Stock news today: સેન્સેક્સ 638 પોઈન્ટ ઉછળ્યો, નિફ્ટી 26,172 પર; મેટલ અને આઈટી શેરોમાં વધારો
છેલ્લું અપડેટ : 22 Dec 2025
Stock news today: સોમવારે ભારતીય શેરબજારે સપ્તાહની મજબૂત શરૂઆત કરી હતી, જે દિવસના ઉચ્ચતમ સ્તર પર બંધ થયો હતો. ખરીદીનો વિસ્તાર વિશાળ હતો અને બજારમાં સકારાત્મક ભાવના સ્પષ્ટપણે દેખાઈ રહી હતી. રજાઓ-ટૂંકા સપ્તાહ દરમિયાન ભારતીય શેરબજારોમાં સકારાત્મક વલણ રહ્યું, વૈશ્વિક બજારોના મિશ્ર સંકેતો છતાં શુક્રવારે પણ તેજી ચાલુ રહી. સોમવારે આઇટી અને મેટલ શેરોમાં ખરીદીને કારણે તેજી જોવા મળી.
30 શેરો વાળા બીએસઈ સેન્સેક્સ 216 પોઈન્ટના વધારા સાથે 85,145.90 પર ખુલ્યો. દિવસ દરમિયાન, ઈન્ડેક્સ 85,601.33ની ઊંચી સપાટી અને 85,145.86ની નીચી સપાટીએ ટ્રેડ થયો. સેન્સેક્સ 638.12 પોઈન્ટ અથવા 0.75 ટકાના વધારા સાથે 85,567.48 પર બંધ થયો.
એ જ રીતે, નિફ્ટી-50 ઈન્ડેક્સ 26,055.85 પર ખુલ્યો. દિવસ દરમિયાન, ઈન્ડેક્સ 26,180.70ની ઊંચી અને 26,047.80ની નીચી સપાટીએ ટ્રેડ થયો. નિફ્ટી-50 206 પોઈન્ટ અથવા 0.79% વધીને 26,172 પર બંધ થયો.
બજારમાં સૌથી વધુ નફો કરનારા અને નુકસાન કરનારા શેર
બીએસઈ પર, ટ્રેન્ટ, ઈન્ફોસિસ અને ભારતી એરટેલ સૌથી વધુ નફો કરનારા શેર હતા, જ્યારે એસબીઆઇ, કોટક મહિન્દ્રા બેંક અને લાર્સન એન્ડ ટુબ્રો બજારમાં સૌથી વધુ ઘટાડાનો સામનો કરી રહ્યા હતા. એનએસઈ પર ટ્રેન્ટ, શ્રીરામ ફાઈનાન્સ અને વિપ્રો સૌથી વધુ વધ્યા હતા, જ્યારે એચડીએફસી લાઇફ, ટાટા કન્ઝ્યુમર અને એસબીઆઇ સૌથી વધુ ઘટ્યા હતા.
બ્રોડર માર્કેટ્સ એટલે કે વ્યાપક બજારોમાં પણ તેજી જોવા મળી. નિફ્ટી સ્મોલકેપ 100 ઈન્ડેક્સમાં 1.17%નો ઉછાળો આવ્યો, જ્યારે નિફ્ટી મિડકેપ 100 ઈન્ડેક્સમાં 0.84%નો વધારો થયો.
ક્ષેત્રવાર પ્રદર્શનના આધારે જોવામાં આવે તો નિફ્ટી આઇટી ઇન્ડેક્સ શ્રેષ્ઠ પ્રદર્શન કરતો સૂચકાંક હતો, જે 2.06% વધ્યો હતો. ત્યારબાદ મેટલ્સ સેક્ટરનો ક્રમ આવે છે, જેમાં 1.41% વધારો થયો હતો. દરમિયાન, નિફ્ટી કન્ઝ્યુમર ડ્યુરેબલ્સ એકમાત્ર ક્ષેત્રીય સૂચકાંક હતો જેમાં 0.16% ઘટાડો થયો હતો.
જિયોજીત ઈન્વેસ્ટમેન્ટ લિમિટેડના રીસર્ચ વિભાગના હેડ વિનોદ નાયરે જણાવ્યું હતું કે, ભારતીય શેરબજારમાં વર્ષના અંત સુધી તેજી રહી છે. મજબૂત પ્રવાહિતા અને વૈશ્વિક સંકેતો આ તેજીને આગળ ધપાવી રહ્યા છે. મહત્વપૂર્ણ વાત એ છે કે, 2026 માં યુએસ સેન્ટ્રલ બેંક, ફેડરલ રિઝર્વ દ્વારા વધુ દર ઘટાડાની અપેક્ષાઓ વૃદ્ધિને ટેકો આપી રહી છે. તેમણે જણાવ્યું કે, રોકાણકારો એટલે કે એફઆઇઆઇએ ફરી એકવાર લેવાલી શરૂ કરી દીધી છે. એફઆઇઆઇ નેટ બાયર્સ બનવાને કારણે બજારનો માહોલ પોઝિટિવ બન્યો છે. સેક્ટરની વાત કરવામાં આવે તો આઇટી અને મેટલ શેરોમાં સૌથી વધારે લેવાલી જોવા મળી હતી. એના કારણે ઈન્ડેક્સ ઉપર ખેંચવામાં મદદ મળી હતી.
આગળની વાત કરવામાં આવે તો રોકાણકારોની નજર હવે ત્રીજા ક્વાર્ટરના જીડીપીના આંકડા પર ટકેલી છે. બજારને આશા છે કે, ગ્રોથ મજબૂત રહેશે. તેના કારણે પોલિસિને લઇને સ્પષ્ટ ચિત્ર મળશે. જો નાયરે જણાવ્યું હતું કે, હજુ પૂરી રીતે નિશ્ચિંત થવાની જરૂર નથી. ટ્રેડ ડીલ્સ પર મર્યાદિત પ્રગતિ, ભૂ-રાજનીતિક એનિશ્ચિતતા, અને ક્રુડ ઓઇલના ભાવમાં ઉથલપાથલ હજુ પણ ચિંતાનું કારણ છે.
પહેલું કારણ: એફઆઇઆઇ અને ડીઆઇઆઇ દ્વારા મજબૂત ખરીદી.
બજારમાં તેજીનું સૌથી મોટું કારણ વિદેશી અને સ્થાનિક રોકાણકારો દ્વારા ખરીદી હતી. સતત ત્રીજા દિવસે, એફઆઇઆઇ, અથવા વિદેશી સંસ્થાકીય રોકાણકારોએ ભારતીય શેરબજારમાં વિશ્વાસ દર્શાવ્યો, લગભગ રૂપિયા 1,831 કરોડના શેર ખરીદ્યા.
દરમિયાન, ડીઆઈઆઈ (ઘરેલું સંસ્થાકીય રોકાણકારો)એ પણ ઉત્સાહપૂર્વક રૂપિયા 5,723 કરોડની ચોખ્ખી ખરીદી કરી. જ્યારે એફઆઈઆઈ અને ડીઆઈઆઈ બંને એકસાથે ખરીદી કરે છે, ત્યારે મજબૂત બજાર લગભગ નિશ્ચિત છે.
બીજુ કારણ રૂપિયાની મજબૂતિથી વિશ્વાસ પાછો ફર્યો
ડોલર સામે રૂપિયામાં પણ મજબૂતિ જોવા મળી હતી. રૂપિયો લગભગ 22 પૈસા મજબૂત થઈને 89.45 પર પહોંચ્યો. બજારની ભાવના એવી હતી કે ચલણને રિઝર્વ બેંક ઓફ ઈન્ડિયા (આરબીઆઇ)ના હસ્તક્ષેપથી ટેકો મળ્યો છે. મજબૂત રૂપિયો વિદેશી રોકાણકારો માટે સકારાત્મક સંકેત છે, કારણ કે તે મૂડી બહાર જવાનું જોખમ ઘટાડે છે.
ત્રીજું કારણ: વૈશ્વિક સેન્ટિમેન્ટથી વધારો
વૈશ્વિક સેન્ટિમેન્ટથી પણ બજારને ફાયદો થયો. યુએસમાં સીપીઆઈ ડેટા અપેક્ષા કરતા નરમ હતો, જેનાથી ફેડરલ રિઝર્વ દ્વારા દર ઘટાડાની અપેક્ષાઓ મજબૂત થઈ. તેની અસર વોલ સ્ટ્રીટ પર દેખાઈ, જ્યાં ટેક શેરોમાં જોરદાર તેજી જોવા મળી. એશિયન બજારો પણ લીલા રંગમાં ટ્રેડ થતા જોવા મળ્યા, જેનાથી ભારતીય બજારને પણ ટેકો મળ્યો.
ચોથું કારણ આઇટી સેક્ટરમાં મોટા પાયે લેવાલી
આઇટી શેરોએ બજારમાં તેજીનું નેતૃત્વ કર્યું. ઈન્ફોસિસ અને વિપ્રો જેવા મુખ્ય શેરોમાં મજબૂત ખરીદી જોવા મળી. આનું મુખ્ય કારણ વૈશ્વિક આઈટી કંપની એક્સેન્ચરના Q1 પરિણામો હતા, જે બજારની અપેક્ષાઓ કરતાં વધુ સારા હતા. આનાથી આઇટી ક્ષેત્રના દૃષ્ટિકોણમાં રોકાણકારોનો વિશ્વાસ વધ્યો.
પાંચમુ કારણ આરબીઆઇ રેટમાં ઘટાડાના આશા
આરબીઆઇની એમપીસી મીટિંગ મિનિટ્સમાં રેટ ઘટાડાનો સંકેત મળી રહ્યો છે. તેથી આગળ ઉપર વ્યાજ ઘટાડાની અપેક્ષા છે. ઈક્વિટી માર્કેટ માટે દર ઘટાડાની અપેક્ષા હંમેશા હકારાત્મક માનવામાં આવે છે, કારણ કે તેનાથી લોન સસ્તી થાય છે અને કંપનીઓની આવકમાં વધારો થવાની સંભાવના રહે છે.