સૈફ પર હુમલો કરનાર પકડાયો? મુંબઈ પોલીસે CCTVમાં દેખાતા ચહેરા જેવા વ્યક્તિની કરી ધરપકડ

બોલિવૂડ અભિનેતા સૈફ અલી ખાન પર હુમલાના કેસમાં પોલીસે એક શંકાસ્પદ વ્યક્તિની અટકાયત કરી છે. તેને કસ્ટડીમાં લેવામાં આવ્યો છે અને તેની પૂછપરછ કરવામાં આવી રહી છે. આ શંકાસ્પદ વ્યક્તિ બિલકુલ CCTV ફૂટેજમાં દેખાતા શંકાસ્પદ વ્યક્તિ જેવો જ દેખાય છે.

આ પણ વાંચો: શાહરૂખના બંગલામાં પણ સીડી મૂકીને કરાઇ હતી રેકી, સૈફના હુમલાખોર જેવી જ કદકાઠી, પોલીસ મન્નત પહોંચી

મુંબઈ ડીસીપી કહે છે કે તે વ્યક્તિને હમણાં જ પોલીસ સ્ટેશન લાવવામાં આવ્યો છે. તેની સામે અગાઉ ઘર તોડવાના કેસ નોંધાયેલા છે અને પોલીસ તેની પૂછપરછ કરી રહી છે.

મુંબઈ પોલીસ પાસેથી મળેલી માહિતી અનુસાર, સૈફ પર હુમલાના કેસમાં જે શંકાસ્પદ વ્યક્તિને મુંબઈના બાંદ્રા પોલીસ સ્ટેશન લાવવામાં આવ્યો છે તે બિલ્ડિંગમાં છુપાયેલો હતો. જોકે, પોલીસ અધિકારીઓ તેને કયા સ્થાનથી લાવ્યા છે તે જાહેર નથી કરવામાં આવ્યું.

સૈફ અલી ખાન તે બિલ્ડિંગના 12મા માળે રહે છે. CCTV ફૂટેજ અને અન્ય પુરાવાઓના આધારે પોલીસે હુમલાખોરની શોધ શરૂ કરી હતી. તપાસ અધિકારીઓનું માનવું છે કે હુમલાખોરે સૈફના ઘરેથી ભાગી જતા પહેલા પોતાના કપડાં બદલ્યા હતા. પોલીસ અધિકારીના જણાવ્યા અનુસાર, સૈફના ઘરે 56 વર્ષીય સ્ટાફ નર્સ પણ હાજર હતા. તેમનું નામ એલિયામા ફિલિપ છે. તેઓ ફરિયાદી પણ છે. આ ઘટનામાં, તેમને બ્લેડથી ઈજાઓ થઈ હતી. પોલીસે નર્સ ફિલિપ, ઘરના સ્ટાફ, બિલ્ડિંગ ગાર્ડ અને અન્ય લોકોના નિવેદનો નોંધ્યા છે.