VIDEO : અભિનેત્રી હંસિકા મોટવાણીનું લગ્નજીવન તૂટ્યું, સહેલીના એક્સ સાથે કર્યા હતા લગ્ન 

દક્ષિણ ભારતની પ્રખ્યાત અભિનેત્રી હંસિકા મોટવાણીએ તેના પતિ સોહેલ કથુરિયાને છૂટાછેડા આપી દીધા છે. તેમના લગ્નજીવનમાં ઘણા સમયથી તિરાડની અફવાઓ ફેલાઈ રહી હતી. જેની હવે પુષ્ટિ થઈ છે. મુંબઈની બાંદ્રા કોર્ટે હંસિકા અને સોહેલના છૂટાછેડાને મંજૂરી આપી દીધી છે. 4 વર્ષ અગાઉ અભિનેત્રીએ પોતાની બહેનપણીના એક્સ સાથે લગ્ન કર્યા હતા. આ લગ્નથી દંપતીને કોઈ સંતાન નથી.

હંસિકાનું ઘર તૂટ્યું

હંસિકા મોટવાણીએ 4 ડિસેમ્બર, 2022 ના રોજ ઉદ્યોગપતિ સોહેલ કથુરિયા સાથે ખૂબ જ ધામધૂમથી લગ્ન કર્યા. આ સોહેલના હંસિકા સાથે બીજા લગ્ન હતા. તેણે અગાઉ હંસિકાની ખાસ બહેનપણી રિંકી બજાજ સાથે લગ્ન કર્યા હતા. સોહેલના બંને સંબંધો સફળ થયા નહીં. લગ્નના થોડાક જ મહિનાઓમાં બંને વચ્ચે અણબનાવ જોવા મળ્યો. વારંવાર નાની નાની બાબતે એકબીજા સાથે ઝઘડા થતા હતા. સોહેલ અને હંસિકાનું લગ્નજીવન તૂટવાથી અભિનેત્રીના ચાહકોને આઘાત લાગ્યો છે. 

છૂટાછેડાનું કારણ શું છે?

અહેવાલો અનુસાર છૂટાછેડા દરમિયાન હંસિકાએ તેના સ્ત્રીધન કે ભરણપોષણ માટે કોઈ દાવો દાખલ કર્યો ન હતો. કોર્ટની સુનાવણી દરમિયાન મોટવાણીના વકીલ, અદનાન શેખે જણાવ્યું હતું કે લગ્ન પછી દંપતી થોડા સમય માટે સાથે રહ્યા હતા. જોકે, તેમને ધીમે ધીમે સમજાયું કે તેમના સ્વભાવ, વિચાર અને જીવનશૈલીમાં નોંધપાત્ર તફાવત છે. આના કારણે તેમની વચ્ચે ઝઘડા થવા લાગ્યા. તેઓ રોજ નાની નાની બાબતો પર ઝઘડા કરતા હતા, અને એક જ છત નીચે રહેવું તેમના માટે વધુને વધુ મુશ્કેલ બન્યું. જે પછી તેઓએ અલગ થવાનો નિર્ણય લીધો.

પરિવાર, સંબંધીઓ અને મિત્રોએ લગ્ન બચાવવા માટે શ્રેષ્ઠ પ્રયાસો કર્યા, પરંતુ  તેમાં નિષ્ફળ ગયા. આખરે દંપતીએ અલગ થવાનો અને લગ્ન તોડી નાખવાનો નિર્ણય લીધો. વકીલના જણાવ્યા મુજબ તેઓ 2 જુલાઈ, 2024 થી અલગ રહી રહ્યા છે. તેમના સંબંધો બગડ્યા હતા, પરંતુ તેઓએ પરસ્પર ચર્ચા કરી અને છૂટાછેડા લેવાનો નિર્ણય લીધો.

હંસિકા એક અગ્રણી દક્ષિણ ભારતીય અભિનેત્રી છે

હંસિકા હિન્દી અને દક્ષિણ ભારતીય ઉદ્યોગોમાં એક જાણીતી અભિનેત્રી છે. તેણીએ બાળપણથી જ અભિનય કારકિર્દીની શરૂઆત કરી હતી. તેણીએ ટીવી શો "શકા લાકા બૂમ બૂમ" અને ફિલ્મ "કોઈ... મિલ ગયા" માં બાળ કલાકાર તરીકે કામ કર્યું હતું. હંસિકા "દેશ મેં નિકલા હોગા ચાંદ", "ક્યુંકી સાસ ભી કભી બહુ થી", "સોન પરી", "કરિશ્મા કા કરિશ્મા" અને "બિદાઈ" જેવી સિરિયલોમાં જોવા મળી હતી.