VIDEO: ઈડરમાં સખી મંડળનો અનોખો પ્રયાસ ઇકો-ફ્રેન્ડલી ગણેશ મૂર્તિઓ બનાવી મહિલાઓ બની આત્મનિર્ભર!
છેલ્લું અપડેટ : 11 Sept 2026
ઈડરમાં સખી મંડળનો અનોખો પ્રયાસ
ઇકો-ફ્રેન્ડલી ગણેશ મૂર્તિઓ બનાવી મહિલાઓ બની આત્મનિર્ભર!
કેમિકલમુક્ત માટીના ગણેશજીની વધતી જતી માંગ!
ગણેશ ચતુર્થીના પાવન પર્વને હવે ગણતરીના દિવસો જ બાકી રહ્યા છે, ત્યારે સાબરકાંઠા જિલ્લાના ઈડર તાલુકામાં ગણેશોત્સવની તૈયારીઓ પૂરજોશમાં ચાલી રહી છે. આ વખતે ઈડરના કુકડીયા ગામની સખી મંડળની મહિલાઓએ પર્યાવરણ રક્ષણનો અનોખો સંદેશ આપતાં માટીમાંથી ઇકો-ફ્રેન્ડલી ગણેશજીની મૂર્તિઓ તૈયાર કરી છે. જળ પ્રદૂષણ અટકાવવા અને પર્યાવરણનું જતન કરવાના ઉમદા હેતુથી મહિલાઓ ગણેશોત્સવના ત્રણ મહિના અગાઉથી જ મૂર્તિ નિર્માણમાં જોતરાઈ જાય છે. મહિલાઓને આર્થિક રીતે સક્ષમ અને આત્મનિર્ભર બનાવવા માટે સરકાર તથા તાલુકા પંચાયત કચેરીની ગ્રામ વિકાસ શાખા દ્વારા વિશેષ તાલીમ પૂરી પાડવામાં આવી હતી. ક્લસ્ટર કો-ઓર્ડીનેટર કિંજલ પટેલ અને તેમની ટીમ દ્વારા યોગ્ય માર્ગદર્શન મળતાં શીતલબેન પ્રજાપતિ તથા જાગૃતીબેન સહિતની મહિલાઓએ માટીમાંથી ૧ થી ૫ ફૂટ સુધીની અત્યંત આકર્ષક અને મનમોહક મૂર્તિઓ તૈયાર કરી છે. આ પ્રવૃત્તિથી મહિલાઓને ઘેરબેઠા રોજગારીનો ઉત્તમ સ્ત્રોત મળ્યો છે.
તાલુકા પંચાયતની તાલીમ રંગ લાવી, નારી શક્તિનો વિજયધ્વજ!
૧ થી ૫ ફૂટની મનમોહક મૂર્તિઓથી ગણેશોત્સવ થશે ઇકો-ફ્રેન્ડલી!
આ ઇકો-ફ્રેન્ડલી મૂર્તિઓની મુખ્ય વિશેષતા એ છે કે તેમાં કોઈ પણ પ્રકારના કેમિકલયુક્ત કલર કે પ્લાસ્ટર ઓફ પેરિસનો ઉપયોગ કરાતો નથી. મૂર્તિઓને સુશોભિત કરવા માટે સંપૂર્ણપણે કુદરતી અને ઓર્ગેનિક રંગોનો જ પ્રયોગ થાય છે, જેથી નદી કે તળાવમાં વિસર્જન સમયે પાણી પ્રદૂષિત થતું નથી. લોકોમાં પણ પર્યાવરણ પ્રત્યે જાગૃતિ વધતાં આ માટીની મૂર્તિઓની માંગમાં ઉત્તરોત્તર મોટો વધારો જોવા મળી રહ્યો છે. ઈડરના ગ્રામ્ય વિસ્તારની આ નારી શક્તિએ પરંપરા, પ્રકૃતિ અને આત્મનિર્ભરતાનો સુંદર સમન્વય સાધી બતાવ્યો છે. કેમિકલમુક્ત મૂર્તિઓ બનાવીને એક તરફ તેઓ જળ પ્રદૂષણ રોકવામાં મહત્વનું પ્રદાન આપી રહી છે, તો બીજી તરફ પોતાના પગભર થઈને સમાજ માટે પ્રેરણારૂપ ઉદાહરણ પૂરું પાડી રહી છે. સખી મંડળનો આ પ્રયાસ ગ્રામીણ સશક્તિકરણની નવી દિશા દર્શાવે છે.
બ્યૂરો રિપોર્ટ જીએસટીવી