1000 કરોડની ફિલ્મની સિક્વલ પર કામ શરૂ કરશે અમિતાભ બચ્ચન, વધારવામાં આવ્યો તેમની સ્ક્રીન ટાઈમ

પ્રભાસ, દીપિકા પાદુકોણ અને અમિતાભ બચ્ચન અભિનીત ફિલ્મ 'કલ્કી 2898 એડી' એ બોક્સ ઓફિસ પર 1000 કરોડ રૂપિયાની કમાણી કરી હતી. આ ફિલ્મ રિલીઝ થઈ ત્યારથી, ફેન્સ 'કલ્કી 2' ના અપડેટ્સ પર નજર રાખી રહ્યા છે. હવે અમિતાભ બચ્ચન 'કલ્કી 2898 એડી' ના ડાયસ્ટોપિયન સાયન્સ-ફિક્શન જગતમાં એક્શનથી ભરપૂર વાપસી કરવાની તૈયારી કરી રહ્યા છે. હવે 'કલ્કી 2' પર એક મોટું અપડેટ આવ્યું છે. જેમાં જણાવવામાં આવ્યું છે કે અમિતાભ આ ફિલ્મનું શૂટિંગ ક્યારે શરૂ કરવાના છે.

'કલ્કી' ના પહેલા ભાગમાં, અમિતાભ બચ્ચનનું કામ પ્રભાસ અને દીપિકા પાદુકોણને ઘણું ભારે પડ્યું હતું. બધાએ અમિતાભના વખાણ કર્યા હતા. તાજેતરના અહેવાલ મુજબ, પીઢ અભિનેતા મે 2025માં સૌથી વધુ રાહ જોવાતી સિક્વલ, 'કલ્કી 2' નું શૂટિંગ શરૂ કરશે. બિગ બી ફરી એકવાર અશ્વત્થામા તરીકે પરત ફરશે. આ ફિલ્મ દ્વારા સુપરસ્ટારના ફેન્સને એક અલગ અનુભવ મળશે.

અમિતાભ મે મહિનામાં 'કલ્કી 2' નું શૂટિંગ શરૂ કરશે

'કલ્કી 2' માં શાનદાર વાર્તા અને અદ્ભુત એક્શન સિક્વન્સ હશે. આ ફિલ્મમાં પ્રભાસ, કમલ હાસન અને દીપિકા પાદુકોણ પણ પોતાની દમદાર ભૂમિકામાં જોવા મળશે. 'કૌન બનેગા કરોડપતિ' (KBC) ની 16મી સીઝન પૂરી કર્યા પછી, અમિતાભ બચ્ચન હવે નાગ અશ્વિન દ્વારા દિગ્દર્શિત 'કલ્કી 2' પર ધ્યાન કેન્દ્રિત કરી રહ્યા છે. અહેવાલો અનુસાર, અમિતાભ મે મહિનામાં શૂટિંગ શરૂ કરશે અને તેમનો સ્ક્રીન ટાઈમ વધારવામાં આવ્યો છે.

અમિતાભના કેરેક્ટરનો સ્ક્રીન ટાઈમ વધારવામાં આવ્યો 

ફિલ્મનું શૂટિંગ 15 જૂન સુધી ચાલુ રહેવાની ધારણા છે. ફિલ્મના પહેલા ભાગમાં મહાભારતના અમર અશ્વત્થામાની ભૂમિકા ભજવનાર બિગ બી, 'કલ્કી 2' માં આ પાત્રને વધુ ઊંડાણપૂર્વક ભજવશે. રિપોર્ટ અનુસાર, બચ્ચન એક અમર પ્રાણીની ભૂમિકા ભજવી રહ્યા હોવાથી, તેઓ હથિયારો સાથે વધુ એક્શન કરતા પણ જોવા મળશે. ફિલ્મની સિક્વલ અશ્વત્થામાની ભૈરવ/કર્ણ (પ્રભાસ) સાથેની સફર પર કેન્દ્રિત હશે. સુમતિ (દીપિકા પાદુકોણ) ના બાળકને બચાવવા માટે બંને સાથે મળીને કામ કરે છે.