'હમારે બારહ'ની રિલીઝ પર બોમ્બે હાઈકોર્ટે કહ્યું, "અમે ફિલ્મ જોઈ છે અને તેમાં વાંધાજનક..."

ફિલ્મ 'હમારે બારહ'ની રિલીઝ પર પ્રતિબંધ મૂકવા માટે મુંબઈની બોમ્બે હાઈકોર્ટમાં અરજી દાખલ કરવામાં આવી હતી. અરજીકર્તાનો આરોપ છે કે, ફિલ્મનું ટીઝર ઇસ્લામિક માન્યતાઓ અને વિવાહિત મુસ્લિમ મહિલાઓનું અપમાન કરે છે. આજે આ મામલે કોર્ટમાં સુનાવણી હાથ ધરવામાં આવી હતી. કોર્ટે કહ્યું કે, અમે ફિલ્મ જોઈ છે અને ફિલ્મમાં કંઈ વાંધાજનક નથી, કેટલાક વાંધાજનક શબ્દો અને દ્રશ્યો હટાવી દેવામાં આવ્યા છે.

કોર્ટે કહ્યું, પહેલા ફિલ્મ જુઓ

કોર્ટે અરજીકર્તાના વકીલને કહ્યું કે, તમે લોકો ફિલ્મ જોયા વિના દલીલ કરવા આવ્યા છો. તમારે પહેલા ફિલ્મ જોવી જોઈએ અને પછી જો તમને કંઈક ન ગમતું હોય તો તેના પર ચર્ચા થઈ શકે છે. ફિલ્મનું ટ્રેલર કે ટીઝર જોઈને તમે અંદાજો લગાવી શકતા નથી કે ફિલ્મ કેવી હશે.

ફિલ્મ જોયા વિના ટિપ્પણી કરવી ખોટું

કોર્ટે અરજદારના વકીલને એમ પણ કહ્યું કે, ફિલ્મ જોયા વિના ટિપ્પણી કરવી ખોટી છે. તમે પોસ્ટર જોયા પછી જ ટિપ્પણી કરી રહ્યા છો. આ ફિલ્મ સમાજને સામાજિક સંદેશ આપવા માટે બનાવવામાં આવી છે. કોર્ટે કહ્યું કે, ફિલ્મના ટ્રેલરે આ સમસ્યા ઊભી કરી છે અને ફિલ્મ મહિલાઓ પર આધારિત છે. કોર્ટે એમ પણ કહ્યું કે, જો આ ફિલ્મમાં ક્યાંય પણ વાંધાજનક દ્રશ્યો કે સંવાદો હોય તો હું આ ફિલ્મમાં દખલ કરનાર પહેલી વ્યક્તિ હોત.

વાંધાજનક દ્રશ્યો અને સંવાદો હટાવ્યા

કોર્ટે અરજીકર્તાને અપીલ કરી છે કે, તમારે પણ પહેલા આ ફિલ્મ જોવી જોઈએ, ફિલ્મ જોયા પછી તમે પણ કોઈ વાંધો ઉઠાવશો નહીં. કોર્ટે કહ્યું કે, ફિલ્મમાં જે પણ વાંધાજનક સીન કે ડાયલોગ હતા તે હટાવી દેવામાં આવ્યા છે. કોર્ટે એમ પણ કહ્યું કે, ફિલ્મમાં કોઈ સમસ્યા નથી. ફિલ્મ જોયા બાદ અમે કેટલીક નોંધ કરી કે શું ખોટું છે અને શું નથી, ફિલ્મમાંથી કેટલાક દ્રશ્યો અને સંવાદો હટાવી દેવામાં આવ્યા છે.