કંપનીઓ માટે મોટી રાહત! MCAએ FY26ની વાર્ષિક ફાઇલિંગની સમયમર્યાદા વધારી, વધારાની ફી માફ

કંપનીઓ અને વ્યવસાયિકો માટે મહત્વના સમાચાર સામે આવ્યા છે. કોર્પોરેટ બાબતોના મંત્રાલય (Ministry of Corporate Affairs – MCA)એ નાણાકીય વર્ષ 2025-26 (FY26) માટે નાણાકીય સ્ટેટમેન્ટ અને વાર્ષિક રિટર્ન (Annual Return) ફાઇલ કરવાની સમયમર્યાદા વધારી છે. આ સાથે નિર્ધારિત સમયગાળામાં ફાઇલિંગ કરનાર કંપનીઓને વધારાની ફી (Additional Fees)માંથી પણ રાહત આપવામાં આવી છે.

મંત્રાલયે 24 ઓક્ટોબર, 2026ના રોજ જાહેર કરેલા પરિપત્રમાં આ નિર્ણયની જાણ કરી હતી. MCAના પોર્ટલ પર ટેક્નિકલ સમસ્યાઓ અને ફાઇલિંગમાં પડતી મુશ્કેલીઓ અંગે કંપનીઓ તથા વ્યાવસાયિકો દ્વારા રજૂઆતો કરવામાં આવી હતી. ત્યારબાદ આ રાહત આપવામાં આવી છે.

નાણાકીય સ્ટેટમેન્ટ માટે 31 ડિસેમ્બર સુધીનો સમય

MCAના નિર્ણય અનુસાર, કંપનીઓ હવે નાણાકીય સ્ટેટમેન્ટ ફાઇલ કરવા માટે 31 ડિસેમ્બર, 2026 સુધીનો સમય મેળવી શકશે. આ માટે AOC-4ના વિવિધ ફોર્મનો ઉપયોગ થાય છે. તેમાં કન્સોલિડેટેડ નાણાકીય સ્ટેટમેન્ટ, XBRL ફોર્મેટમાં ડિજિટલ રિપોર્ટિંગ અને લાગુ પડતા નોન-બેંકિંગ ફાઇનાન્સિયલ કંપની (NBFC) સંબંધિત ફોર્મનો સમાવેશ થાય છે.

આ સમયમર્યાદામાં ફાઇલિંગ કરનાર કંપનીઓ પાસેથી વધારાની ફી વસૂલવામાં નહીં આવે.

વાર્ષિક રિટર્ન માટે 31 જાન્યુઆરી, 2027 છેલ્લી તારીખ

કંપનીઓના વાર્ષિક રિટર્ન (Annual Return) ફાઇલ કરવા માટેની સમયમર્યાદા પણ વધારવામાં આવી છે. હવે MGT-7 અને MGT-7A ફોર્મ 31 જાન્યુઆરી, 2027 સુધી વધારાની ફી વિના ફાઇલ કરી શકાશે.

MGT-7નો ઉપયોગ સામાન્ય કંપનીઓના વાર્ષિક રિટર્ન માટે થાય છે, જ્યારે MGT-7A ખાસ કરીને એક વ્યક્તિની કંપનીઓ (One Person Companies) અને નાની કંપનીઓ માટે છે.

MCA પોર્ટલની સમસ્યાઓને કારણે નિર્ણય

કંપની સેક્રેટરીઓ અને અન્ય નિષ્ણાતોએ MCA-21 વર્ઝન 3 પોર્ટલ (MCA-21 Version 3 Portal)માં વારંવાર આવતી ટેક્નિકલ સમસ્યાઓ અંગે ચિંતા વ્યક્ત કરી હતી. તેમાં પોર્ટલ ધીમું ચાલવું, વારંવાર લૉગઆઉટ થવું, લૉગિનમાં મુશ્કેલી, ડિજિટલ સિગ્નેચર સર્ટિફિકેટ (DSC) જોડવામાં અડચણ અને ફોર્મ વેલિડેશનમાં ભૂલો જેવી સમસ્યાઓનો સમાવેશ થાય છે.

ઇન્સ્ટિટ્યૂટ ઑફ કંપની સેક્રેટરીઝ ઑફ ઇન્ડિયા (ICSI)એ પણ સમયમર્યાદા વધારવાની રજૂઆત કરી હતી.

AGMની સમયમર્યાદામાં ફેરફાર નહીં

જોકે, MCAએ સ્પષ્ટ કર્યું છે કે આ રાહત વાર્ષિક સામાન્ય સભા (Annual General Meeting – AGM) યોજવાની કાયદાકીય સમયમર્યાદાને લાગુ પડતી નથી. એટલે કંપનીઓએ AGM સંબંધિત નિયમોનું પાલન અગાઉથી નિર્ધારિત સમયમર્યાદા મુજબ જ કરવાનું રહેશે.