આજે લોન્ચ થશે NPS વાત્સલ્ય યોજના, જાણો કોણ કરી શકશે ઈન્વેસ્ટ, રોકાણ મર્યાદા સહિતની વિગતો

નાણામંત્રી નિર્મલા સીતારમણ બાળકોના ભવિષ્યને ધ્યાનમાં રાખીને આજે એટલે કે 18મી સપ્ટેમ્બરે એક નવી યોજના શરૂ કરવા જઈ રહ્યા છે. આ યોજનાને 'NPS વાત્સલ્ય' નામ આપવામાં આવ્યું છે. નાણામંત્રીએ બજેટ 2024 દરમિયાન આ અંગેની જાહેરાત કરી હતી. આ યોજના હેઠળ માતા-પિતા અથવા વાલીઓ તેમના બાળકોના ભવિષ્યને ધ્યાનમાં રાખીને રોકાણ કરી શકે છે. આ યોજના એ ઉદ્દેશ્યથી શરૂ કરવામાં આવી છે કે, જ્યારે બાળકો મોટા થાય ત્યારે તેમની પાસે પૈસા હોય. આ સરકારી યોજના વિશે તમારા મનમાં પણ પ્રશ્ન થશે કે NPS વાત્સલ્યમાં કોણ રોકાણ કરી શકે છે? NPS વાત્સલ્યમાં લઘુત્તમ અને મહત્તમ કેટલું રોકાણ કરી શકાય છે? NPS વાત્સલ્યનું સંચાલન કોણ કરશે? શું તમારું બાળક 18 વર્ષનું થઈ જાય પછી પણ NPS વાત્સલ્ય ચાલુ રાખી શકે? ચાલો જાણીએ આ તમામ પ્રશ્નોના જવાબો...

કોણ મેનેજ કરશે NPS વાત્સલ્ય યોજના?

દેશનો કોઈપણ નાગરિક તેના બાળક માટે NPS વાત્સલ્ય યોજનામાં રોકાણ કરી શકે છે. જ્યારે બાળક મોટો થાય છે, તે ઇચ્છે તો યોજના ચાલુ રાખી શકે છે. બાળકના માતા-પિતા અથવા વાલી પણ આ યોજનામાં રોકાણ કરી શકે છે. આ યોજના પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA) દ્વારા સંચાલિત કરવામાં આવશે. જ્યારે કોઈપણ માતા-પિતા તેમના બાળકો માટે NPS વાત્સલ્ય યોજનામાં રોકાણ કરે છે, ત્યારે તેમને ઘણા બધા વિકલ્પોમાંથી કોઈપણ એકમાં રોકાણ કરવાનો વિકલ્પ મળે છે. આ તમામ રોકાણ વિકલ્પોને સરકારે મંજૂરી આપી દીધી છે. 

NPS વાત્સલ્યમાં રોકાણની મર્યાદા

સેન્ટ્રલ બેંક ઓફ ઈન્ડિયાની વેબસાઈટ અનુસાર, NPS વાત્સલ્યમાં રોકાણના ચાર વિકલ્પો છે. જો તમે પણ તમારા બાળક માટે NPS વાત્સલ્ય યોજનામાં રોકાણ કરવા ઈચ્છો છો, તો તમારે દર વર્ષે ઓછામાં ઓછા 1000 રૂપિયાનું રોકાણ કરવું પડશે. પરંતુ જો તમારે વધુ રોકાણ કરવું હોય તો તમે ઈચ્છો તેટલા પૈસા રોકાણ કરી શકો છો. એટલે કે તેની મહત્તમ મર્યાદાની કોઈ મર્યાદા નથી. જો તમે તમારા બાળકના નામે જમા કરાવેલા પૈસામાંથી અમુક પૈસા ઉપાડવા માગતા હોવ તો તમારે રોકાણની તારીખથી ત્રણ વર્ષ સુધી રાહ જોવી પડશે. તે પછી તમે તેમાંથી 25 ટકા સુધી પૈસા ઉપાડી શકો છો. આ પૈસા શિક્ષણ અથવા કોઈપણ રોગની સારવાર માટે ઉપાડી શકાય છે. આ સિવાય 75 ટકાથી વધુ વિકલાંગતાના કિસ્સામાં પૈસા ઉપાડી શકાય છે. તમારું બાળક 18 વર્ષનું થાય ત્યાં સુધી તમે આ ત્રણ વખત કરી શકો છો.

ક્યારે અને કેટલી ઉપાડી શકાય જમા કરેલી રકમ

જો તમે તમારા બાળકના નામે NPS વાત્સલ્ય યોજનામાં રોકાણ કર્યું છે, તો જ્યારે તે 18 વર્ષનો થાય ત્યારે તમે આ યોજનામાંથી બહાર નીકળી શકો છો. જો બાળકના ખાતામાં 2.5 લાખ અથવા તેનાથી ઓછા રૂપિયા છે, તો તમે એક જ વારમાં આખી રકમ ઉપાડી શકો છો. પરંતુ જો તે 2.5 લાખ રૂપિયાથી વધુ હોય તો તમે એક જ વારમાં 20% પૈસા ઉપાડી શકો છો. બાકીના પૈસાથી તમે નિયમિત આવક માટે વાર્ષિકી ખરીદી શકો છો. જેના કારણે તમને દર મહિને કેટલાક પૈસા મળશે. આ સિવાય જેઓ તેમના બાળકો માટે NPS વાત્સલ્યમાં રોકાણ કરે છે તેમની પાસે અન્ય વિકલ્પો પણ છે. જ્યારે તમારું બાળક 18 વર્ષનું થાય, ત્યારે તમે તે યોજના ચાલુ રાખી શકો છો. NPS વાત્સલ્યને NPS ટિયર-1 (બધા નાગરિકો)માં રૂપાંતરિત કરવામાં આવશે. બાળક 18 વર્ષ પૂર્ણ કરે તે પછી તમારે ત્રણ મહિનામાં ફરીથી KYC પૂર્ણ કરવું પડશે.