'મોદીના વિરોધ પછી પણ તક મળી...', વિનેશ ફોગાટની જીત પર કંગનાએ કટાક્ષ કરતા પોસ્ટ કરી

વિનેશ ફોગાટે પેરિસ ઓલિમ્પિક 2024માં ઈતિહાસ રચ્યો છે. તેણે મહિલાઓની 50 કિગ્રા વર્ગની સેમિફાઇનલમાં ક્યુબાની કુસ્તીબાજ યુસ્નેલિસ ગુઝમેનને હરાવીને ફાઇનલમાં જગ્યા બનાવી છે. આ સાથે વિનેશ ફાઇનલમાં પહોંચનારી પ્રથમ ભારતીય મહિલા ખેલાડી બની ગઈ છે. હાલ સોશિયલ મીડિયા પર તેની ચર્ચા થઈ રહી છે.

કંગનાએ પોતાની પ્રતિક્રિયા આપી

આ દરમિયાન અભિનેત્રી અને હિમાચલ પ્રદેશના મંડીથી બીજેપી સાંસદ કંગના રણૌતે રેસલર વિનેશ ફોગાટની આ મોટી જીત પર પોતાની પ્રતિક્રિયા આપી છે. તેણે પોતાની ઈન્સ્ટા સ્ટોરી પર લખ્યું, ‘હું ભારતને પહેલું ગોલ્ડ મળે તે માટે પ્રાર્થના કરી રહી છું. વિનેશ ફોગાટે એકવાર આંદોલનમાં ભાગ લીધો હતો, જેમાં તેણે કહ્યું હતું કે 'મોદી તેરી કબર ખુદેગી'. તેમ છતાં તેને દેશનું પ્રતિનિધિત્વ કરવાનો મોકો મળ્યો. તેને શ્રેષ્ઠ તાલીમ, કોચ અને સુવિધાઓ મળી. આ છે લોકશાહીની સુંદરતા અને મહાન નેતાની ઓળખ.’

વિનેશ લાવશે ગોલ્ડ?

ગત વર્ષે 29 વર્ષીય રેસલર વિનેશ ફોગાટે ભારતીય રેસલિંગ ફેડરેશનના પૂર્વ પ્રમુખ બ્રિજ ભૂષણ સિંહ શરણ પર યૌન શોષણનો આરોપ લગાવ્યો હતો. આ પછી, તે લાંબા સમય સુધી કુશ્તીથી દૂર રહી અને તેની સામે વિરોધ પ્રદર્શનનું નેતૃત્વ કરતી રહી. જોકે, હવે વિનેશ ફોગાટે ઓલિમ્પિકમાં પ્રવેશતાની સાથે જ હલચલ મચાવી દીધી છે. વિનેશ 50 કિલોગ્રામમાં પ્રથમ વખત પડકારરૂપ છે. પહેલા તે 53 કિગ્રામાં રમતી હતી.

વિનેશે ક્વાર્ટર ફાઈનલ મેચમાં યુક્રેનની ઓસાના લિવાચને હરાવીને સેમિફાઈનલમાં પોતાનું સ્થાન નિશ્ચિત કર્યું હતું. તેણે આઠમા ક્રમાંકિત કુશ્તીબાજને 7-5થી હરાવી હતી. જ્યારે અગાઉ પ્રી-ક્વાર્ટર ફાઇનલમાં તેણે ટોચની ક્રમાંકિત જાપાનની યુઇ સુસાકીને 3-2થી હરાવીને મોટો અપસેટ સર્જ્યો હતો. હવે એવી અપેક્ષા રાખવામાં આવે છે કે, જો વિનેશ ફોગાટ ફાઇનલમાં આવું જ મજબૂત પ્રદર્શન કરશે તો તે ભારતને આ વર્ષનો પહેલો ગોલ્ડ જીતવામાં મદદ કરશે.

કંગના રણૌતની વાત કરીએ તો તેણે હિમાચલ પ્રદેશના મંડીથી લોકસભા ચૂંટણી 2024 લડી હતી. તે ભાજપની ઉમેદવાર હતી. આમાં કંગનાએ મોટી જીત હાંસલ કરી હતી. આ દિવસોમાં, કંગના રણૌત હિમાચલમાં અચાનક પૂરના કારણે સર્જાયેલી આફત પર ધ્યાન આપી રહી છે અને લોકોની મદદ કરવાનો પ્રયાસ કરી રહી છે. વર્કફ્રન્ટની વાત કરીએ તો તે જલ્દી જ ફિલ્મ 'ઇમરજન્સી'માં જોવા મળશે.