JEE મેઈન્સના પરીક્ષા કેન્દ્રને લઈને ફેલાયેલી અફવાઓને NTA એ નકારી કાઢી, જાણો શું છે સત્ય
છેલ્લું અપડેટ : 11 Oct 2025
સોશિયલ મીડિયા પર ફેલાતી અફવાઓ વચ્ચે, નેશનલ ટેસ્ટિંગ એજન્સી (NTA) એ JEE મેઈન્સ 2026 અંગે એક મહત્ત્વપૂર્ણ સ્પષ્ટતા જારી કરી છે. કેટલાક સમયથી, એવા દાવાઓ કરવામાં આવી રહ્યા હતા કે વિદ્યાર્થીને હવે તેમનું પરીક્ષા કેન્દ્ર પસંદ કરવાનો વિકલ્પ નહીં મળે અને કેન્દ્રો ફક્ત તેમના આધાર કાર્ડના સરનામાના આધારે નક્કી કરવામાં આવશે. જોકે, NTA એ આ સમાચારને સંપૂર્ણપણે ભ્રામક અને ખોટા ગણાવ્યા છે. એજન્સીએ સ્પષ્ટતા કરી છે કે વિદ્યાર્થીઓને, પહેલાની જેમ, પરીક્ષા કેન્દ્ર પસંદ કરવાનો સંપૂર્ણ અધિકાર રહેશે.
NTA એ તેના નિવેદનમાં શું કહ્યું?
NTA એ જણાવ્યું હતું કે JEE મેઈન્સ 2026 જાન્યુઆરી અને એપ્રિલ 2026માં બે સેશનમાં યોજાશે. પાછલા વર્ષોમાં, ઘણા વિદ્યાર્થીઓએ અરજી પ્રક્રિયા દરમિયાન ફરિયાદ કરી હતી કે તેમના આધાર કાર્ડ, 10મા ધોરણના સર્ટીફીકેટ અને અન્ય ડોક્યુમેન્ટ પર આપવામાં આવેલી માહિતીમાં વિસંગતતાને કારણે તેમને મુશ્કેલીઓનો સામનો કરવો પડ્યો હતો.
આ કારણોસર, NTA એ 29 સપ્ટેમ્બર, 2025ના રોજ એક પબ્લિક નોટિસ જારી કરી હતી. આમાં, વિદ્યાર્થીઓને અરજી પ્રક્રિયા શરૂ કરતા પહેલા આધાર, UDID કાર્ડ, જન્મ તારીખ અને કેટેગરી સર્ટીફીકેટ વગેરે ચેક કરવાની અને જો જરૂરી હોય તો તેને અપડેટ કરવાની સલાહ આપવામાં આવી હતી.
જોકે, આ નોટિસ પરીક્ષા શહેર અથવા કેન્દ્રની પસંદગી સાથે સંબંધિત નહતી. તે ફક્ત ઓળખના ડોક્યુમેન્ટની ચોકસાઈ સુનિશ્ચિત કરવા માટે જારી કરવામાં આવી હતી, જેથી અરજી પ્રક્રિયા દરમિયાન કોઈ વિદ્યાર્થીને તકનીકી સમસ્યાઓનો સામનો ન કરવો પડે.
NTA એ શું કહ્યું?
NTA એ સ્પષ્ટતા કરી કે વિદ્યાર્થીઓ અને વાલીઓએ સોશિયલ મીડિયા અને કેટલીક વેબસાઈટ્સ પર ફરતા સમાચારોથી ભ્રમિત ન થવું જોઈએ. એજન્સીએ સલાહ આપી હતી કે કોઈપણ માહિતી પર આધાર રાખતા પહેલા, તેઓએ nta.ac.in પર જારી કરાયેલ સત્તાવાર નોટિસનો ચેક કરી લેવી જોઈએ. NTA એ એમ પણ જણાવ્યું હતું કે પરીક્ષા કેન્દ્ર પસંદગી નીતિમાં કોઈ ફેરફાર નથી કરવામાં આવ્યો અને બધી અફવાઓ ભ્રામક અને અપ્રમાણિત છે.
