કાર ખરીદવી હવે મોંઘી! આજથી દેશમાં લાગુ થશે 5 મોટા ફેરફાર, જાણો તમારા ખિસ્સા પર કેટલી થશે અસર
છેલ્લું અપડેટ : 01 Jun 2026
Rule Change From 1st June : આજથી જૂન મહિનાની શરૂઆત થઈ ગઈ છે અને મહિનાના પહેલા જ દિવસે દેશમાં પાંચ મોટા આર્થિક અને નાણાકીય ફેરફારો (Financial Rule Changes) લાગુ થઈ ગયા છે. આ ફેરફારોની સીધી અસર સામાન્ય જનતાના ઘરના બજેટ અને ખિસ્સા પર પડવાની છે. એક તરફ હોટેલ-રેસ્ટોરન્ટના વેપારીઓ પર મોંઘવારીનો માર પડ્યો છે, તો બીજી તરફ કાર ખરીદવી પણ મોંઘી થઈ ગઈ છે. આ સિવાય UPI પેમેન્ટ અને બેંકિંગ ક્ષેત્રે પણ મહત્વના નિયમો બદલાયા છે.
આજથી અમલમાં આવેલા આ 5 મોટા ફેરફારો વિશે વિગતે જાણો:
1. એલપીજી સિલિન્ડરના ભાવમાં વધારો અને નવો સરન્ડર નિયમ
ઓઇલ માર્કેટિંગ કંપનીઓએ દર મહિનાની જેમ 1 જૂન 2026ના રોજ એલપીજી સિલિન્ડરના નવા દરો જાહેર કર્યા છે. 14.2 કિલોગ્રામના ઘરેલું રાંધણ ગેસના ભાવમાં કોઈ ફેરફાર કરાયો નથી, પરંતુ ૧૯ કિલોના કોમર્શિયલ એલપીજી સિલિન્ડરના ભાવમાં વર્ષ ૨૦૨૬માં આ સાતમી વખત વધારો કરવામાં આવ્યો છે ઉ.દિલ્હીમાં કોમર્શિયલ સિલિન્ડર ₹42 મોંઘો થઈને ₹3113.50 અને કોલકાતામાં ₹52.50 વધીને નવી કિંમતે મળશે. પેટ્રોલિયમ મંત્રાલયના નવા નિયમ મુજબ, જો કોઈ ગ્રાહકના ઘરે પીએનજી (PNG) કનેક્શન લાગી ગયું છે, તો તેણે 30 દિવસની સમયમર્યાદા (Deadline) ની અંદર પોતાનું એલપીજી (LPG) કનેક્શન સરન્ડર કરવું પડશે.
2. મારુતિ સુઝુકીની કારો થઈ મોંઘી
જો તમે નવી કાર ખરીદવાનું વિચારી રહ્યા છો, તો મોટો ઝટકો લાગશે. દેશની સૌથી મોટી કાર નિર્માતા કંપની મારુતિ સુઝુકીએ (Maruti Suzuki) પોતાની કારોની કિંમતોમાં વધારો ઝીંક્યો છે, જે આજથી લાગુ થઈ ગયો છે. કંપનીએ ઓલ્ટો (Alto) થી લઈને બ્રેઝા (Brezza) અને વિક્ટોરિસ (Victoris) સહિતના વિવિધ મોડલ્સ મોંઘા કર્યા છે. અલગ-અલગ મોડલ પર મહત્તમ ₹30,000 સુધીનો વધારો કરવામાં આવ્યો છે.
3. HDFC બેંકના કરન્ટ એકાઉન્ટના નિયમો અને ચાર્જ બદલાયા
એચડીએફસી બેંકે (HDFC Bank) કરન્ટ એકાઉન્ટ સહિત અન્ય ખાતાઓ માટે નાના મૂલ્યની નોટો અને સિક્કા જમા કરાવવાના નિયમો કડક કર્યા છે. હવે ₹20 કે તેથી ઓછી કિંમતની નોટો જમા કરાવવા માટે પ્રતિ માસ ₹10,000ની લિમિટ અને સિક્કા જમા કરાવવા માટે પ્રતિ માસ ₹5000ની લિમિટ નક્કી કરવામાં આવી છે. જો ગ્રાહક આ નક્કી કરેલી લિમિટ કરતાં વધુ રકમ જમા કરાવશે, તો એક્સ્ટ્રા જમા રકમ પર 2 ટકા વધારાનો ચાર્જ વસૂલવામાં આવશે. (આ પહેલાં કોઈ મિક્સ મંથલી લિમિટ નહોતી પરંતુ નોટો પર 4% અને સિક્કા પર 5% ચાર્જ લાગતો હતો જે હવે બદલાયો છે).
4. સોલાર પેનલ મોંઘી થવાની આશંકા
સોલાર પેનલ સેક્ટરમાં આજથી ગુણવત્તા જાળવી રાખવા માટે નવો નિયમ અમલી બન્યો છે. 1 જૂન 2026થી સોલાર પેનલ માટેની માન્ય મોડલ અને મેન્યુફેક્ચરર્સ લિસ્ટ (ALMM List-II) ફરજિયાત બનશે. હવે તમામ સરકારી યોજનાઓ અને સબસિડી વાળા પ્રોજેક્ટ્સમાં આ લિસ્ટમાં સામેલ ગુણવત્તાયુક્ત સોલાર મોડ્યુલ અને સેલનો જ ઉપયોગ કરી શકાશે. આ કડક ક્વોલિટી ચેકને કારણે આગામી દિવસોમાં સોલાર પેનલના ભાવ વધવાની પૂરેપૂરી આશંકા છે.
5. UPI ટ્રાન્ઝેક્શન માટે નવો સુરક્ષા નિયમ
ઓનલાઇન ફ્રોડ અને ભૂલથી ખોટા ખાતામાં પૈસા ટ્રાન્સફર થવાની સમસ્યાને અટકાવવા માટે નેશનલ પેમેન્ટ્સ કોર્પોરેશન ઓફ ઇન્ડિયા (NPCI) એ મોટો ફેરફાર કર્યો છે. હવે કોઈપણ ઓનલાઇન પેમેન્ટ પ્લેટફોર્મ (જેમ કે Google Pay, PhonePe, Paytm વગેરે) દ્વારા UPI ટ્રાન્ઝેક્શન કરતી વખતે, યુઝર પોતાનો PIN સબમિટ કરે તે પહેલાં જ જે-તે વ્યક્તિના બેંક ખાતામાં નોંધાયેલું સાચું નામ સ્ક્રીન પર દેખાશે. આ સુવિધાથી ખોટા ખાતામાં પૈસા મોકલવાની ભૂલો નહિવત થઈ જશે.
