ટોલિવૂડ મેગાસ્ટાર Chiranjeeviએ આપ્યું વિવાદાસ્પદ નિવેદન, કાસ્ટિંગ કાઉચ માટે 'વ્યક્તિગત વર્તન' ને ઠરાવ્યું જવાબદાર
છેલ્લું અપડેટ : 26 Jan 2026
સાઉથ ફિલ્મ ઈન્ડસ્ટ્રીમાં કાસ્ટિંગ કાઉચને લઈને ફાતિમા સના શેખ અને સૈયામી ખેરે ખુલાસો કર્યો હતો. હવે મેગાસ્ટાર ચિરંજીવીએ તેલુગુ ફિલ્મ ઈન્ડસ્ટ્રીમાં કાસ્ટિંગ કાઉચ કલ્ચર પર મૌન તોડ્યું છે. તેમનું માનવું છે કે આ બાબત વ્યક્તિગત વર્તન પર નિર્ભર કરે છે, એટલે કે તેના માટે વ્યક્તિ પોતે જવાબદાર હોય છે.
ચિરંજીવીનો ટોલિવૂડમાં કાસ્ટિંગ કાઉચ કલ્ચરનો ઇનકાર
ફિલ્મ ઈન્ડસ્ટ્રીમાં કાસ્ટિંગ કાઉચને લઈને વારંવાર ચર્ચાઓ થતી રહે છે. હવે સાઉથના મેગાસ્ટાર ચિરંજીવીએ આ અંગે પોતાનું મૌન તોડ્યું છે અને મોટું નિવેદન આપ્યું છે. તેમણે તેલુગુ ફિલ્મ ઈન્ડસ્ટ્રીમાં કાસ્ટિંગ કાઉચની પરંપરા હોવાનો સ્પષ્ટ ઇનકાર કર્યો છે અને કહ્યું છે કે ઇન્ડસ્ટ્રી એક અરીસા જેવી છે, તમે જે હોવ તે જ દેખાય છે.
ચિરંજીવીએ 25 જાન્યુઆરી 2026ના રોજ હૈદરાબાદમાં આયોજિત કાર્યક્રમમાં ટોલિવૂડમાં કાસ્ટિંગ કાઉચ વિશે વાત કરી હતી. તેમણે તેલુગુ ફિલ્મ ઈન્ડસ્ટ્રીના વખાણ કરતા કહ્યું કે, આ ઉદ્યોગ એવા લોકોને વાસ્તવિક તકો આપે છે જેઓ પોતાના કામ પ્રત્યે સમર્પિત અને પ્રતિબદ્ધ છે.
'કાસ્ટિંગ કાઉચ જેવું કોઈ કલ્ચર નથી'
મેગાસ્ટારે ભારપૂર્વક જણાવ્યું હતું કે સિનેમા અન્ય કોઈપણ વ્યવસાય જેવું જ છે. તે વ્યક્તિગત વર્તનથી પ્રભાવિત થાય છે. તેમણે કહ્યું, "કાસ્ટિંગ કાઉચ જેવું કોઈ કલ્ચર નથી. આ વ્યક્તિ વિશેષ પર આધાર રાખે છે."
અરીસા જેવી છે ઈન્ડસ્ટ્રી
તેમણે આગળ ઉમેર્યું કે ઈન્ડસ્ટ્રી એક અરીસા જેવી છે. તે તમારા વ્યક્તિત્વને પ્રતિબિંબિત કરે છે. એટલે કે, તમે જેવા હશો તેવું જ તમે અરીસામાં જોશો.
સૈયામી સામે મુકાઈ હતી સમાધાનની શરત
આ અગાઉ અભિનેત્રી સૈયામી ખેરે જણાવ્યું હતું કે તેણે એક અસ્વસ્થ પરિસ્થિતિનો સામનો કરવો પડ્યો હતો, જ્યારે એક મહિલા કાસ્ટિંગ એજન્ટે કથિત રીતે તેને તેલુગુ ફિલ્મ ઈન્ડસ્ટ્રીમાં કામ મેળવવા માટે 'સમાધાન' (કોમ્પ્રોમાઈઝ) કરવા કહ્યું હતું. તે સમયે તેની ઉંમર માત્ર 19-20 વર્ષની હતી.
ફાતિમાને પણ આવ્યો હતો આવો કોલ
ફાતિમા સના શેખ પણ આ બાબતે નિવેદન આપી ચૂકી છે. તેણે એક વાતચીતમાં કહ્યું હતું કે સાઉથ ફિલ્મ ઈન્ડસ્ટ્રીના એક કાસ્ટિંગ એજન્ટે ફોન પર વાંધાજનક ટિપ્પણી કરી હતી, જેનાથી તે ખૂબ જ અસ્વસ્થ થઈ ગઈ હતી.
