સાઈ પરાંજપ્યેને મળશે પદ્મપાણી લાઈફ ટાઈમ અચીવમેન્ટ એવોર્ડ, ભારતીય સિનેમામાં આપ્યું છે અમૂલ્ય યોગદાન

ભારત અને વિશ્વભરની અનન્ય ફિલ્મોની વાર્ષિક ઉજવણી કરતો અજંતા-ઇલોરા ઈન્ટરનેશનલ ફિલ્મ ફેસ્ટિવલ (AIFF) 15થી 19 જાન્યુઆરી, 2025 દરમિયાન છત્રપતિ સંભાજીનગર ખાતે યોજાશે. આ વર્ષે, ઉત્સવનું સૌથી પ્રતિષ્ઠિત સન્માન 'પદ્મપાણી, લાઈફટાઈમ અચીવમેન્ટ એવોર્ડ' જાણીતા દિગ્દર્શક, પટકથા લેખક, નિર્માતા અને નાટ્યકાર, સાઈ પરાંજપ્યેને ભારતીય સિનેમામાં તેમના અમૂલ્ય યોગદાન માટે એનાયત કરવામાં આવશે. આ એવોર્ડમાં પદ્મપાણી સ્મૃતિ ચિન્હ, સન્માન પત્ર અને બે લાખ રૂપિયાનું નાણાકીય પુરસ્કાર સામેલ છે.

15 જાન્યુઆરી, 2025 બુધવારના રોજ રુક્મિણી ઓડિટોરિયમ, MGM યુનિવર્સિટી કેમ્પસ, છત્રપતિ સંભાજીનગર ખાતે સાંજે 6:00 વાગ્યે ઉત્સવના ઉદઘાટન સમારોહ દરમિયાન સાઈ પરાંજપ્યેને 'પદ્મપાણી લાઈફટાઈમ અચીવમેન્ટ એવોર્ડ' એનાયત કરવામાં આવશે. આ સમારોહ વિવિધ રાષ્ટ્રીય અને આંતરરાષ્ટ્રીય કલાકારો, પ્રસિદ્ધ વ્યક્તિઓ અને જીવનના વિવિધ ક્ષેત્રોના ફિલ્મ પ્રેમીઓની હાજરીમાં થશે. આ ફિલ્મ ફેસ્ટિવલ આગામી પાંચ દિવસ સુધી PVR INOX, પ્રોઝોન મોલ ​​ખાતે યોજાશે.

સાઈ પરાંજપ્યેનું યોગદાન

સાઈ પરાંજપ્યે ચાર દાયકાથી વધુ સમયથી ભારતીય સિનેમામાં એક અગ્રણી વ્યક્તિ છે. તેમની પ્રભાવશાળી હિન્દી ફિલ્મોએ ભારતીય સિનેમાને એક અનોખી ઓળખ આપી છે. તેમની ફિલ્મો તેમના ઊંડા ભાવનાત્મક સ્પર્શ અને માનવ સંબંધો માટે જાણીતી છે. તેમની કેટલીક નોંધપાત્ર ફિલ્મોમાં 'સ્પર્શ' (1980), 'ચશ્મે બદ્દૂર' (1981), 'કથા' (1983), 'દિશા' (1990), 'ચૂડીયાં' (1993), અને 'સાઝ' (1997) નો સમાવેશ થાય છે. ફિલ્મ દિગ્દર્શન ઉપરાંત, તેમણે ઘણા નોંધપાત્ર નાટકો અને બાળ નાટકોનું દિગ્દર્શન કર્યું છે. તેમણે મરાઠી સાહિત્ય, ખાસ કરીને બાળ સાહિત્યમાં પણ નોંધપાત્ર યોગદાન આપ્યું છે.

તેમના નોંધપાત્ર યોગદાનની માન્યતામાં, ભારત સરકારે તેમને 2006માં પદ્મ ભૂષણ પુરસ્કારથી સન્માનિત કર્યા. તેમને ફિલ્મફેર એવોર્ડ અને મહારાષ્ટ્ર ફાઉન્ડેશન એવોર્ડ જેવા એવોર્ડ્સ પણ આપવામાં આવ્યા છે. આ સિવાય, પરાંજપ્યેએ સતત બે ટર્મ માટે ચિલ્ડ્રન ફિલ્મ સોસાયટી ઓફ ઈન્ડિયા (CFSI) ના અધ્યક્ષ તરીકે સેવા આપી હતી.