હવે કેવી છે અભિનેતા ટીકુ તલસાનિયાની તબિયત? પુત્રી શિખાએ સ્વાસ્થ્ય વિશે આપી માહિતી

પોતાના ઉત્તમ કોમિક ટાઈમિંગ માટે પ્રખ્યાત અભિનેતા ટીકુ તલસાનિયાને બ્રેઈન સ્ટ્રોક આવ્યા બાદ હોસ્પિટલમાં દાખલ કરવામાં આવ્યા છે. તેમની કોકિલાબેન અંબાણી હોસ્પિટલમાં સારવાર ચાલી રહી છે. ઘણી ફિલ્મોમાં યાદગાર ભૂમિકાઓ ભજવનાર અભિનેતાના ફેન્સ માટે રાહતના સમાચાર છે. તેમની હાલતમાં સુધારો થઈ રહ્યો છે. અભિનેતાની પુત્રી શિખા તલસાનિયાએ સોશિયલ મીડિયા પર આ અંગે માહિતી આપી છે.

આ પણ વાંચો: રિલીઝ પહેલા 'સિકંદર'ની ટીમને લાગ્યો મોટો ઝટકો, ઈજાગ્રસ્ત રશ્મિકા મંદાનાએ લેવો પડ્યો બ્રેક

ફેન્સનો આભાર માન્યો

શિખાએ તેના પિતાના સ્વાસ્થ્યના સમાચાર તેની ઇન્સ્ટાગ્રામ સ્ટોરી પર શેર કર્યા છે અને તેમના ફેન્સનો આભાર માન્યો છે. અભિનેતાની પુત્રીએ લખ્યું છે, 'તમારા બધાની પ્રાર્થનાઓ માટે હૃદયપૂર્વક આભાર'. તેમાં આગળ લખ્યું છે કે, 'આ અમારા બધા માટે ભાવનાત્મક સમય હતો, પરંતુ તમને જણાવતા આનંદ થાય છે કે પપ્પા હવે પહેલા કરતાં વધુ સારા છે અને તેમની તબિયતમાં સુધારો થઈ રહ્યો છે. અમે કોકિલાબેન અંબાણી હોસ્પિટલના ડોકટરો અને સ્ટાફના આભારી છીએ જેમણે દરેક રીતે શ્રેષ્ઠ પ્રયાસો કર્યા છે. તેમજ તેમના ફેન્સનો આભાર કે જેમણે અમને ખૂબ ખૂબ સપોર્ટ અને પ્રેમ આપ્યો.'

નાના પડદાથી અભિનયની શરૂઆત કરી

ટીકુ તલસાનિયાએ ફિલ્મો અને ટેલિવિઝન બંનેમાં કામ કર્યું. ટીકુ તલસાનિયાએ 'અંદાજ અપના અપના', 'દેવદાસ', 'સ્પેશિયલ 26' જેવી ક્લાસિક ફિલ્મો અને લોકપ્રિય ટીવી શો 'ઉત્તરન'માં કામ કર્યું છે. તલસાનિયાએ 1984માં ટીવી શો 'યે જો હૈ જિંદગી'થી અભિનય ક્ષેત્રે પ્રવેશ કર્યો હતો. બે વર્ષ પછી, તેમણે 'પ્યાર કે દો પલ', 'ડ્યુટી' અને 'અસલી નકલી' સાથે બોલિવૂડમાં પ્રવેશ કર્યો. ત્યાંથી તેમની કારકિર્દીનો પ્રારંભ થયો.

છેલ્લે આ ફિલ્મમાં જોવા મળ્યા હતા

'બોલ રાધા બોલ', 'કુલી નંબર 1', 'રાજા હિન્દુસ્તાની', 'હીરો નંબર 1' અને 'બડે મિયાં છોટે મિયાં' જેવી ફિલ્મોમાં પોતાના મનોરંજક અભિનયથી આ અભિનેતા ઘર-ઘરમાં જાણીતા બન્યા હતા. તલસાનિયાએ 'ગોલમાલ હૈ ભાઈ સબ ગોલમાલ હૈ', 'જિંદગી અભી બાકી હૈ મેરે ઘોસ્ટ' અને 'સજન રે ફિર ઝૂઠ મત બોલો' જેવા લોકપ્રિય શો દ્વારા ભારતીય ટેલિવિઝનમાં યોગદાન આપ્યું છે. તેઓ છેલ્લે 2024માં આવેલી ફિલ્મ 'વિક્કી વિદ્યા કા વો વાલા વીડિયો'માં જોવા મળ્યા હતા.