VIDEO: દેશની વસ્તીનું લાઈવ કાઉન્ટર, દેશની જનસંખ્યા ૧૪૭ કરોડ ૯૩ લાખને વટાવી ગઈ!
છેલ્લું અપડેટ : 08 Sept 2026
દેશની રાજધાની દિલ્હીમાં આવેલી પ્રતિષ્ઠિત ઓલ ઈન્ડિયા ઈન્સ્ટિટ્યૂટ ઓફ મેડિકલ સાયન્સ એટલે કે એમ્સના મુખ્ય પ્રવેશદ્વાર બહાર મુકવામાં આવેલા ડિજિટલ ડિસ્પ્લે બોર્ડે લોકોનું ધ્યાન ખેંચ્યું છે. આ ડિજિટલ કાઉન્ટર પર દેશની અંદાજિત વસ્તીનો રીયલ-ટાઇમ એટલે લાઈવ આંકડો સતત અપડેટ થઈ રહ્યો છે. હાલ આ ડિસ્પ્લે બોર્ડ દર્શાવી રહ્યું છે કે ભારતની વસ્તી ૧૪૭ કરોડ ૯૩ લાખ ૪૭ હજારથી પણ વધુ થઈ ચૂકી છે, જે વસ્તી વિસ્ફોટની ગંભીર સ્થિતિ તરફ ઈશારો કરે છે. બીજી તરફ, કેન્દ્ર સરકાર દ્વારા હાથ ધરવામાં આવેલી આગામી વસ્તી ગણતરીની પ્રક્રિયા પણ ચર્ચાના કેન્દ્રસ્થાને છે. કોરોના મહામારીના કારણે વિલંબિત થયેલી રાષ્ટ્રીય વસ્તી ગણતરીની તૈયારીઓ હવે આખરી તબક્કામાં પહોંચી છે. સરકારી વર્તુળો અને આંકડાશાસ્ત્ર વિભાગ દ્વારા ડિજિટલ માધ્યમો અને આધુનિક તકનીકના ઉપયોગથી વસ્તીના ચોક્કસ દસ્તાવેજીકરણ માટેનું માળખું ઝડપથી તૈયાર કરવામાં આવી રહ્યું છે, જેથી દરેક નાગરિકનો સચોટ ડેટા એકત્ર કરી શકાય.
વસ્તી વૃદ્ધિનો આ દર દેશના સંસાધનો, આરોગ્ય સુવિધાઓ અને પાયાની જરૂરિયાતો પર પડતા ભારે દબાણને સ્પષ્ટપણે રેખાંકિત કરે છે. દિલ્હી એમ્સનું આ ડિજિટલ બોર્ડ માત્ર એક આંકડો નથી, પરંતુ દેશની ભાવિ નીતિઓ અને સુવિધાઓ માટે એક મોટો સંદેશ પૂરો પાડે છે. સરકારની અધિકૃત વસ્તી ગણતરી પૂર્ણ થયા બાદ જ દેશના સાચા ડેટા સામે આવશે, પરંતુ હાલ માટે આ લાઈવ ડિસ્પ્લે બોર્ડ ભારતમાં વધતી જતી જનસંખ્યાની વાસ્તવિકતા અને વસ્તી નિયંત્રણના મહત્વ સામે લાલબત્તી ધરી રહ્યું છે.
બ્યૂરો રિપોર્ટ જીએસટીવી
