KBCના સેટ પર લપસી ગયા અમિતાભ, પગમાં ઈજા બાદ બદલાયો અંદાજ
છેલ્લું અપડેટ : 01 Oct 2026
‘કૌન બનેગા કરોડપતિ 18’ (KBC 18)ના તાજેતરના એપિસોડમાં અમિતાભ બચ્ચન સામાન્ય દિવસોથી અલગ અંદાજમાં જોવા મળ્યા. શોની શરૂઆતમાં તેઓ હંમેશની જેમ ઊભા રહીને દર્શકોનું સ્વાગત કરતા જોવા મળ્યા નહોતા. તેના બદલે તેઓ શરૂઆતથી જ પોતાની હોસ્ટિંગ સીટ પર બેઠેલા રહ્યા. આ દરમિયાન તેમણે પોતે જ આ પાછળનું કારણ પણ જણાવ્યું હતું.
શૂટિંગ દરમિયાન લપસી ગયા અમિતાભ
અમિતાભ બચ્ચને જણાવ્યું કે એક દિવસ પહેલાં શૂટિંગ દરમિયાન સેટ પર તેમનો પગ લપસી ગયો હતો અને તેઓ નીચે પડી ગયા હતા. આ ઘટનામાં તેમના ઘૂંટણમાં ઈજા થઈ હતી. જેના કારણે તેઓ સામાન્ય રીતે ઊભા રહીને કરતા પોતાના મોનોલોગ (Monologue)ને આ વખતે ખુરશી પર બેસીને જ રજૂ કરી રહ્યા હતા.
અમિતાભે પોતે જ જણાવી ઈજાની વાત
એપિસોડ દરમિયાન અમિતાભ બચ્ચને કહ્યું કે સામાન્ય રીતે તેઓ પોતાનો મોનોલોગ બોલતી વખતે વચ્ચે ઊભા થાય છે, પરંતુ ઘૂંટણમાં ઈજા હોવાથી આ વખતે તેઓ ઊભા થઈ શકતા નથી. તેમણે સ્પષ્ટ કર્યું કે શૂટિંગ દરમિયાન લપસી જવાથી તેમને ઘૂંટણમાં ઈજા થઈ હતી.
ચાહકોને ન થવા દીધી ચિંતા
ઈજા અંગે વાત કરતી વખતે અમિતાભ બચ્ચને દર્શકોને ચિંતા ન કરવાની અપીલ કરી હતી. તેમણે સંકેત આપ્યો કે ઈજા ગંભીર નથી. જોકે, તેમની આ વાત સામે આવ્યા બાદ ચાહકો સોશિયલ મીડિયા પર તેમના ઝડપથી સ્વસ્થ થવાની શુભેચ્છા પાઠવી રહ્યા છે.
બ્લોગની પોસ્ટ પણ ચર્ચામાં આવી
અમિતાભ બચ્ચન નિયમિત રીતે પોતાના બ્લોગ (Blog) દ્વારા ચાહકો સાથે વિચારો શેર કરે છે. 25 અને 26 સપ્ટેમ્બરના તેમના બ્લોગમાં તેમણે જીવન અને આગામી પેઢી વિશે લખ્યું હતું. ઈજા સામે આવ્યા બાદ કેટલાક ચાહકો તેમના આ લખાણને તાજેતરની ઘટનાથી જોડીને જોઈ રહ્યા છે.
વર્કફ્રન્ટ પર અનેક પ્રોજેક્ટ
વર્કફ્રન્ટ (Workfront)ની વાત કરીએ તો અમિતાભ બચ્ચન પાસે અનેક મહત્વપૂર્ણ પ્રોજેક્ટ છે. તેઓ રિભુ દાસગુપ્તા દ્વારા નિર્દેશિત કોર્ટરૂમ ડ્રામા ‘સેક્શન 84’માં જોવા મળશે. આ ફિલ્મમાં ડાયના પેન્ટી, નિમ્રત કૌર અને અભિષેક બેનર્જી પણ મહત્વની ભૂમિકામાં છે.
‘કલ્કિ 2898 એડી પાર્ટ 2’માં પણ વાપસી
આ ઉપરાંત અમિતાભ બચ્ચન નાગ અશ્વિનની ફિલ્મ ‘કલ્કિ 2898 એડી પાર્ટ 2’માં પણ અશ્વત્થામાના પાત્રમાં વાપસી કરશે. ફિલ્મમાં તેઓ પ્રભાસ અને કમલ હાસન સાથે સ્ક્રીન શેર કરતા જોવા મળશે. હાલમાં ફિલ્મનું કામ આગળ વધી રહ્યું છે.