Auto News : ભારતમાં 13 મહિનાથી લોકપ્રિય છે આ ઇલેક્ટ્રિક સ્કૂટર, વેચાયા 6 લાખ યુનિટ
છેલ્લું અપડેટ : 19 Jun 2025
TVSના ઇલેક્ટ્રિક સ્કૂટર iQubeના ભારતમાં અત્યાર સુધીમાં 6 લાખથી વધુ યુનિટ વેચાયા છે. પહેલા 3 લાખ યુનિટ વેચવામાં 52 મહિના લાગ્યા હતા, પરંતુ પછીના 3 લાખ યુનિટ ફક્ત 13 મહિનામાં વેચાઈ ગયા. આ iQube ની વધતી માંગ દર્શાવે છે, જે સતત બે મહિનાથી ભારતમાં નંબર 1 ઇલેક્ટ્રિક ટુ-વ્હીલર રહ્યું છે. આઇક્યુબ હવે ઇન્ડોનેશિયામાં પણ લોન્ચ થઈ રહ્યું છે. આ પગલું ટીવીએસની ઇન્ડોનેશિયામાં ખરીદદારોને લક્ષ્ય બનાવવાની વ્યૂહરચનાનો એક ભાગ છે, જ્યાં ટીવીએસની પેટાકંપની ટૂંક સમયમાં એસેમ્બલીનું કામ શરૂ કરશે.
TVS iQube, જે TVS Motor Companyનું પ્રથમ ઇલેક્ટ્રિક સ્કૂટર છે. આ સ્કૂટરે દેશમાં 6 લાખ યુનિટ વેચાણનો આંકડો પાર કરી દીધો છે. SIAMના ડેટા અનુસાર, એપ્રિલ 2025ના અંત સુધીમાં 6 લાખના આંકડે પહોંચવા માટે ફક્ત 1,345 યુનિટ બાકી હતા, જે મે 2025ના પહેલા બે દિવસમાં પૂર્ણ થયા હતા. મે મહિનાના આ બે દિવસમાં 27,642 યુનિટ વેચાયા હતા અને કુલ આંકડો 6,26,297 યુનિટ પર પહોંચ્યો હતો.
13 મહિનામાં ૩ લાખ સ્કૂટર વેચાયા
ઈલેક્ટ્રિક સ્કૂટરને પહેલા 1 લાખ યુનિટ વેચાતા ત્રણ વર્ષથી વધુ સમય લાગ્યો, જ્યારે 1 લાખથી 2 લાખ યુનિટ સુધીની સફર માત્ર 10 મહિનામાં પૂર્ણ થઈ. ૩ લાખ યુનિટનો આંકડો એપ્રિલ 2024ની શરૂઆતમાં પાર કરવામાં આવ્યો હતો, જે લોન્ચ થયાના 52 મહિના પછી એટલે કે ચાર વર્ષ અને ચાર મહિનામાં થયો હતો. છેલ્લા ૩ લાખ યુનિટ દેશભરના ટીવીએસ ડીલરોને માત્ર 13 મહિનામાં ડિલિવર કરવામાં આવ્યા હતા, જે આ ઈ-સ્કૂટરની ઝડપથી વધતી માંગ દર્શાવે છે.
ભારતનું પહેલું ઈલેક્ટ્રિક સ્કૂટર બન્યું
iQube જાન્યુઆરી 2020માં લોન્ચ કરવામાં આવ્યું હતું. તે એક એવું સ્કૂટર હતું જેમાં સુવિધા અને પ્રદર્શનનું સંતુલન છે. તેમાં સંપૂર્ણ LED લાઇટ્સ, કનેક્ટેડ ટેકનોલોજી, પહોળી સીટ અને સારી સ્ટોરેજ ક્ષમતા છે, જેણે તેને ફેમિલી ઈ-સ્કૂટર તરીકે રજૂ કર્યું. આ આંકડો પાર કરનાર તે ભારતમાં પહેલું ઈલેક્ટ્રિક સ્કૂટર છે. 6 લાખ યુનિટના વેચાણ સુધી પહોંચવામાં કુલ 65 મહિના (એટલે કે 5 વર્ષ અને 5 મહિના) લાગ્યા. માહિતી અનુસાર, છેલ્લા ત્રણ નાણાકીય વર્ષોમાં તેની માંગમાં ઝડપથી વધારો થયો છે અને નાણાકીય વર્ષ 2025માં ખૂબ જ ઝડપી ગતિ પ્રાપ્ત થઈ છે.
TVS નું વર્ષ શાનદાર રહ્યું
નાણાકીય વર્ષ 2025 TVS માટે શાનદાર રહ્યું. ટુ-વ્હીલર કંપનીએ આ વર્ષે કુલ 18.13 લાખ સ્કૂટર (18,13,103 યુનિટ) વેચ્યા, જે ગયા વર્ષ કરતા 25% વધુ છે. આમાં પેટ્રોલ સ્કૂટર Jupiter, NTorq, Zest અને ઇલેક્ટ્રિક iQubeનો સમાવેશ થાય છે. આ ઉત્તમ પ્રદર્શનને કારણે, TVS ને 26% બજાર હિસ્સો મળ્યો અને કંપનીએ FY2025 દરમિયાન ભારતમાં કુલ 68,53,214 સ્કૂટરના વેચાણમાં નોંધપાત્ર યોગદાન આપ્યું. FY2025માં એકલા iQube એ 2,72,605 યુનિટ વેચ્યા, જે TVSના કુલ સ્કૂટર વેચાણના 15% છે.
