અઠવાડિયાના અંતે શેરબજારમાં રોનક, સેન્સેક્સ અને નિફ્ટી મજબૂત ઉછાળા સાથે બંધ
છેલ્લું અપડેટ : 10 Jul 2026
અઠવાડિયાના છેલ્લા ટ્રેડિંગ દિવસે સ્થાનિક શેરબજારમાં શાનદાર તેજી જોવા મળી છે. વૈશ્વિક બજારોમાંથી મળેલા સકારાત્મક સંકેતો અને આઈટી શેરોમાં ખરીદીના જોરે સેન્સેક્સ અને નિફ્ટી બંને મજબૂત ઉછાળા સાથે બંધ થયા. ખાસ કરીને PSU બેંક, રિયલ્ટી અને આઈટી સેક્ટરના શેરોએ બજારની તેજીમાં મહત્વની ભૂમિકા ભજવી.
સેન્સેક્સ અને નિફ્ટીમાં એક ટકાથી વધુનો ઉછાળો
બીએસઈનો ૩૦ શેરોવાળો સેન્સેક્સ ૮૨૭.૦૯ પોઈન્ટ એટલે કે ૧.૦૮ ટકાના વધારા સાથે ૭૭,૫૬૯.૩૯ ના સ્તરે બંધ થયો. જ્યારે એનએસઈનો નિફ્ટી ૫૦ ૨૪૪.૧૦ પોઈન્ટ એટલે કે ૧.૦૨ ટકા વધીને ૨૪,૨૦૬.૯૦ પર બંધ થયો.
TCSના પરિણામોથી આઈટી શેરોને ટેકો મળ્યો
બજારની તેજીમાં આઈટી સેક્ટરનું મહત્વનું યોગદાન રહ્યું. ટીસીએસના પ્રથમ ક્વાર્ટરના પરિણામો આવ્યા બાદ આઈટી શેરોમાં ખરીદી વધી, જેનાથી રોકાણકારોનો ભરોસો મજબૂત થયો. આ સિવાય વૈશ્વિક બજારોમાં તેજીની અસર પણ સ્થાનિક બજાર પર જોવા મળી.
વૈશ્વિક બજારોમાંથી સકારાત્મક સંકેત મળ્યા. દુનિયાભરના શેરબજારોમાં ચિપ (સેમિકન્ડક્ટર) કંપનીઓના શેરોમાં આવેલી તેજીના કારણે વૈશ્વિક ઈક્વિટી બજારોમાં મજબૂતી જોવા મળી. આ જ સકારાત્મક માહોલનો ફાયદો ભારતીય બજારને પણ મળ્યો અને મુખ્ય સૂચકાંકો સતત બીજા દિવસે વધારા સાથે બંધ થયા.
આ શેરોમાં સૌથી વધુ મજબૂતી જોવા મળી
નિફ્ટી ૫૦ ઈન્ડેક્સમાં જિયો ફાઈનાન્સિયલ સર્વિસીસ, એચડીએફસી લાઈફ ઈન્સ્યોરન્સ અને એસબીઆઈ લાઈફ ઈન્સ્યોરન્સના શેર સૌથી વધુ વધારો નોંધાવનારા શેરોમાં સામેલ રહ્યા.
સેક્ટરોની સ્થિતિ
સેક્ટોરલ ઈન્ડેક્સની વાત કરીએ તો નિફ્ટી રિયલ્ટી અને નિફ્ટી PSU બેંક ઈન્ડેક્સમાં સૌથી વધુ તેજી જોવા મળી. બંને ઈન્ડેક્સ ૩ ટકાથી વધુના ઉછાળા સાથે બંધ થયા, જે આ સેક્ટરોમાં મજબૂત ખરીદીનો સંકેત આપે છે. જ્યારે નિફ્ટી આઈટી ઈન્ડેક્સ પણ ૧.૯૬ ટકા વધીને બંધ થયો, જેને ટીસીએસના ત્રિમાસિક પરિણામોથી સપોર્ટ મળ્યો. બીજી તરફ, નિફ્ટી FMCG સિવાયના તમામ મુખ્ય સેક્ટોરલ ઈન્ડેક્સ લીલા નિશાન પર બંધ થયા. FMCG સેક્ટરમાં હળવી વેચવાલી જોવા મળી, જ્યારે બાકીના સેક્ટરોમાં રોકાણકારોનું વલણ સકારાત્મક રહ્યું.
ફંડામેન્ટલ વ્યુ
જીઓજીત ઇન્વેસ્ટમેન્ટ્સના હેડ ઓફ રિસર્ચ વિનોદ નાયરના જણાવ્યા અનુસાર, તાજેતરના કરેક્શન પછી શેરબજાર ફરી એકવાર મજબૂત રિકવરી તરફ આગળ વધતું જોવા મળી રહ્યું છે. તેમનું કહેવું છે કે બેંકો તરફથી મળેલા સકારાત્મક બિઝનેસ અપડેટ્સ અને આઈટી સેક્ટર માટેના શ્રેષ્ઠ આઉટલુકે પ્રથમ ક્વાર્ટરના પરિણામોને લઈને રોકાણકારોનો ભરોસો વધાર્યો છે. વૈશ્વિક સ્તરે ખર્ચમાં સંભવિત સુધારો અને આર્ટિફિશિયલ ઇન્ટેલિજન્સ (AI) સાથે જોડાયેલી તકો પણ આઈટી સેક્ટર માટે સકારાત્મક સંકેતો છે. જો પ્રથમ ક્વાર્ટરના પરિણામો અપેક્ષા કરતાં વધુ સારા રહેશે, તો ભવિષ્યની કમાણી અંગેની ચિંતાઓ ઓછી થઈ શકે છે અને બજારની વર્તમાન તેજીને વધુ મજબૂતી મળી શકે છે. તેમના મતે રિયલ્ટી અને મેટલ જેવા સેક્ટર્સમાં વ્યાપક ખરીદી પણ આ તેજીને ટેકો આપી રહી છે. તેમણે એમ પણ જણાવ્યું કે ક્રૂડ ઓઈલના ભાવમાં નરમાઈ, ટેક્નોલોજી શેરોમાં સુધારો અને વિદેશી સંસ્થાકીય રોકાણકારો (FII)ની વધતી ખરીદી ભારતીય બજાર માટે સકારાત્મક સંકેતો છે. બીજી તરફ, અમેરિકા, યુરોપ અને ચીન તરફથી આવી રહેલા નબળા આર્થિક આંકડા એ તરફ ઈશારો કરે છે કે આગામી સમયમાં અગ્રણી સેન્ટ્રલ બેંકો વ્યાજદરમાં પોતાના કડક વલણને હળવું કરી શકે છે.
ટેકનિકલ વ્યુ
SBI સિક્યોરિટીઝના હેડ-ટેકનિકલ એન્ડ ડેરિવેટિવ્ઝ રિસર્ચ સુધીપ શાહનું કહેવું છે કે નિફ્ટીએ ગેપ-અપ શરૂઆત કરી હતી, પરંતુ સમગ્ર ટ્રેડિંગ સેશન દરમિયાન મર્યાદિત દાયરામાં કારોબાર કરીને ૨૪,૨૦૭ ના સ્તરે ૧.૦૨ ટકાના વધારા સાથે બંધ રહ્યો હતો. તેમના જણાવ્યા મુજબ, ચાર્ટ પર ઇન્ડેક્સે નાની બુલિશ કેન્ડલ બનાવી છે, જે ટ્રેડિંગ દરમિયાન થોડી અસમંજસનો સંકેત આપે છે. જો કે, નિફ્ટીએ ફરીથી તેની ૧૦૦-દિવસની એક્સપોનેન્શિયલ મુવિંગ એવરેજ (100-EMA) ઉપર તેજી મેળવી લીધી છે અને બુધવારે આવેલી ૫૧૬ પોઈન્ટના તીવ્ર ઘટાડાનો મોટો હિસ્સો રિકવર કરી લીધો છે. તેમણે ઉમેર્યું કે આરએસઆઈ (RSI)માં સુધારો એ દર્શાવે છે કે બજારમાં તેજીની ગતિ ધીમે ધીમે મજબૂત થઈ રહી છે. તેમના મતે, આગામી ટ્રેડિંગ સેશન્સમાં ૨૪,૩૫૦થી ૨૪,૪૦૦નું સ્તર નિફ્ટી માટે તાત્કાલિક રેઝિસ્ટન્સ રહેશે. જો ઇન્ડેક્સ આ રેન્જની ઉપર ટકવામાં સફળ રહેશે, તો નજીકના સમયમાં ૨૪,૫૫૦ અને ત્યારબાદ ૨૪,૭૦૦ ના સ્તર સુધી વધવાની શક્યતા છે. બીજી તરફ, ઘટાડાની સ્થિતિમાં ૨૪,૦૫૦ થી ૨૪,૦૦૦ ની રેન્જ નિફ્ટી માટે પ્રથમ મજબૂત સપોર્ટ ગણવામાં આવશે.
