VIDEO: દાહોદમાં લોકશાહી લજવાઈ! સંજેલીમાં AAP ઉમેદવારના પતિનું અપહરણ કરી ઢોરમાર માર્યાનો આક્ષેપ, વિસ્તારમાં ભારેલા અગ્નિ જેવી સ્થિતિ
છેલ્લું અપડેટ : 26 Apr 2026
VIDEO: ગુજરાતમાં આજે ચાલી રહેલી સ્થાનિક સ્વરાજ્યની ચૂંટણીના મતદાન વચ્ચે દાહોદ જિલ્લાના સંજેલી તાલુકામાંથી હિંસાના ગંભીર સમાચાર મળી રહ્યા છે. સંજેલીની મોલી બેઠક પરથી ચૂંટણી લડી રહેલા આમ આદમી પાર્ટી ના ઉમેદવારના પતિનું અપહરણ કરી તેમને નિર્મમ રીતે માર મારવામાં આવ્યો હોવાનો આક્ષેપ થતા ખળભળાટ મચી ગયો છે.
અપહરણ અને અત્યાચારના ગંભીર આક્ષેપ
આમ આદમી પાર્ટીના નેતા અલ્પેશ ચારેલ દ્વારા કરવામાં આવેલા આક્ષેપ મુજબ, મોલી સીટના 'આપ' ઉમેદવારના પતિને ગત રાત્રે અજાણ્યા શખ્સો દ્વારા કિડનેપ કરવામાં આવ્યા હતા. તેમને કોઈ અજ્ઞાત સ્થળે લઈ જઈ, હાથ-પગ બાંધીને ઢોરમાર મારવામાં આવ્યો હતો. આ હુમલા પાછળ રાજકીય ઈર્ષ્યા અને ડર હોવાનું પ્રાથમિક દ્રષ્ટિએ જણાઈ રહ્યું છે.
ફોર્મ પાછું ખેંચવા અપાયું હતું દબાણ
'આપ'ના નેતાએ વધુમાં જણાવ્યું હતું કે, ચૂંટણીની પ્રક્રિયા શરૂ થઈ ત્યારથી જ ઉમેદવાર પર ફોર્મ પાછું ખેંચવા માટે સતત દબાણ કરવામાં આવતું હતું. એટલું જ નહીં, વિસ્તારમાં પ્રચાર કરવા માટે પણ તેમને પરવાનગી આપવામાં આવતી નહોતી અને જાનથી મારી નાખવાની ધમકીઓ પણ આપવામાં આવતી હતી. આ તમામ અવરોધો છતાં જ્યારે ઉમેદવાર મક્કમ રહ્યા, ત્યારે તેમના પતિને નિશાન બનાવવામાં આવ્યા હોવાનો આક્ષેપ છે.
જનતા આપશે જવાબ
હુમલાની આ ઘટના બાદ મોલી અને તેની આસપાસના ગ્રામ્ય વિસ્તારોના લોકોમાં ભારે રોષ જોવા મળી રહ્યો છે. અલ્પેશ ચારેલે દાવો કર્યો છે કે, લોકશાહીના પર્વમાં આ પ્રકારે હિંસા ફેલાવનારા તત્વોને મોલી અને આસપાસના ગામના લોકો મતદાન દ્વારા યોગ્ય જવાબ આપશે. હાલમાં ઈજાગ્રસ્તને સારવાર માટે હોસ્પિટલ ખસેડવામાં આવ્યા છે અને પોલીસ તપાસ તેજ કરવામાં આવી છે.