નાની કારોની બજારમાં ધમાકેદાર વાપસી, આ ગાડીઓના વેચાણમાં 96 ટકાનો મોટો ઉછાળો: જાણો શું છે કારણ?
છેલ્લું અપડેટ : 23 Sept 2026
ભારતમાં GST 2.0 લાગુ થયાને એક વર્ષ પૂર્ણ થઈ ગયું છે. સૌથી મોટો ફેરફાર ઓટોમોબાઈલ ક્ષેત્રમાં જોવા મળ્યો છે. આ સમયગાળા દરમિયાન નાની અને એન્ટ્રી-લેવલ કારોની માંગમાં ફરી એકવાર તેજી જોવા મળી છે. આ બદલાવ એટલા માટે જરૂરી હતો કારણ કે SUVની વધતી માંગના લીધે નાની કારોનું વેચાણ ખૂબ ઘટી ગયું હતું. મારુતિ સુઝુકીએ GSTમાં થયેલા ફેરફારને કંપની અને ઓટો સેક્ટર માટે મોટો બદલાવ ગણાવ્યો છે.
મારુતિ સુઝુકીના મેનેજિંગ ડિરેક્ટર અને CEO હિસાશી તાકેઉચિના જણાવ્યા અનુસાર, એપ્રિલથી ઓગસ્ટ 2026 દરમિયાન કંપનીનું પેસેન્જર વ્હીકલ વેચાણ વાર્ષિક ધોરણે લગભગ 36 ટકા વધ્યું છે. આ જ સમયગાળા દરમિયાન કંપનીના એન્ટ્રી-લેવલ સેગમેન્ટના વેચાણમાં 96 ટકાથી વધુનો ગ્રોથ નોંધાયો છે.
કંપનીના જણાવ્યા મુજબ, GSTમાં ઘટાડા પછી નાની કારોની કિંમત પહેલાની સરખામણીએ વધુ પોસાય તેવી થઈ છે. આનાથી ખાસ કરીને એવા ગ્રાહકોને ફાયદો થયો છે જે પહેલીવાર કાર ખરીદવાની યોજના બનાવી રહ્યા હતા. મારુતિનું કહેવું છે કે સારી કિંમત અને વધતી માંગથી દેશમાં કારોનું માર્કેટ વધુ મોટું થઈ શકે છે.
નાની કારો પર કેટલો GST?
સરકારના નવા GST માળખામાં નાની કારો પર GST ને 28 ટકાથી ઘટાડીને 18 ટકા કરવામાં આવ્યો છે. પેટ્રોલ, LPG અને CNG કારો માટે 1,200cc સુધીનું એન્જિન અને 4 મીટર સુધીની લંબાઈ ધરાવતી કારો આ કેટેગરીમાં આવે છે. ડીઝલ કારો માટે 1,500cc સુધીનું એન્જિન અને 4 મીટર સુધીની લંબાઈની સીમા છે. મોટી કારો અને નક્કી કરેલા માપદંડો વાળી SUV પર GSTનો દર 40 ટકા કરવામાં આવ્યો છે, જ્યારે ઈલેક્ટ્રિક વાહનો પર GST 5 ટકા પર યથાવત રાખવામાં આવ્યો છે.
વેચાણ વધવાથી કંપનીઓની યોજનાઓ પણ ઝડપી થઈ
હિસાશી તાકેઉચિના જણાવ્યા અનુસાર, માંગ વધવા અને કારો વધુ પોસાય તેવી બનવાના કારણે મારુતિ પોતાની કેપિટલ એક્સપેન્ડિચર એટલે કે રોકાણની યોજનાઓને પણ ઝડપી બનાવી રહી છે. કંપનીનું માનવું છે કે મજબૂત ઉત્પાદન ક્ષમતાથી ભારતમાં ઉત્પાદન વધારવા અને એક્સપોર્ટની તકોને પ્રોત્સાહન મળી શકે છે. મારુતિએ પહેલા પણ જણાવ્યું હતું કે GSTમાં ઘટાડા પછી ઘરેલું માર્કેટમાં માંગ મજબૂત થઈ અને નાની કારોના 18 ટકા GST વાળા સેગમેન્ટમાં મોટી સંખ્યામાં ઓર્ડર મળ્યા હતા. GST બદલાવ પછી ઓટો સેક્ટરમાં માંગ વધવાથી કાર કંપનીઓ, ડીલર્સ, સર્વિસ સેન્ટર અને ઓટો ફાઈનાન્સ કંપનીઓને પણ ફાયદો મળવાની આશા વ્યક્ત કરવામાં આવી હતી.