VIDEO: સુર્યા અને જ્યોતિકાએ ફરીથી કર્યા લગ્ન, પત્નીને બ્રાઇડલ લુકમાં જોઈ ઈમોશનલ થયો એક્ટર
છેલ્લું અપડેટ : 16 Sept 2026
સાઉથ સિનેમાની જાણીતી અને પસંદગીની જોડીઓમાંથી એક સુર્યા અને જ્યોતિકાએ લગ્નના 20 વર્ષ પૂરા થવાની ઉજવણી અનોખા અંદાજમાં કરી. બંનેએ એક પ્રાઇવેટ ક્રિશ્ચિયન-સ્ટાઇલ સેરેમનીમાં એકબીજાનો ફરીથી હાથ થામ્યો. આ દરમિયાન બંનેનો લુક ખૂબ પસંદ કરવામાં આવી રહ્યો છે.
જ્યોતિકાએ સોશિયલ મીડિયા પર આ સેરેમનીનો વીડિયો શેર કર્યો છે. જેને એક્ટ્રેસે ''THE SEQUEL'' નામ આપતા લખ્યું કે- ''આ કોઈ 'પરફેક્ટ મેરેજ'ની ઉજવણી નથી, પરંતુ આ એકબીજાની ખામીઓ, સમજણ, ત્યાગ અને નિઃસ્વાર્થ પ્રેમને સ્વીકારવાની ઉજવણી છે.'' આ દરમિયાન તેમણે સુર્યાને પોતાના સૌથી સારા મિત્ર અને હમસફર કહ્યા.
આ સેરેમનીમાં સુર્યા અને જ્યોતિકાના બંને બાળકો- પુત્ર દેવ અને પુત્રી દીયા, સુર્યાના ભાઈ કાર્તી અને પરિવારના નજીકના લોકો સામેલ થયા હતા. જ્યાં પુત્ર દેવ પોતાની માતા જ્યોતિકાનો હાથ પકડીને આ નવી સફર શરૂ કરવા માટે લઈ જતો જોવા મળ્યો, તો બીજી તરફ પુત્રી દીયા મેડ ઓફ ઓનર બની.
આ ખાસ પ્રસંગે જ્યાં જ્યોતિકા ખૂબ જ સુંદર વ્હાઇટ બ્રાઇડલ ગાઉનમાં જોવા મળ્યા, તો બીજી તરફ સુર્યા વ્હાઇટ ટક્સિડો (સૂટ)માં ખૂબ જ હેન્ડસમ લાગી રહ્યા હતા. જોકે, જ્યોતિકાને દુલ્હન બનેલી જોઈને સુર્યા ખૂબ ઈમોશનલ થતા જોવા મળ્યા હતા, જેની તસવીર પણ સામે આવી ગઈ છે. બંનેને લગ્નના 20 વર્ષ પૂરા થવા પર સ્ટાર્સ અને ફેન્સે પણ અભિનંદન પાઠવ્યા છે.
સુર્યા અને જ્યોતિકા એકસાથે કામ કરી ચૂક્યા છે. તેઓ 1999માં ફિલ્મ 'પુવેલ્લામ કેટ્ટુપ્પાર'માં પહેલીવાર એકસાથે જોવા મળ્યા હતા. જે બાદ સાથે મળીને ઘણી સુપરહિટ ફિલ્મો આપી, જેમાં- 'કાખા કાખા', 'સિલુનૂ ઓરુ કાદલ' સામેલ છે. જોકે, સપ્ટેમ્બર 2006માં બંનેએ લગ્ન કર્યા હતા, જેને 20 વર્ષ પૂરા થઈ ચૂક્યા છે.
