Gandhinagar news: વન વિભાગમાં મોટો વહીવટી ફેરબદલ, 365 RFOની સામૂહિક બદલીના આદેશ
છેલ્લું અપડેટ : 30 Mar 2026
ગુજરાત સરકારના વન અને પર્યાવરણ વિભાગ દ્વારા રાજ્યભરમાં ફરજ બજાવતા વર્ગ-2ના રેન્જ ફોરેસ્ટ ઓફિસર(RFO)ની મોટાપાયે બદલીના આદેશો જારી કરવામાં આવ્યા છે. બહાર પાડવામાં આવેલી આ યાદીમાં 365 અધિકારીઓના નામ સામેલ છે.
365થી વધુ RFOની સામૂહિક બદલી
આ સત્તાવાર સૂચના અનુસાર, રાજ્યના વિવિધ વન વિભાગોમાં કાર્યરત અધિકારીઓની સામૂહિક બદલી કરવામાં આવી છે. વન અને પર્યાવરણ વિભાગના નાયબ સચિવ(સેવા) આસવ ગઢવીના હસ્તાક્ષર હેઠળ બહાર પાડવામાં આવેલી આ યાદીમાં 365 અધિકારીઓના નામ સામેલ છે.
વિજયનગર રેંજમાંથી દશરથજી મકવાણાની હિંમતનગર વિસ્તરણ રેંજમાં અને પોશીના રેંજમાંથી દીપકકુમાર નિનામાની વનીકરણ મહેસાણા ખાતે બદલી કરવામાં આવી છે. સુરેન્દ્રનગરના વઢવાણ રેંજમાંથી મનુભાઈ મેરની મૂળી વિસ્તરણ રેંજમાં બદલી થઈ છે, જ્યારે મોરબી રેંજના જયદીપસિંહ જાડેજાને રાજકોટ સામાજિક વનીકરણમાં મૂકવામાં આવ્યા છે. ડાંગ અને વલસાડ જિલ્લાના અનેક અધિકારીઓની પણ ફેરબદલ કરવામાં આવી છે. આહવા (પશ્ચિમ) રેંજના વિનયકુમાર પવારની ચીખલી વિસ્તરણ રેંજમાં બદલી કરવામાં આવી છે.
