VIDEO: ગુજરાત યુનિવર્સિટી રાજ્યની પ્રથમ ઓટોનોમસ યુનિવર્સિટી બની, હવે વિદેશમાં કેમ્પસ સ્થાપશે
છેલ્લું અપડેટ : 05 Aug 2026
ગુજરાત યુનિવર્સિટી માટે એક અત્યંત મહત્ત્વપૂર્ણ અને ગર્વની ક્ષણ સામે આવી છે. યુનિવર્સિટી ગ્રાન્ટ્સ કમિશન (UGC) દ્વારા ગુજરાત યુનિવર્સિટીને ગ્રેડ-2 ઓટોનોમીનો દરજ્જો સત્તાવાર રીતે આપવામાં આવ્યો છે. આ સિદ્ધિ સાથે ગુજરાત યુનિવર્સિટી આ પ્રકારે ઓટોનોમી મેળવનારી રાજ્યની પ્રથમ સરકારી યુનિવર્સિટી બની ગઈ છે. જે ઉચ્ચ શિક્ષણ ક્ષેત્રે એક મોટો અને ઐતિહાસિક માઈલસ્ટોન સાબિત થશે. આ દરજ્જો મળવાથી સંસ્થાની શૈક્ષણિક અને પ્રશાસનિક ક્ષમતામાં વધુ વધારો થશે.
નવા શૈક્ષણિક નિર્ણયો લેવાની સ્વતંત્રતા
ગુજરાત યુનિવર્સિટીના પ્રથમ મહિલા કુલપતિ રહી ચૂકેલા ડૉ. નિરાજા ગુપ્તા દ્વારા આ ઓટોનોમી માટે ખાસ દરખાસ્ત કરવામાં આવી હતી, જેને મંજૂરી મળતા હવે યુનિવર્સિટી પોતાના સ્તરે મોટા અને સ્વતંત્ર નિર્ણયો લઈ શકશે. આ દરજ્જો મળવાથી યુનિ. હવે પોતાના અદ્યતન સ્કિલ કોર્સીસ શરૂ કરી શકશે તેમજ વિદેશી ફેકલ્ટી (ફોરેન ફેકલ્ટી) ની પણ નિમણૂક કરી શકશે. આ ઉપરાંત, ઓફ કેમ્પસથી માંડીને પોતાના શૈક્ષણિક પ્રોગ્રામ્સ પણ હવે સંપૂર્ણ સ્વાયત્તતા સાથે શરૂ કરી શકાશે.
યુગાન્ડામાં વિદેશી કેમ્પસ સ્થાપવાની તૈયારી
શૈક્ષણિક સ્વાયત્તતા મળવાની સાથે જ યુનિવર્સિટી દ્વારા રાજ્ય બહાર જ નહીં પરંતુ દેશ બહાર પણ પોતાનું પ્રથમ ઓફ કેમ્પસ સ્થાપવાની ભગીરથ તૈયારીઓ શરૂ કરી દેવામાં આવી છે. આફ્રિકાના દેશ યુગાન્ડામાં ગુજરાત યુનિવર્સિટીનું નવું કેમ્પસ શરૂ કરવા માટેની પ્રક્રિયા અગાઉ શરૂ કરાઈ હતી. જેને કેન્દ્ર સરકારના ગૃહ વિભાગ દ્વારા પણ સત્તાવાર મંજૂરી આપવામાં આવી ચૂકી છે. હવે માત્ર સિક્યુરિટી ડિપોઝિટ અને અન્ય કેટલીક નાની પ્રક્રિયાઓ જ બાકી રહી છે.
NAACનું એ પ્લસ ગ્રેડ અને રેન્કિંગ
આ ઓટોનોમી મેળવવા માટે યુનિવર્સિટીએ કઠોર શૈક્ષણિક ધોરણો અને માપદંડો પાર કરવા પડ્યા છે. નેક (NAAC) માં 30 થી વધુ સ્કોર હોવો આવશ્યક હતો અને યુનિવર્સિટી પાસે તે ઉપલબ્ધ હતો. આ ઉપરાંત નેશનલ રેન્કિંગમાં પણ ઉચ્ચ સ્થાન હોવું જરૂરી છે. યુનિવર્સિટીને નેશનલ રેન્કિંગના ટોપ-100 માં પણ અગાઉ સ્થાન મળી ચૂક્યું છે. જેના આધારે જ યુજીસી દ્વારા આ મહત્ત્વપૂર્ણ સ્વાયત્તતા પ્રદાન કરવામાં આવી છે અને આગામી દિવસોમાં યુનિ. વધુ પ્રગતિ કરશે.
વિદ્યાર્થીઓ અને શૈક્ષણિક વિકાસને વેગ
આગામી સમયમાં આ સ્વાયત્તતાના કારણે વિદ્યાર્થીઓને આંતરરાષ્ટ્રીય સ્તરનું શિક્ષણ અને આધુનિક ડિગ્રી કોર્સીસ ઘરઆંગણે જ મળી રહેશે. યુનિવર્સિટીના આ પગલાથી રાજ્યના યુવાનોને વૈશ્વિક સ્તરે સ્પર્ધા કરવા માટે પૂરતી તકો પ્રાપ્ત થશે.
