VIDEO: અમદાવાદ મનપા ચૂંટણી! લોકશાહીના જંગમાં 'લક્ષ્મી'નો દબદબો, જાણો કોણ છે સૌથી ધનિક ઉમેદવારો
છેલ્લું અપડેટ : 16 Apr 2026
VIDEO: અમદાવાદ મહાનગરપાલિકાની ચૂંટણીનું રણશિંગું વાગી ચૂક્યું છે. ઉમેદવારી ફોર્મ ભરાઈ ગયા બાદ હવે ચિત્ર સ્પષ્ટ થયું છે કે આ વખતની ચૂંટણી માત્ર જનસેવાની જ નહીં, પણ 'મની પાવર'ની પણ બની રહેશે. ઉમેદવારો દ્વારા રજૂ કરવામાં આવેલી એફિડેવિટના વિશ્લેષણ મુજબ, ટોપ-10 ધનિક ઉમેદવારોની યાદીમાં ભાજપનું વર્ચસ્વ જોવા મળી રહ્યું છે.
ધનકુબેર ઉમેદવારોમાં ભાજપનો એકહથ્થું શાસન
અમદાવાદ મનપાના ચૂંટણી જંગમાં ઉતરેલા 10 સૌથી વધુ સંપત્તિ ધરાવતા ઉમેદવારોનું એનાલિસિસ કરતાં ચોંકાવનારી વિગતો સામે આવી છે. આ યાદીમાં 9 ઉમેદવારો ભારતીય જનતા પાર્ટીના છે, જ્યારે માત્ર 1 ઉમેદવાર કોંગ્રેસના કરોડપતિઓની યાદીમાં સ્થાન મેળવી શક્યા છે.
થલતેજમાં સૌથી મોટો 'ખજાનો'
યાદીમાં સૌથી પ્રથમ નંબરે થલતેજ વોર્ડના ભાજપના ઉમેદવાર હિતેશ બારોટ છે, જેમની પાસે 109 કરોડ રૂપિયાથી વધુની સંપત્તિ છે. આ આંકડો દર્શાવે છે કે અમદાવાદના પશ્ચિમ વિસ્તારમાં સંપત્તિવાન ઉમેદવારોનો દબદબો છે. બીજા ક્રમે મણિનગર વોર્ડના વિપુલ સેવક છે, જેઓ 60.82 કરોડની સંપત્તિ ધરાવે છે.
| ક્રમ | ઉમેદવારનું નામ | વોર્ડ | પક્ષ | સંપત્તિ (અંદાજે) |
| 1 | હિતેશ બારોટ | થલતેજ | ભાજપ | 109 કરોડ |
| 2 | વિપુલ સેવક | મણિનગર | ભાજપ | 60.82 કરોડ |
| 3 | અતૂલ મિશ્રા | ચાંદખેડા | ભાજપ | 37.92 કરોડ |
| 4 | યશકુમાર જાદવ | ચાંદખેડા | ભાજપ | 29 કરોડ |
| 5 | શાકીર હુસેન શેખ | મકતમપુરા | કોંગ્રેસ | 21.60 કરોડ |
| 6 | તેજેન્દ્ર ચૌહાણ | અમરાઈવાડી | ભાજપ | 16.80 કરોડ |
| 7 | વિનોદચંદ્ર પટેલ | જોધપુર | ભાજપ | 11.86 કરોડ |
| 8 | મૌલિક પટેલ | ઈસનપુર | ભાજપ | 7 કરોડથી વધુ |
| 9 | ધરમશી દેસાઈ | બોડકદેવ | ભાજપ | 5.20 કરોડ |
| 10 | જીતેન્દ્ર ચૌહાણ | શાહપુર | ભાજપ | 4.40 કરોડ |
રાજકીય વિશ્લેષણ: શું પૈસો જ જીત અપાવશે?
ચૂંટણીમાં 'મની અને મસલ પાવર' હંમેશા ચર્ચાનો વિષય રહ્યો છે. જ્યારે મોટા ગજાના ઉદ્યોગપતિઓ કે આર્થિક રીતે સક્ષમ ઉમેદવારો મેદાનમાં હોય છે, ત્યારે પ્રચારમાં થતો ખર્ચ અને મતદારો પરની તેની અસર વિશે વિપક્ષો સવાલો ઉઠાવતા હોય છે. કોંગ્રેસ તરફથી એકમાત્ર શાકીર હુસેન શેખ (મકતમપુરા) આ યાદીમાં છે, જે દર્શાવે છે કે ભાજપે આ વખતે આર્થિક રીતે મજબૂત પ્રોફાઇલ ધરાવતા ઉમેદવારો પર વધુ ભરોસો મૂક્યો છે.