Meeshoનો આ વર્ષે આવી શકે છે IPO, ₹8500 કરોડ એકત્ર કરવાની છે યોજના
ભારતીય ઈ-કોમર્સ કંપની Meesho પણ હવે શેરબજારમાં પ્રવેશવાની તૈયારી કરી રહી છે. કંપનીએ તેની પ્રાર
ભારતીય ઈ-કોમર્સ કંપની Meesho પણ હવે શેરબજારમાં પ્રવેશવાની તૈયારી કરી રહી છે. કંપનીએ તેની પ્રારંભિક જાહેર ઓફર (IPO) લાવવાની તૈયારીઓ તેજ કરી દીધી છે. આ બાબતથી વાકેફ સૂત્રોએ જણાવ્યું હતું કે IPOનું કદ લગભગ $1 બિલિયન (લગભગ રૂ. 8,500 કરોડ) હોઈ શકે છે. એટલું જ નહીં, કંપનીએ તેના IPO માટે રોકાણ સલાહકાર તરીકે મોર્ગન સ્ટેનલી, કોટક મહિન્દ્રા કેપિટલ અને સિટીની નિમણૂક કરી દીધી છે.જો આ યોજના સફળ થશે, તો Meesho વોલમાર્ટ સમર્થિત Flipkart પહેલાં ભારતીય શેરબજારમાં પ્રવેશ કરશે.
બજારમાં મોટી લિસ્ટિંગની તૈયારી
Meeshoએ તેના IPO માટે મોર્ગન સ્ટેનલી, કોટક મહિન્દ્રા કેપિટલ અને સિટીને સલાહકાર તરીકે નિયુક્ત કર્યા છે. આ ઉપરાંત, જેપી મોર્ગનને પણ આ પ્રક્રિયામાં સામેલ કરી શકાય છે. જો Meesho 10 બિલિયન ડોલરના મૂલ્યાંકન પર લિસ્ટ થાય છે, તો કંપનીનું મૂલ્ય 2024ના 3.9 બિલિયન ડોલરથી 2.5 ગણું વધશે. આ લિસ્ટિંગ પછી, Meesho એવા ભારતીય સ્ટાર્ટઅપ્સની યાદીમાં જોડાશે જે તેમના ભંડોળ મૂલ્યાંકન કરતાં વધુ કિંમતે લિસ્ટિંગ કરવાની યોજના બનાવી રહ્યા છે, જેમ કે ફિઝિક્સવાલા, એથર અને લેન્સકાર્ટ.
કમાણીમાં વધારો અને નુકસાનમાં ઘટાડો
Meeshoએ 2015 માં ઈ-કોમર્સ ક્ષેત્રમાં મોડી એન્ટ્રી કરનાર ખેલાડી તરીકે પ્રવેશ કર્યો હતો, પરંતુ આજે તે ફ્લિપકાર્ટ અને એમેઝોન જેવી દિગ્ગજોને સખત સ્પર્ધા આપી રહ્યું છે. ખાસ કરીને ટાયર-3 અને નાના શહેરોમાં તેની પકડ મજબૂત બની છે. Meesho એવા ગ્રાહકો પર ધ્યાન કેન્દ્રિત કરે છે જેઓ ઓછી કિંમતના ઉત્પાદનો પસંદ કરે છે. છેલ્લા કેટલાક વર્ષોમાં Meeshoએ તેની આવક અને નફાકારકતામાં જબરદસ્ત સુધારો જોયો છે.
Meeshoની આવક નાણાકીય વર્ષ 2022 માં ₹3,240 કરોડ હતી, જે નાણાકીય વર્ષ 2023 માં ₹5,735 કરોડ અને નાણાકીય વર્ષ 2024 માં ₹7,615 કરોડ સુધી પહોંચી ગઈ.
નાણાકીય વર્ષ 22 માં કંપનીનું ચોખ્ખું નુકસાન ₹3,248 કરોડ હતું, પરંતુ નાણાકીય વર્ષ 24 માં તે ઘટીને ₹305 કરોડ થયું.
IPO પહેલાં, Meeshoએ તેનું મુખ્ય મથક ડેલવેર, યુએસએથી ભારતમાં ખસેડવું પડશે. આ પ્રક્રિયા અદ્યતન તબક્કામાં છે અને કંપનીએ રિવર્સ મર્જર હેઠળ રૂ. 2,500 કરોડનો ટેક્સ ચૂકવવો પડશે.
