VIDEO: ધાર્મિક નગરી હરિદ્વારમાં મેઘતાંડવ: મુસળધાર વરસાદથી શહેર ચોતરી તરફ જળબંબાકાર!
છેલ્લું અપડેટ : 04 Sept 2026
ઉત્તરાખંડની પવિત્ર ધાર્મિક નગરી હરિદ્વારમાં અવિરત વરસેલા ભારે વરસાદે તારાજી સર્જી છે. કલાકો સુધી પડેલા મુસળધાર વરસાદને કારણે શહેરના મુખ્ય માર્ગો, બજારો અને નીચાણવાળા વિસ્તારો સંપૂર્ણપણે જળબંબાકાર થઈ ગયા છે. પવિત્ર ધામમાં અચાનક આવેલી આ આફતના કારણે સ્થાનિક નાગરિકો તેમજ દૂર-દૂરથી આવેલા શ્રદ્ધાળુઓનું જનજીવન ભારે અસ્તવ્યસ્ત બની ગયું છે. શહેરના પ્રમુખ વિસ્તારો જેવા કે કનખલ, જ્વાલાપુર અને હર કી પૌડી તરફ જતા માર્ગો પર ઘૂંટણસમા પાણી ભરાઈ જતાં વાહનવ્યવહાર ઠપ્પ થઈ ગયો છે. રસ્તાઓ પર અનેક વાહનો પાણીમાં બંધ પડી જતાં વાહનચાલકો અને યાત્રાળુઓ ભારે મુશ્કેલીમાં મુકાયા હતા. આ ઉપરાંત, દુકાનો અને ઘરોમાં વરસાદી પાણી ઘૂસી જતાં સ્થાનિક વેપારીઓ તેમજ રહીશોને મોટું આર્થિક નુકસાન વેઠવાનો વારો આવ્યો છે.
હરિદ્વારના વિશ્વપ્રસિદ્ધ ગંગા ઘાટો પર પણ આ મુસળધાર વરસાદની સીધી અસર જોવા મળી રહી છે. ઉફાન પર વહી રહેલી ગંગા નદી અને ઘાટ પર ભરાયેલા પાણીના કારણે સ્નાન માટે આવેલા ભક્તો માટે ભારે જોખમ ઊભું થયું છે. તંત્ર દ્વારા ભક્તોની સુરક્ષાને ધ્યાને રાખીને ગંગા નદીના પ્રચંડ પ્રવાહ નજીક ન જવા માટે સતત માઇકિંગ કરીને ચેતવણી આપવામાં આવી રહી છે. સ્થાનિક વહીવટીતંત્ર અને મહાનગરપાલિકાની ટીમો દ્વારા પંપ મૂકીને પાણીના નિકાલની કામગીરી હાથ ધરવામાં આવી છે. જોકે, સતત વરસી રહેલા વરસાદને કારણે રાહત કામગીરીમાં ભારે વિઘ્નો આવી રહ્યા છે. હવામાન વિભાગ દ્વારા હજુ પણ આગામી સમયમાં વધુ વરસાદની આગાહી કરવામાં આવી હોવાથી પ્રશાસને લોકોને સાવચેત રહેવાની અપીલ કરી છે.
બ્યૂરો રિપોર્ટ જીએસટીવી
