સંજય મલ્હોત્રા RBIના નવા ગવર્નર, શક્તિકાંત દાસના કાર્યકાળનો આવતીકાલે અંતિમ દિવસ

મહેસૂલ સચિવ સંજય મલ્હોત્રાની આરબીઆઈના નવા ગવર્નર તરીકે નિમણૂક કરવામાં આવી છે, મલ્હોત્રા હવે આરબીઆઈના વર્તમાન ગવર્નર શક્તિકાંત દાસનું સ્થાન લેશે. તમને જણાવી દઈએ કે, RBI ગવર્નર શક્તિકાંત દાસનો કાર્યકાળ 10 ડિસેમ્બરે સમાપ્ત થઈ રહ્યો છે. સંજય મલ્હોત્રા રાજસ્થાન કેડરના 1990 બેચના IAS અધિકારી છે. સંજય મલ્હોત્રા RBIના 26મા ગવર્નર હશે.

સંજય મલ્હોત્રા રાજસ્થાન કેડરના 1990 બેચના IAS અધિકારી છે. નવેમ્બર 2020માં RECના અધ્યક્ષ અને MD બન્યા. આ પહેલા તેઓ ઉર્જા મંત્રાલયમાં અધિક સચિવ હતા. વર્ષ 2022માં, નાણાકીય સેવાઓ વિભાગ (DFS) ના સચિવ સંજય મલ્હોત્રાને કેન્દ્ર સરકાર દ્વારા રિઝર્વ બેંક (RBI) ના ડિરેક્ટર તરીકે નામાંકિત કરવામાં આવ્યા હતા.

સંજય મલ્હોત્રા લાંબો અનુભવ ધરાવે છે

સંજય મલ્હોત્રા 11 ડિસેમ્બરે આરબીઆઈના નવા ગવર્નર તરીકે કાર્યભાર સંભાળશે. તેમનો કાર્યકાળ આગામી 3 વર્ષનો રહેશે. સંજય મલ્હોત્રા ભારતીય રિઝર્વ બેંકના 26મા ગવર્નર હશે. વાસ્તવમાં, રિઝર્વ બેંકનું કામકાજ સેન્ટ્રલ બોર્ડ ઓફ ડિરેક્ટર્સ દ્વારા જોવામાં આવે છે, અને આવી સ્થિતિમાં, સંજય મલ્હોત્રાને આ કામનો લાંબો અનુભવ છે, તેથી તેઓ આરબીઆઈના ગવર્નરની રેસમાં સૌથી આગળ રહ્યા.

સંજય મલ્હોત્રાને રાજ્ય અને કેન્દ્ર સરકાર બંને સ્તરે નાણા અને કરવેરાનો બહોળો અનુભવ છે. તેમના વર્તમાન કાર્યકાળમાં તેઓ પ્રત્યક્ષ અને પરોક્ષ કરને લગતી નીતિઓ બનાવવામાં મહત્વની ભૂમિકા ભજવી રહ્યા હતા.

સંજય મલ્હોત્રાનું શિક્ષણ

સંજય મલ્હોત્રાએ IIT કાનપુરમાંથી એન્જિનિયરિંગની ડિગ્રી મેળવી છે. જ્યારે તેમણે પ્રિન્સટન યુનિવર્સિટીમાંથી માસ્ટર ડિગ્રી મેળવી હતી. છેલ્લા 30 વર્ષથી, મલ્હોત્રાએ પાવર, ફાઇનાન્સ, ટેક્સેશન, આઇટી અને ખાણ જેવા વિભાગોમાં સેવા આપી છે.