અક્ષય કુમારે બતાવી ઉદારતા, આ રીતે કરી જેકી ભગનાનીની મદદ, કહ્યું- 'મારા પૈસા ન આપો...'

જેકી ભગનાનીનું પ્રોડક્શન હાઉસ પૂજા એન્ટરટેઈનમેન્ટ ખોટમાં ચાલી રહ્યું છે. ઘણી ફિલ્મો બેક ટુ બેક ફ્લોપ થતાં પ્રોડક્શન હાઉસને મોટું નુકસાન થયું છે. અક્ષય કુમાર અને ટાઈગર શ્રોફની ફિલ્મ ‘બડે મિયાં છોટે મિયાં’ ફ્લોપ થયા બાદ પ્રોડક્શન હાઉસને વધુ એક મોટો ફટકો પડ્યો છે. જેના કારણે તે ક્રૂ અને કાસ્ટને પણ પૈસા ચૂકવવા સક્ષમ નથી. આ વાતનો ખુલાસો ત્યારે થયો જ્યારે ફેડરેશન ઓફ વેસ્ટર્ન ઈન્ડિયા સિને એમ્પ્લોઈઝના પ્રમુખ બીએન તિવારીએ ખુલાસો કર્યો કે, વાશુ ભગનાનીએ ‘મિશન રાનીગંજ’, ‘ગણપત’ અને ‘બડે મિયાં છોટે મિયાં’ના ક્રૂના 65 લાખ રૂપિયા આપવના બાકી છે. જે બાદ અક્ષય કુમાર તેની મદદ માટે આગળ આવ્યો છે. જેકી ભગનાનીએ હવે એક નિવેદન શેર કર્યું છે કે, અક્ષય કુમારે તેને તેમનું પેમેન્ટ રોકી રાખવા અને કલાકારો અને ક્રૂને તમામ પૈસા આપવા કહ્યું છે.

ઘણા સમયથી પૂજા એન્ટરટેઈનમેન્ટ ખોટ કરી રહી હોવાના અહેવાલો હતા. જે બાદ વાશુ ભગનાનીએ પણ નિવેદન શેર કર્યું હતું. જ્યારે ક્રૂ મેમ્બરોએ પૈસા ન મળવાના સમાચાર સોશિયલ મીડિયા પર શેર કરવાના શરૂ કર્યા ત્યારે આ સમાચાર વધુને વધુ આવવા લાગ્યા. હવે આ મુશ્કેલ સમયમાં જેકીની મદદ માટે અક્ષય કુમાર આગળ આવ્યો છે.

અક્ષયે કહી આ વાત 

જેકી ભગનાનીએ પોતાના નિવેદનમાં કહ્યું- હાલમાં જ અક્ષય સર મને આ બાબતે વાત કરવા માટે મળ્યા હતા. આ પરિસ્થિતિ વિશે જાણ્યા પછી, અક્ષય સર ક્રૂ માટે તેમનો ટેકો બતાવવામાં અચકાયા નહીં. તેમણે કહ્યું કે, જ્યાં સુધી આ પ્રોજેક્ટ પર કામ કરનાર કાસ્ટ અને ક્રૂને સંપૂર્ણ પેમેન્ટ કરવામાં ન આવે ત્યાં સુધી તેમનું પેમેન્ટ હોલ્ડ કરવામાં આવે.

ઉલ્લેખનીય છે કે, ક્રૂ સિવાય ‘બડે મિયાં છોટે મિયાં’ની સ્ટાર કાસ્ટ સોનાક્ષી સિન્હા, ટાઈગર શ્રોફ, અલાયા એફ. અને માનુષી છિલ્લર પણ તેમના પેમેન્ટની રાહ જોઈ રહ્યા છે. એક અહેવાલ મુજબ ટાઈગર શ્રોફને પણ ‘બડે મિયાં છોટે મિયાં’ની ફી નથી મળી.