થા કરવામાં આવશે.

પાણીના વધુ પોઇન્ટ ઊભા કરવા માટે પાણી પુરવઠા વિભાગ સાથે પણ સંકલન કરવામાં આવી રહ્યું છે. જોકે, વનવિભાગના અધિકારીના જણાવ્યા અનુસાર પરિક્રમા દરમિયાન યાત્રિકોને પીવાના પાણીની કોઈ સમસ્યા નહીં રહે તે માટે જરૂરી વ્યવસ્થા કરવામાં આવશે.