દીપિકા-રણવીરની દીકરી રણબીર-આલિયાના રાહાના પગલે, આ બાબતમાં છે સરખી

બોલિવૂડના ફેમસ કપલ્સમાંથી એક દીપિકા પાદુકોણ અને રણવીર સિંહે લગભગ એક મહિના પહેલા તેમની દીકરીને જન્મ આપ્યો હતો. લાંબી રાહ જોયા પછી બંને માતા-પિતા બન્યા. આ નવા અધ્યાયની શરૂઆત પછીથી રણવીર તો ઘણી ઇવેન્ટ્સમાં દેખાયો છે, પરંતુ ફેન્સ માતા બન્યા પછી દીપિકાની પહેલી ઝલકની રાહ જોઈ રહી હતી. ખાસ કરીને 'સિંઘમ અગેઇન'ના ટ્રેલર લોન્ચ સમયે, પરંતુ અભિનેત્રીના ફેન્સ નિરાશ થયા હતા કારણ કે તે ઇવેન્ટમાં જોવા મળી ન હતી. પરંતુ તેના પતિ અને ફિલ્મ અભિનેતા રણવીર સિંહે ચોક્કસપણે આ ઇવેન્ટમાં ચાર ચાંદ લગાવ્યા હતા. આ દરમિયાન રણવીરે જણાવ્યું કે અત્યારે દીપિકા તેના બાળકની સંભાળ રાખવામાં વ્યસ્ત છે અને તે પોતે રાત્રે પેરેન્ટિંગની જવાબદારી સંભાળી રહ્યો છે.

ફિલ્મના શૂટિંગ દરમિયાન પ્રેગ્નેન્ટ હતી દીપિકા

ફિલ્મના ટ્રેલર લોન્ચ પ્રસંગે રણવીર સિંહે જણાવ્યું કે, જ્યારે તેની પત્ની અને ફિલ્મ અભિનેત્રી દીપિકા પાદુકોણ ફિલ્મનું શૂટિંગ કરી રહી હતી ત્યારે તે પ્રેગ્નન્ટ હતી. રણવીરે કહ્યું કે, તેથી મારી દીકરી પણ ફિલ્મ ડેબ્યૂ કરી ચૂકી છે. તેમની દીકરીએ પણ ફિલ્મમાં કામ કર્યું છે. મજાકમાં રણવીરે તો ત્યાં સુધી કહ્યું કે, તેની દીકરી 'બેબી સિમ્બા' છે. આ રીતે દીપિકા અને રણવીરની દીકરીએ પણ જન્મ લીધા વિના જ ફિલ્મ ઈન્ડસ્ટ્રીમાં એન્ટ્રી કરી લીધી છે.

આલિયા-રણબીરની રાહા પણ કરી ચૂકી છે કામ

આ દરમિયાન, એક વખત આલિયા ભટ્ટે પણ એક ઈન્ટરવ્યુમાં ખુલાસો કર્યો હતો કે, તેણે તેની પહેલી હોલિવૂડ ફિલ્મ 'હાર્ટ ઓફ સ્ટોન'નું શૂટિંગ પેટમાં બાળક સાથે કર્યું હતું. દીકરી રાહા કપૂર સાથે ગર્ભવતી આલિયા ભટ્ટે ફિલ્મનું શૂટિંગ પૂર્ણ કર્યું હતું. આટલું જ નહીં, આલિયાએ જણાવ્યું હતું કે, જ્યારે તે શૂટિંગ કરી રહી હતી ત્યારે તેણે રાહાની પહેલી કિક પણ અનુભવી હતી જે તેણે તેના પતિ રણબીર સાથે શેર કરી હતી. આ સંદર્ભમાં દીપિકા અને આલિયા બંનેએ પોતપોતાના પ્રોજેક્ટ્સ દરમિયાન ગર્ભાવસ્થાનો અનુભવ કર્યો, જેના કારણે તેમની દીકરીઓ પણ તેમના જન્મ પહેલાં જ ડેબ્યૂ કરનારી સ્ટાર કિડ્સ બની ગઈ છે.

'સિંઘમ અગેઇન'ને મળી રહ્યો છે સારો પ્રતિસાદ

'સિંઘમ અગેઇન'ના ટ્રેલરે લોન્ચ થયાના 24 કલાકમાં જ એક અદ્ભુત રેકોર્ડ બનાવ્યો છે. વાસ્તવમાં, ટ્રેલરે 24 કલાકની અંદર યુટ્યુબ પર ટોચના 10 સૌથી વધુ જોવાયેલા ભારતીય ટ્રેલર્સમાં એન્ટ્રી કરી લીધી છે. ફિલ્મના ટ્રેલરને અત્યાર સુધીમાં 51 મિલિયનથી વધુ લોકો જોઈ ચૂક્યા છે અને રિલીઝ થયાને માત્ર 1 દિવસ જ થયો છે.