Oscar award / 36 ટેબલ, 270 લોકો અને 5 ડોલરની ટિકિટ... જાણો પહેલા ઓસ્કાર એવોર્ડની રસપ્રદ વાતો
છેલ્લું અપડેટ : 02 Mar 2025
ઓસ્કાર એવોર્ડ્સ ફિલ્મ વિશ્વના સૌથી મોટા સન્માનોમાંથી એક છે. એન્ટરટેઈન્મેન્ટ ઈન્ડસ્ટ્રીમાં આ એવોર્ડ જીતવો એ દરેકનું સ્વપ્ન હોય છે. દર વર્ષે આ ફંક્શનમાં, વિશ્વભરના શ્રેષ્ઠ સિનેમાની પ્રશંસા કરવામાં આવે છે અને તેમના નિર્માતાઓને વિશેષ સન્માન આપવામાં આવે છે. આ એવોર્ડનો ઈતિહાસ પણ ઘણા વર્ષો જૂનો છે. ઓસ્કારના સ્ટેજ પર જવું એ દરેક વ્યક્તિનું સૌથી મોટું સ્વપ્ન હોય છે. ભારતને પણ આ સન્માન ઘણી વખત મળ્યું છે. ઓસ્કાર 2025 માટે કાઉન્ટડાઉન શરૂ થઈ ગયું છે. આ પ્રતિષ્ઠિત ફંક્શન માટે બધી તૈયારીઓ પૂર્ણ થઈ ગઈ છે, પરંતુ શું તમે વિશ્વનો પ્રથમ ઓસ્કાર એવોર્ડ ફંક્શન વિશે જાણો છો?
ઓસ્કાર એકેડેમી એવોર્ડ એ એન્ટરટેઈન્મેન્ટ ઈન્ડસ્ટ્રીનો સૌથી મોટો અને આદરણીય એવોર્ડ છે. અમેરિકન એકેડેમી ઓફ મોશન પિક્ચર આર્ટ્સ એન્ડ સાયન્સ સિનેમા જગત સાથે સંકળાયેલા દિગ્દર્શકો, અભિનેતાઓ અને લેખકોને તેમના ઉત્તમ કામ માટે આ એવોર્ડ આપે છે. 1927માં, અમેરિકાના એમજીએમ સ્ટુડિયોના માલિક લુઈસ બી. મેયરને સૌપ્રથમ તેના વિશે વિચાર આવ્યો. તેમનું માનવું હતું કે એક એવું ગ્રુપ બનાવવામાં આવે જે સમગ્ર એન્ટરટેઈન્મેન્ટ ઈન્ડસ્ટ્રીને લાભદાયી બને. અને આ રીતે વિશ્વનો પ્રથમ ઓસ્કાર એવોર્ડ અસ્તિત્વમાં આવ્યો. ચાલો પહેલા ઓસ્કાર એવોર્ડ ફંક્શન સાથે જોડાયેલી કેટલીક ખાસ વાતો જાણીએ.
આ રીતે બનાવવામાં આવી હતી ઓસ્કારની ટ્રોફી
ઓસ્કાર એવોર્ડની શરૂઆત 1927માં તે સમયના મોશન પિક્ચર્સ ઈન્ડસ્ટ્રીના 36 લોકોની ટીમ દ્વારા કરવામાં આવી હતી. ટીમની રચના કર્યા પછી, માર્ચ 1927માં, હોલીવુડ અભિનેતા-નિર્માતા ડગ્લસ ફેયરબેંક્સને એકેડેમી એવોર્ડના પ્રથમ પ્રમુખ બનાવવામાં આવ્યા. હવે પ્રશ્ન એ હતો કે એવોર્ડ વિજેતાને શું આપવું જોઈએ, તેથી એવું નક્કી કરવામાં આવ્યું કે વિજેતાને ટ્રોફી આપવામાં આવે, જે અલગ રીતે ડિઝાઇન કરવાની રહેશે. એક ડિઝાઇનને ફાઈનલ કરવામાં આવી, જેમાં એક યોદ્ધા હાથમાં તલવાર લઈને ઊભો રહેશે. આ ટ્રોફી બનાવવાની જવાબદારી MGM સ્ટુડિયોના આર્ટ ડિરેક્ટર સેડ્રિક ગિબન્સને સોંપવામાં આવી હતી.
તેમણે કેટલીક એવી મૂર્તિઓ બનાવી જે દુનિયામાં હંમેશા માટે અમર થઈ ગઈ. પ્રથમ એકેડેમી એવોર્ડ ફંક્શન હોલીવુડ રૂઝવેલ્ટ હોટેલમાં યોજાયો હતો. 16 મે, 1929ના રોજ, હોટલના બ્લોસમ રૂમમાં આયોજિત ડિનરમાં 270 લોકો હાજર રહ્યા હતા. આ એક પેઈડ ઈવેન્ટ હતી, જેની ટિકિટની કિંમત 5 ડોલર હતી. ઉપરાંત, પહેલીવાર, આ ઈવેન્ટમાં કોઈ દર્શકો હાજર નહતા રહ્યા. એવું પણ કહેવાય છે કે આ ફંક્શન માત્ર 15 મિનિટમાં જ પૂર્ણ થઈ ગયું હતું. 1929માં આપવામાં આવેલા આ એવોર્ડ 1927-1928 દરમિયાન બનેલી ફિલ્મો સાથે સંકળાયેલા 15 લોકોને આપવામાં આવ્યા હતા.
બેસ્ટ ફિલ્મ માટેનો પ્રથમ ઓસ્કાર કોને મળ્યો હતો?
આ ફંક્શનમાં કુલ 12 એવોર્ડ આપવામાં આવ્યા હતા અને દરેક એવોર્ડ કેટેગરીના નોમીનીઝને સર્ટીફીકેટ આપવામાં આવ્યા હતા. એટલું જ નહીં, આમાં એક ખાસ વાત એ હતી કે ઓસ્કાર વિજેતાઓના નામ ફંક્શનના ત્રણ મહિના પહેલા નક્કી કરવામાં આવતા હતા. પ્રથમ ઓસ્કાર એવોર્ડ જર્મન એક્ટર એમિલ જેનિંગ્સને બેસ્ટ એક્ટર માટે આપવામાં આવ્યો હતો. તેમને આ એવોર્ડ તેમની ફિલ્મો "ધ વે ઓફ ઓલ ફ્લેશ" અને "ધ લાસ્ટ કમાન્ડ" માટે આપવામાં આવ્યો હતો. તેમની આ ફિલ્મો હોલીવુડની હતી, પરંતુ આ પછી તેઓ ફરીથી જર્મન સિનેમા તરફ વળ્યા હતા. બેસ્ટ એક્ટ્રેસનો પહેલો ઓસ્કાર એવોર્ડ જેનેટ ગેનોરને આપવામાં આવ્યો હતો. તેમને તેમની ફિલ્મો '7 હેવન', 'સ્ટ્રીટ એન્જલ' અને 'સનરાઈઝ' માટે એવોર્ડ આપવામાં આવ્યો હતો. ઉપરાંત, બેસ્ટ ફિલ્મનો એવોર્ડ 'વિંગ્સ' ને મળ્યો હતો. આ ફિલ્મ પ્રથમ વિશ્વયુદ્ધ પર આધારિત હતી. તેમાં ક્લેરા બો અને ચાર્લ્સ બડી રોજર્સે અભિનય કર્યો હતો.
તમે ઓસ્કાર 2025 ક્યાં જોઈ શકો છો?
અમેરિકાના લોસ એન્જલસમાં ડોલ્બી થિયેટરમાં 97મા એકેડેમી એવોર્ડનું આયોજન કરવામાં આવશે. ભારતીય દર્શકો તેને સ્ટાર મૂવીઝ અથવા જિયો હોટસ્ટાર પર લાઈવ જોઈ શકે છે. ભારતમાં ઓસ્કાર 2025 ટેલિવિઝન અને મોબાઈલ બંને પર જોઈ શકાય છે. ટેલિવિઝન પર, તે 3 માર્ચ (સોમવાર) ના રોજ સવારે 5:30 વાગ્યે સ્ટાર મૂવીઝ અને સ્ટાર મૂવીઝ સિલેક્ટ પર શરૂ થશે. આ એવોર્ડ ફંક્શન જિયો હોટસ્ટાર પર લાઈવ સ્ટ્રીમિંગ માટે પણ ઉપલબ્ધ રહેશે. રિપીટ ટેલિકાસ્ટ સ્ટાર મૂવીઝ અને સ્ટાર મૂવીઝ સિલેક્ટ પર રાત્રે 8:30 વાગ્યે બતાવવામાં આવશે.
