છોટા ઉદેપુર જિલ્લામાં સરકારી કાર્યક્રમમાં જ ભાજપ-AAPના નેતાઓ બાખડી પડ્યા; રાજકીય ખેંચતાણથી ગરમાયો માહોલ
છેલ્લું અપડેટ : 09 Oct 2026
છોટા ઉદેપુર જિલ્લાના નસવાડી તાલુકાના કુકરદા ગામે યોજાયેલા સેવા સેતુના કાર્યક્રમમાં ભાજપના નેતાઓ અને આમ આદમી પાર્ટીના નેતાઓ આમનેસામને આવી જતાં રાજકીય ગરમાવો જોવા મળ્યો હતો. કાર્યક્રમ દરમિયાન છોટા ઉદેપુર જિલ્લા પંચાયત સભ્યના પતિએ ઊભા થઈને આક્રમક અંદાજમાં રજૂઆત કરતાં કાર્યક્રમમાં હાજર ભાજપના નેતાઓ મુશ્કેલીમાં મુકાયા હતા.
કુકરદામાં સરકારી કાર્યક્રમમાં ભાજપ-APPના નેતાઓ આમનેસામને
સેવા સેતુના કાર્યક્રમોમાં ચૂંટાયેલા પ્રતિનિધિઓને સ્ટેજ પર યોગ્ય સ્થાન આપવામાં આવતું ન હોવા સામે પણ સવાલો ઊભા થયા હતા. બીજી તરફ, રાજકીય પક્ષોના હોદ્દેદારો સરકારી કાર્યક્રમોમાં હાજર રહેતા હોવાને કારણે સરકારી કાર્યક્રમોમાં રાજકીય પ્રભાવ અંગે પણ ચર્ચા શરૂ થઈ છે.
આદિવાસી વિસ્તાર ગણાતા છોટા ઉદેપુર જિલ્લામાં આજે પણ શાળાઓ, આંગણવાડીઓ, રસ્તાઓ, નેટવર્ક અને અન્ય પાયાની સુવિધાઓને લગતી અનેક સમસ્યાઓ છે. એક તરફ સેવા સેતુના કાર્યક્રમોમાં સરકાર દ્વારા ગામડાં સુધી વિવિધ સુવિધાઓ પહોંચાડવામાં આવતી હોવાની વાતો કરવામાં આવે છે, તો બીજી તરફ આધારકાર્ડમાં સુધારા જેવી કામગીરી માટે પણ લોકોને નેટવર્કની સમસ્યાનો સામનો કરવો પડી રહ્યો છે.
નેટવર્કની સમસ્યાને કારણે આધારકાર્ડ સુધારાની કામગીરીમાં હાલાકી
કુકરદા ખાતેના કાર્યક્રમમાં નેટવર્કની સમસ્યાને કારણે આધારકાર્ડ સુધારાની કામગીરી ન થઈ શકતી હોવાનો મુદ્દો સામે આવ્યો હતો. આ દરમિયાન જિલ્લા ભાજપના પૂર્વ પ્રમુખે પણ સ્ટેજ પરથી નેટવર્કની સમસ્યા હોય તો કામગીરી થઈ શકે નહીં તેવી વાત સ્વીકારી હતી.
આ ઘટનાને પગલે સરકારી કાર્યક્રમોમાં સ્થાનિક સમસ્યાઓ અને જનતાના પ્રશ્નો અંગે જવાબદારી નક્કી કરવાની માગ ઊભી થઈ રહી છે. સેવા સેતુના કાર્યક્રમમાં જ પાયાની સુવિધાઓના પ્રશ્નો સામે આવતાં તંત્રની કામગીરી સામે પણ સવાલો ઊભા થયા છે.
છોટા ઉદેપુર જિલ્લામાં સરકારી કાર્યક્રમો દરમિયાન રાજકીય વિરોધના સૂર ઊઠવા લાગ્યા છે. નસવાડી તાલુકાના કુકરદા ગામેથી શરૂ થયેલી આ ચર્ચા આગામી દિવસોમાં અન્ય ગામડાંઓ સુધી પહોંચે છે કે કેમ, તેના પર સૌની નજર રહેશે.
ભાજપ અને આમ આદમી પાર્ટી વચ્ચે રાજકીય ટક્કર
આગામી સમયમાં વિધાનસભાની ચૂંટણી નજીક આવવાની સાથે ભાજપ અને આમ આદમી પાર્ટી વચ્ચે રાજકીય ટક્કર વધુ તેજ બનવાની શક્યતા છે. સરકારી કાર્યક્રમોમાં જ બંને પક્ષના નેતાઓ આમનેસામને આવી રહ્યા છે ત્યારે આદિવાસી વિસ્તારના મતદારોના પ્રશ્નો અને તેમની નારાજગી આગામી ચૂંટણીમાં કેવો રાજકીય પ્રભાવ પાડશે, તે જોવું રસપ્રદ રહેશે.
હાલ કુકરદા ખાતેના સેવા સેતુના કાર્યક્રમમાં ઊભા થયેલા પ્રશ્નોએ રાજકીય ચર્ચા જગાવી છે. હવે જોવાનું એ રહેશે કે તંત્ર લોકોની સમસ્યાઓનું નિરાકરણ લાવે છે કે પછી આવા કાર્યક્રમોમાં રાજકીય સામસામેની સ્થિતિ વધુ વકરે છે.
