VIDEO: નવી દિલ્હીમાં હંગામા વચ્ચે CJP અને કેન્દ્ર સરકાર વચ્ચે ચર્ચા, નડ્ડાએ આંદોલનકારીઓને ધરણાં સમેટવા કરી વિનંતી
છેલ્લું અપડેટ : 20 Jul 2026
કોકરોચ જનતા પાર્ટીએ સોમવારે (20 જુલાઈ) જંતર-મંતરથી સંસદ ભવન તરફ માર્ચ કરી. આ દરમિયાન ભારે બબાલ થઈ. ઉહાપોહ વચ્ચે CJPના પ્રવક્તા સૌરવ દાસ અને આશુતોષ રાંકા કેન્દ્રીય મંત્રી જેપી નડ્ડાને મળવા પહોંચ્યા. નડ્ડા સાથે મુલાકાત કર્યા પછી સૌરવ દાસે કહ્યું કે સરકારે આગળ વાતચીતની ખાતરી આપી છે.
જેપી નડ્ડા સાથેની મુલાકાત બાદ સૌરવ દાસે સોશિયલ મીડિયા પર એક પોસ્ટ શેર કરી. તેમણે લખ્યું કે, મેં અને આશુતોષ રાંકાએ લગભગ 2 કલાક રાહ જોયા પછી કેન્દ્રીય મંત્રી જેપી નડ્ડા સાથે 10 મિનિટ મુલાકાત કરી. અમે અમારી માંગણીઓ લેખિતમાં સોંપી છે, તેમણે આગળ વાતચીતની ખાતરી આપી છે. અમે એ જ પ્રક્રિયામાં લાગેલા છીએ. આ દરમિયાન મોટા પાયે લોકોની અટકાયત કરવામાં આવી રહી હોવાના સમાચાર પણ આવી રહ્યા છે.
NEET પેપર લીક અને વિદ્યાર્થીઓના આંદોલન વચ્ચે કેન્દ્રીય મંત્રી જે.પી. નડ્ડા અને 'કૉકરોચ જનતા પાર્ટી' (CJP) ના પ્રતિનિધિમંડળ વચ્ચે એક મહત્ત્વપૂર્ણ બેઠક યોજાઈ હતી. આ મુલાકાત બાદ કેન્દ્રીય મંત્રીએ આંદોલનકારીઓને પોતાનું ધરણા પ્રદર્શન સમાપ્ત કરવા અને સ્થિતિ સામાન્ય બનાવવામાં મદદ કરવાની અપીલ કરી છે.
સૌહાર્દપૂર્ણ વાતાવરણમાં થઈ ચર્ચા: જે.પી. નડ્ડા
મુલાકાત અંગે માહિતી આપતાં કેન્દ્રીય મંત્રી જે.પી. નડ્ડાએ જણાવ્યું હતું કે, "આજે સવારે પહેલીવાર પ્રદર્શનકારીઓ તરફથી સરકાર સાથે વાટાઘાટો કરવાનો પ્રસ્તાવ આવ્યો હતો. સવારે 11:50 વાગ્યાથી જ અમારી ચર્ચા શરૂ થઈ ગઈ હતી. અત્યંત સૌહાર્દપૂર્ણ વાતાવરણમાં મુલાકાત યોજાઈ હતી. પ્રતિનિધિમંડળ સાથે પહેલા વિસ્તૃત મૌખિક ચર્ચા થઈ અને ત્યારબાદ બપોરે આશરે 4 વાગ્યે તેમણે મને લેખિત આવેદનપત્ર સોંપ્યું છે. મેં તમામ આંદોલનકારીઓને વિનંતી કરી છે કે તેઓ પોતાના ધરણા સમાપ્ત કરે અને શાંતિ તથા સામાન્ય સ્થિતિ પુનઃસ્થાપિત કરવામાં પ્રશાસનને મદદ કરે."
CJP ની મુખ્ય માંગણીઓ:
સોનમ વાંગચુકની મુક્તિ: પર્યાવરણવિદ અને આંદોલનકારી સોનમ વાંગચુકને હોસ્પિટલમાંથી મુક્ત કરવામાં આવે અને તેમની અવરજવર પરના تمام પ્રતિબંધો હટાવવામાં આવે.
શિક્ષણ મંત્રીનું રાજીનામું: NEET ગેરરીતિની નૈતિક જવાબદારી સ્વીકારીને શિક્ષણ મંત્રી ધર્મેન્દ્ર પ્રધાન રાજીનામું આપે અથવા તેમને હોદ્દા પરથી દૂર કરવામાં આવે.
મૃતક પરીક્ષાર્થીઓને વળતર: NEET 2026 પેપર લીક ઘટના બાદ આત્મહત્યા કરનારા તમામ પીડિત પરીક્ષાર્થીઓના પરિવારજનોને રૂ. 1 કરોડનું વળતર આપવામાં આવે.
પોલીસ બળપ્રયોગ પર રોક: દિલ્હી પોલીસ દ્વારા શાંતિપૂર્ણ રીતે વિરોધ કરી રહેલા વિદ્યાર્થીઓ પર કરવામાં આવતો બળપ્રયોગ તુરંત બંધ કરવામાં આવે.
CJP એ સ્પષ્ટ કર્યું હતું કે તેમની માંગણીઓ તદ્દન વ્યાજબી છે અને તે દેશના યુવાનોની આકાંક્ષાઓને અનુરૂપ છે.
વિદ્યાર્થીઓના સમર્થન માટે સૌરવ દાસનું ટ્વીટ
કોકરોચ જનતા પાર્ટીના મુખ્ય પ્રવક્તા સૌરવ દાસે વધુમાં કહ્યું કે, 'પોલીસે અભિજીત દીપકેની અટકાયત કરી લીધી છે! અમે તમામ સાંસદોને અપીલ કરીએ છીએ કે તેઓ તરત જ રસ્તા પર ઉતરેલા વિદ્યાર્થીઓના સમર્થનમાં ઊભા રહે! પોલીસ શાંતિપૂર્ણ પ્રદર્શનકારીઓ પર નિર્દયતાથી કાર્યવાહી કરી રહી છે અને તેમની સાથે મારપીટ કરી રહી છે.'
પ્રિયંકા ગાંધીના કેન્દ્ર સરકાર પર પ્રહાર
કોંગ્રેસ સાંસદ પ્રિયંકા ગાંધી વાડ્રાએ CJPની માર્ચના સમર્થનમાં કહ્યું, અમે બધા કહી રહ્યા છીએ કે ચર્ચા કરો. શિક્ષણ વ્યવસ્થામાં ખામીઓ છે. કેન્દ્ર સરકાર ચર્ચા કરવા માટે જ રાજી નથી. શા માટે બાળકો પર આંસુ ગેસ છોડી રહ્યા છો અને તેમની સાથે મારપીટ કરી રહ્યા છો? તેઓ આપણા બાળકો છે.