VIDEO: જો નવી કાર લેવાનું વિચારતા હોવ તો વાંચો આ અહેવાલ! મારુતિની ગાડીઓના ભાવમાં ધરખમ ઉછાળો
છેલ્લું અપડેટ : 22 Jul 2026
દેશની સૌથી મોટી કાર ઉત્પાદક કંપની મારુતિ સુઝુકીએ મંગળવારે પોતાની તમામ ગાડીઓની કિંમતોમાં વધારાની જાહેરાત કરી દીધી છે. તમને જણાવી દઈએ કે કંપની પોતાની કારના અલગ-અલગ મોડેલ્સ પર કિંમતોમાં 30 હજાર સુધીનો વધારો કરશે. આ નવી વધેલી કિંમતો ઓગસ્ટ 2026થી લાગુ થશે. કંપનીએ આ વધારાનું મુખ્ય કારણ ઇનપુટ કોસ્ટ એટલે કે ઉત્પાદન ખર્ચમાં સતત થઈ રહેલા વધારાને ગણાવ્યું છે. જો તમે પણ આવતા મહિને મારુતિની કોઈ નવી કાર ખરીદવાનું આયોજન કરી રહ્યા છો, તો હવે તમારે તમારું ખિસ્સું વધુ ખાલી કરવું પડશે.
કંપનીનું શું કહેવું છે?
મારુતિ સુઝુકીએ અધિકૃત નિવેદનમાં જણાવ્યું છે કે તે છેલ્લા કેટલાક મહિનાઓથી વધતા ખર્ચની અસરને ઓછી કરવાનો સતત પ્રયાસ કરી રહી હતી. આ માટે કંપનીએ પોતાની તરફથી ઉત્પાદન ખર્ચ ઘટાડવાના અનેક ઉપાયો કર્યા. જોકે, કાચા માલ અને ઇનપુટ કોસ્ટમાં મોંઘવારીનું દબાણ સતત બની રહ્યું છે. ઉત્પાદન ખર્ચનું પ્રતિકૂળ વાતાવરણ જળવાઈ રહેવાના કારણે કંપનીને મજબૂરીમાં વધેલા ખર્ચનો કેટલોક હિસ્સો ગ્રાહકો પર નાખવો પડી રહ્યો છે. આમ છતાં, કંપનીએ કહ્યું છે કે તેણે ગ્રાહકો પર તેની અસર ઓછીમાં ઓછી રાખવાનો પ્રયાસ કર્યો છે.
વધતી ઇનપુટ કોસ્ટનું દબાણ
ઉલ્લેખનીય છે કે કોમોડિટી, લોજિસ્ટિક્સ અને ઓપરેશનલ કોસ્ટ (સંચાલન ખર્ચ)માં વધારાને કારણે 2026માં કંપનીએ ફરી એકવાર કિંમતોમાં ફેરફાર કર્યો છે. આ પહેલા મે મહિનામાં પણ કંપનીએ ખર્ચ ઘટાડવાના ઉપાયો દ્વારા ભાવ નિયંત્રણમાં રાખવાનો પ્રયાસ કર્યો હતો. ફેબ્રુઆરીમાં પણ મારુતિ સુઝુકીએ કહ્યું હતું કે તે કિંમતોમાં વધારાનું મૂલ્યાંકન કરી રહી છે. વાસ્તવમાં કિંમતી ધાતુઓ અને અન્ય કાચા માલના મોંઘા થવાને કારણે દબાણ સતત વધી રહ્યું હતું.
શેરબજાર પર નિર્ણયની અસર દેખાઈ
કિંમતોમાં વધારાની જાહેરાત બાદ મારુતિ સુઝુકીના શેરમાં પણ તેજી જોવા મળી હતી. મંગળવારે બોમ્બે સ્ટોક એક્સચેન્જ (BSE) પર કંપનીના શેર વધારા સાથે કારોબાર કરી રહ્યા હતા. બપોર પછી કંપનીના શેરમાં ₹ 122.55૫૫નો ઉછાળો આવ્યો હતો. આ સાથે જ મારુતિનો શેર ₹13.630ના સ્તર પર ટ્રેડ કરી રહ્યો હતો. કંપનીએ સ્પષ્ટ કર્યું છે કે 30 હજાર સુધીનો આ વધારો અલગ-અલગ કાર મોડેલ્સ અને તેના વેરિઅન્ટ્સ મુજબ અલગ-અલગ રહેશે.