VIDEO: વડોદરામાં ડ્રેનેજ પ્રોજેક્ટની સમીક્ષા: મ્યુનિસિપલ કમિશનરની કડક સૂચના, બેદરકારી ચલાવી લેવાશે નહીં

વડોદરા શહેરમાં ચાલી રહેલા ડ્રેનેજ પ્રોજેક્ટના કામોની ગુણવત્તા અને ઝડપને સુનિશ્ચિત કરવા મ્યુનિસિપલ કમિશનર અરુણ મહેશ બાબુએ મેદાનમાં ઉતરીને સ્થળ નિરીક્ષણ કર્યું હતું. કમિશનરે ગોત્રીની GMERS હોસ્પિટલ, ગાંધીનગર ગૃહ અને ખોડિયારનગર ચાર રસ્તા જેવા મહત્વના વિસ્તારોની મુલાકાત લીધી હતી. આ દરમિયાન તેમણે અધિકારીઓ પાસેથી પ્રોજેક્ટની વર્તમાન સ્થિતિ અંગે વિગતવાર માહિતી મેળવી હતી. કમિશનરે સ્પષ્ટ શબ્દોમાં જણાવ્યું હતું કે, વિકાસના કામોમાં કોઈપણ પ્રકારની બેદરકારી સહન કરવામાં આવશે નહીં. તમામ કામગીરી નિર્ધારિત સમયમર્યાદામાં અને સુરક્ષાના તમામ ધોરણોનું પાલન કરીને પૂર્ણ કરવા પર તેમણે વિશેષ ભાર મૂક્યો હતો. સાથે જ, નાગરિકોને કામ દરમિયાન ઓછામાં ઓછી અસુવિધા પડે તેવી વ્યવસ્થા કરવા સૂચના આપી હતી. આ પ્રોજેક્ટ વડોદરાના ડ્રેનેજ પ્રશ્નોના કાયમી ઉકેલ માટે મહત્વનો માનવામાં આવી રહ્યો છે. તંત્ર દ્વારા હવે નિયમિત મોનિટરિંગ કરવામાં આવશે, જેથી શહેરીજનોને વધુ સારી માળખાકીય સુવિધાઓ મળી રહે.