VIDEO: ભારતમાં હવે ફોર્મ્યુલા વનનો ક્રેઝ! મુંબઈ ફાલ્કન્સ લાવ્યું રેસિંગ ચેમ્પિયનશિપ, ક્રિકેટર શ્રેયસ ઐયર બન્યા બ્રાન્ડ એમ્બેસેડર
છેલ્લું અપડેટ : 30 Apr 2026
VIDEO: વિદેશમાં અત્યંત લોકપ્રિય એવી રેસિંગ ચેમ્પિયનશિપ હવે ભારતમાં પણ પોતાનું સ્થાન જમાવવા જઈ રહી છે. મુંબઈ ફાલ્કન્સ દ્વારા ભારતમાં રેસિંગ પ્રતિભાઓને પ્રોત્સાહન આપવા માટે એક નવા અધ્યાયની શરૂઆત કરવામાં આવી છે. આ રાષ્ટ્રીય સ્તરની સ્પર્ધામાં જુનિયર અને સિનિયર એમ બંને ફોર્મેટનો સમાવેશ કરવામાં આવશે, જે ભારતીય મોટરસ્પોર્ટ્સ માટે એક માઇલસ્ટોન સાબિત થશે.
શ્રેયસ ઐયર બન્યા બ્રાન્ડ એમ્બેસેડર
મુંબઈ ફાલ્કન્સ દ્વારા ફોર્મ્યુલા વન (F1) સિમ રેસિંગ ચેમ્પિયનશિપ માટે ભારતીય સ્ટાર ક્રિકેટર શ્રેયસ ઐયરને સત્તાવાર બ્રાન્ડ એમ્બેસેડર તરીકે નિયુક્ત કરવામાં આવ્યા છે. આ પ્રસંગે શ્રેયસ ઐયરે જણાવ્યું હતું કે, "મને કાર ચલાવવાનો અને સ્પીડનો પહેલેથી જ શોખ છે, તેથી આ ક્ષેત્રમાં જોડાઈને હું ખૂબ જ ઉત્સાહિત છું." આ પહેલથી ભારતમાં રેસિંગ ચેમ્પિયનશિપ પ્રત્યે લોકોની રુચિ વધશે અને ભવિષ્યની સંભાવનાઓ માટે એક સચોટ માર્ગ તૈયાર થશે.
ચેમ્પિયનશિપનું માળખું અને રજિસ્ટ્રેશન
આ ચેમ્પિયનશિપ ફોર્મ્યુલા 1 ની સત્તાવાર ગેમ પર રમાશે. તેની કેટલીક મહત્વની વિગતો નીચે મુજબ છે:
રજિસ્ટ્રેશન: 30 એપ્રિલ 2026 થી શરૂ કરવામાં આવશે.
ઉપલબ્ધતા: રજિસ્ટ્રેશન પ્લેસ્ટોર અને એપ સ્ટોર પર સરળતાથી ઉપલબ્ધ રહેશે.
પસંદગી પ્રક્રિયા: આવનારા મહિનાઓમાં ક્વોલિફાયર રાઉન્ડ યોજાશે, ત્યારબાદ સિમ્યુલેટર રાઉન્ડ લેવામાં આવશે.
ગ્રાન્ડ ફાઈનલ: નવેમ્બર માસમાં મુંબઈ ખાતે રાષ્ટ્રીય ફાઈનલ યોજાશે.
મુંબઈ ફાલ્કન્સના એમડી અમિત ગઢોકે જણાવ્યું હતું કે આ દેશનો સૌથી મહત્વકાંક્ષી નેશનલ પ્રોજેક્ટ ગણાશે, જે ભારતમાં ઈ-સ્પોર્ટ્સ અને રેસિંગના સમન્વયને નવી ઊંચાઈ પર લઈ જશે.
